Rukoen iman

---

![image]()

---

Salam alaikom bak phon kalam.
Inong agam kuta ngon gle.
Gasin kaya puteh itam.
Yang iseulam bukon kafe.

---

Ci neusimak saboh peusan. Harah lapan beuntuk ca'e. judul lon boh rukon iman. Jeut neu simpan dalam hate.

---

Yang phon tanyoe wahe taulan. Ta meu iman sabe-sabe. Tapeucaya sidroe tuhan. Yang po alam rubbul kade.

---

Yang keudua wahe rakan. Rukon iman beu tapike. Malaikat siploh droe nyan. Sebagian lon ci rawe.

---

Phon mikail yang ba hujan. Izrail nan yang peu mate. Zabaniah tugah gopnyan. Bi hukoman uroe page.

---

Mungkar nangkir lam kuburan. Malek rizwan lam jannate. Tapeucaya ban 10 nyan. Ingat rakan meubek pre-pre.

---

Teuma keu 3 rukon iman. Wahe intan yakin sabe. Tapeucaya kitab tuhan. Taurat qur'an hai bohate.

---

Teuma keu 4 wahe insan. Dum Rasulan sifeut ade. Beu ek ingat lam pikeran. Meubek rakan tanyoe jahe.

---

Dua limong lam al-qur'an. Geuseubot nan lumboi ganje. Ulon tuleh sebahgian. Ngat bek panyang lon meu ca'e

---

adam yang phon ayah geuh tan. Poma pih han gopnyan lahe. Idris yakob ngon aiyuban. Musa rakan ureung meuse.

---

Ishak harun ngon syu'iban. yusuf tampan jroh that hate. Yunus 'isa wa sulaiman. Muhammadan yang teurakhe.

---

Yang keu 5 wahe ikhwan. Tameu iman uroe page bangket bandum bak watei nyan. Tanyoe insan ohleuh mate.

---

Yg seuneuleuh rukon iman. Hai cut intan seuri kande. Tapeucaya keu teutapan. takdir tuhan bandum ade.

---

Cicem pala di cong mamplam. Manok siam pajoh pade. Etnoe mantong lon meu nazam. Ngon wassalam lon tob ca'e.

---

# followmee @moneysteemit

---