ရိုးတံနှင့် ပန်းပွင့်

ဒီနေ့ ကျွန်မရဲ့ ဧည့်ခန်းထဲမှာ စိုပြည်လျက် ရှိနေတယ်။ ဧည့်ခန်းရဲ့ စားပွဲပေါ်မှာ စားစရာတွေ အပြည့် ရှိနေသလို ရယ်မောပြောဆို နေသံမှာ ပြန်စဉ်းစားရင်း လွန်ခဲ့သော နှစ်များဆီက အတိုင်းပါပဲ။

ကျွန်မက ဧည့်ခန်းထဲက ဧည့်သည် မမများအတွက် အအေး၊ ကော်ဖီတွေ ဖျော်နေတယ်။ အကြိုက်ကလည်း တစ်ယောက်တစ်မျိုး …။ ကျောင်းကတည်းက သူငယ်ချင်းတွေမို့ အတွင်းသိ။

ကျွန်မတို့ ခုလို ပြန်ဆုံနိုင်ဖို့ တော်တော်ကြိုးစား ထားရတာ။ ကျောင်းပြီးတော့ အလျှိုလျှို အိမ်ထောင်ကျ ကုန်ကြတယ်။ အဲဒီကတည်းက လေးယောက်လုံး တစ်ခါမှ မဆုံခဲ့။ ဒီကြားထဲ သူ့အလုပ် ကိုယ့်အလုပ်နဲ့ မအားတာနဲ့ပဲ ပြောင်းတဲ့သူက ပြောင်းနဲ့ မတွေ့ကြတော့ဘူး။ အရင်က တစ်ယောက်အကြောင်း တစ်ယောက် သိကြပေမဲ့ ခုချိန်မှာ ပြောင်းလဲမှု များစွာနဲ့ ဝေးနေကြရတယ်။ ဒီနေ့တော့ ကျွန်မရဲ့ မှတ်မှတ်ရရ မွေးနေ့လည်း ဖြစ်တာမို့ မဖြစ်ဖြစ်အောင် ဆုံဖို့ တစ်လလောက် ကြိုချိန်းခဲ့ရတယ်။ ကျွန်မတို့အားလုံး ပျော်ရွှင်နေကြတယ်။ ဒီအရသာကို လွတ်လပ်စွာ ပြန်ခံစားခွင့်ကို မျှော်လင့်နေခဲ့တာ ကျွန်မတို့ လေးယောက်လုံးပဲ။ အားလုံး ဝေးကွာနေရာက ခုလို ပြန်ဆုံတော့ ခံစားမှု အသစ်လေး ရသလို ကျွန်မတို့အားလုံး အိမ်ထောင်သည်တွေနဲ့ မတူဘဲ အပျိုတွေနဲ့ တူနေတယ်။

ကျွန်မတို့ တွေ့ဆုံမိကြရင် ကိုယ့်မှာ ဖြစ်နေတဲ့ ပြဿနာ၊ မပြေလည်မှု၊ ပြေလည်မှုတွေ အားလုံး ပြောဖို့၊ ရင်ဖွင့်ဖို့ဟာလည်း တာစူထားကြတယ်။ အသီးသီး အိမ်ထောင်ကျ သွားပေမယ့် အဲဒီ အိမ်ထောင်ရေးရဲ့ အခြေအနေကို မသိကြသေးတာမို့ တစ်ယောက်အကြောင်း တစ်ယောက် စိတ်ဝင်စား နေကြတယ်။ ကျွန်မတို့တွေ ဘယ်လောက် စိတ်ကူးယဉ်ကြသလဲ ဆိုရင် ရင်ဖွင့်ဖို့ကို မဲလိပ်နှိုက်ပြီး အမှတ်စဉ် တပ်ကြတယ်။

အမှတ်စဉ် နံပါတ်(၁) ကို ကျသွားသူက ‘ယမင်းတင်အောင်’ တဲ့။

အမင်းရဲ့ မျက်နှာလေးက အရင်အတိုင်း ချောဆဲ။ နှုတ်ခမ်းက ပြုံးစစ ဖြစ်သွားပြီး သူ့အကျင့်အတိုင်း ဆံပင်ကို တစ်ချက် ခါလိုက်ရင်း …

“ငါ အရင်ကျသွားတော့ သိပ်မကောင်းဘူး၊ ဒါပေမဲ့ ငါ အရမ်း ပြောချင်နေတယ်၊ အဓိက,က ငါ့ဘဝမှာ မထင်မှတ်တာတွေ တွေ့လာရတာပဲ၊ နင်တို့ သိတဲ့အတိုင်း အိမ်ထောင်မကျခင် ကတည်းက အိမ်ရဲ့ စီးပွားရေးလည်း ငါပဲ ဦးဆောင် လုပ်ခဲ့ရတာ၊ ပွဲရုံလုပ်ငန်း ဆိုတော့ ရှုပ်တော့ ရှုပ်နေတာပေါ့။ ငါက ငယ်ငယ်ကတည်းက ဦးဆောင်လာရတာ အကျင့်ဖြစ်နေပြီ။ ငါ့စိတ်က မြန်တော့ ငါလုပ်သမျှ ပြီးလွယ်ပြီး အောင်မြင်တာ များတယ်၊ ဒါကတော့ ငါ ငယ်ငယ်ကတည်းက ပွဲရုံနဲ့ ရင်းနှီးနေလို့ပဲ ထားပါတော့ …”
“ငါ ‘ကိုမျိုးဆက်’ ကို ဖြစ်စေချင်တာက ငါ့စီးပွားရေးလည်း သူ့စီးပွားရေးပဲ၊ ငါ့မိဘပိုင်တယ် ဆိုတဲ့ အသိက သူ့ခေါင်းထဲ ရောက်နေတယ်၊ ဒီလုပ်ငန်းတွေမှာ စိတ်ပါစွာ ဝင်လုပ်စေချင်တယ်၊ သူ့အတွေးက သူက ငါ့လောက် မလုပ်နိုင်တော့ အလိုလို Feel ဖြစ်တယ်၊ ငါ့မိဘကလည်း သူ့ကိုမနှိမ်ပါဘူး၊ သူလုပ်တဲ့ ကား, ဆိုင်ကယ် ပွဲစားအလုပ်က ရတစ်လှည့် မရတစ်လှည့်၊ သိတဲ့အတိုင်းပဲ၊ သူသာ ဦးစီးနိုင်မယ် ဆိုရင် ငါက တစ်ဖက်က ဆိုင်တစ်ခုခု ဖွင့်လို့ရတယ်၊ စီးပွားရေးကို ဘယ်လို လုပ်ရမယ် ဆိုတာ ငါ့လောက် သူ နားမလည်ဘူး …”
“ကုန်သည်တွေကလည်း ကြာတော့ ငါ့ပဲ သိတာပေါ့၊ ဟိုနေရာဆိုလည်း ငါ ဒီနေရာဆိုလည်း ငါပဲ၊ ဒီကိစ္စတွေ ငါ လုပ်ရလို့ ပြောတာ မဟုတ်ပါဘူး၊ သူ့ကို ဖြစ်စေချင်တာပေါ့၊ ကြာတော့ ငါ့မိဘက ဘာမှ မပြောပေမဲ့ သူ့ဟာသူ ရှောင်ဖယ်လာတယ်၊ နောက်ဆုံး စိတ်အလိုမကျမှုတွေက င့ါပေါ် စုပုံလာပြီး မကြာခဏ စကားများ ကြတာပေါ့၊ အရင်က ငါ သူ့ကို အဲဒီလို စိတ်ဓာတ် ရှိလိမ့်မယ်လို့ လုံးဝ မထင်ခဲ့ဘူး၊ အဲဒါက ငါ့ရဲ့ Main ပြဿနာပဲ”

“ဟုတ်ပြီ၊ အမင်းရဲ့ ပြဿနာကို သိရပြီ၊ ဘယ်လို ဖြေရှင်းရမလဲ ဆိုတာ နောက်မှ အဖြေထုတ် ကြတာပေါ့၊ ခု ဒုတိယ တစ်ယောက်ရဲ့ ရင်ဖွင့် တေးသံသာကို နားဆင်ရအောင်”

ဒုတိယ အလှည့်က “အသော်” …။

အသော်က ဘာပြောရမလဲ စဉ်းစားနေပုံနဲ့ နှုတ်ခမ်းကို ကိုက်လိုက်သေးတယ်။

“ငါကတော့ မိဘတွေရဲ့ဆန္ဒကို မလွန်ဆန်နိုင်တဲ့သူ ဆိုတော့ ကိုနိုင်နဲ့ လမ်းခွဲပြီး မိဘတွေ ပေးစားတဲ့ ကိုဘုန်းကို လက်ထပ် လိုက်ရတာ ဒီအထိ ရှင်တို့ သိပါတယ်၊ ငါဟာ ကိုနိုင့်ကို လမ်းခွဲပြီး အိမ်ထောင်တစ်ခု အပေါ်မှာ အမြဲ သစ္စာရှိခဲ့ ပါတယ်၊ ကိုဘုန်းက အရင်က ရည်းစား မရှိခဲ့ဖူးဘူး၊ ကိုနိုင့် ကိစ္စနဲ့ ပတ်သက်ပြီး သူက သဝန်တိုတယ်၊ ကိုနိုင်နဲ့က စီးပွားရေးအရ တစ်ခါတလေ ဆက်ဆံရတာလည်း ရှိတာပေါ့ …”
“သူက အမြဲတမ်း သံသယ မျက်ဝန်းနဲ့ ကြည့်တတ်တယ်၊ တကယ်တော့ မိန်းမ အားလုံးဟာ မျက်နှာ မများချင်ကြတဲ့ လူချည်းပဲ၊ ဒီတစ်ယောက်ပဲ ချစ်ပြီး အိမ်ထောင်ဖက်ကိုလည်း ဒီတစ်ယောက်ပဲ ဖြစ်ချင်တာပဲ၊ ဒါပေမဲ့ စိတ်ကူးနဲ့ လက်တွေ့ဟာ ထပ်တူကျချင်မှ ကျတတ်တာပဲ၊ သူကတော့ ငါ့တစ်ယောက်ကိုပဲ ကြိုက်ပြီး လက်ထပ်နိုင်ခဲ့တာ ဆိုတော့ ကံကောင်းတာပေါ့၊ ငါနဲ့ ကိုနိုင့်ကြားက ဆက်ဆံရေးဟာ သန့်ရှင်းတယ်၊ ဒါကို သူ့မှာ သံသယ အပူတွေနဲ့ နေရတာ သူ့အတွက် မငြိမ်းချမ်းဘူး၊ သူ့ ကြည့်လိုက်ရင် မြုံစိစိနဲ့၊ သေသေချာချာတော့ ငါ့ကို မပြောဘူးဟ၊ ငါတို့နှစ်ယောက် ကြားမှ အဲဒီလိုချည်း မဖြစ်ချင်ဘူး၊ ပွင့်ပွင့်လင်းလင်းပေါ့၊ ဒီလိုကိစ္စတွေက ကြာလာရင် သူ့ဘက်က ပေါက်ကွဲလာမှာ စိုးရိမ်တယ်၊ ငါ့ပြဿနာ ကတော့ ဒါပဲ၊ ဘာမှမဟုတ်ဘဲ လင်မယား ခဏခဏ စကားများ နေရရင် ကြာရှည်ကျ မကောင်းဘူးလေ၊ တကယ်တော့ လက်ထပ်ခြင်း ဆိုတာ သူတို့က ပိုင်ဆိုင်ပြီး ငါတို့က ပိုင်ဆိုင်ခံ လိုက်ရတဲ့ သားကောင်တွေလိုပဲ၊ အိမ်ထောင်ရေးမှာ နားလည်မှုနဲ့ အပေးအယူ တည့်မှ ဖြစ်မယ်၊ ရည်းစားတုန်းက နားလည်ခဲ့တဲ့ အချစ်နဲ့ အိမ်ထောင်ရေးမှာ တည်ရှိတဲ့ အချစ်နဲ့ တခြားစီပဲလို့ ထင်တာပဲ …”
“အသော် ပြောတာ ဟုတ်တယ်”

ဇင်မင်းခင်က ထောက်ခံတယ်။

“ကဲ … ကဲ … ဒီတစ်ခါ ဒေါက်တာ ဇင်မင်းခင်ရဲ့ အလှည့်ပါ”
“အဇင် … ရှင်ကတော့ ကျောင်းတုန်းက ပြောဖူးတဲ့အတိုင်း ရှင် လိုချင်တဲ့ အိမ်ထောင်ရေး တစ်ခု တည်ထောင် နိုင်တယ်လို့ အမင်း ထင်တယ်”
“အမယ်လေး … ဒေါ်ယမင်းတင်အောင် … ကိုယ် ခုချိန်မှာ စီးပွားရေးလောက ထဲကိုတောင် ပြေးဝင် လိုက်ချင်သေးတယ်၊ ရှင်တို့ကို ကြည့်ရတာ ဘာပဲဖြစ်ဖြစ် ကိုယ့်ထက်တော့ လွတ်လပ် နေတယ်လို့ ထင်တာပဲ၊ ကိုယ့်ဘဝ အကြောင်းကို ပြောရရင်တော့ ‘What if the meaning of my life’ လို့ မေးရမလို ဖြစ်နေပြီ၊ အများအမြင်မှာတော့ ကိုယ့်ဘဝဟာ အားကျစရာ ကောင်းပါတယ်၊ ယောက်ျားက ဆရာဝန်၊ ယောက္ခမ နှစ်ယောက်လုံးက ဆရာဝန်၊ ကိုယ်က ဆရာဝန်၊ ဒီကြားထဲ ကိုယ့်အဖေကလည်း ဆရာဝန်၊ တစ်အိမ်လုံး မိသားစုဝင်တွေ ဆရာဝန် ဖြစ်နေတဲ့အခါ တခြား အကြောင်းအရာ ပြောဖို့ အခွင့်အရေး နည်းပါး လာကြတယ်”
“ကိုယ်တော့ နေ့တိုင်း Liver တွေ၊ Lung တွေ၊ Arteries တွေ မြင်နေရတာက တစ်မျိုး၊ အိမ်ရောက်ရင်လည်း ကြားရတဲ့ စကားက ဒီထဲက မထွက်ဘူး၊ တစ်ပတ် တစ်ခါလောက် လူစုံတဲ့ ထမင်း စားပွဲမှာလည်း ဒီအကြောင်းတွေပဲ ဖြစ်နေတယ်၊ တစ်ခါတလေ တူညီတာတွေ များလွန်းတော့ မတူညီတာလေးတွေကို တောင့်တမိတယ်၊ တစ်ခါတလေ ထမင်းချက် အဒေါ်ကြီး ပြောတဲ့ ဈေးထဲက အကြောင်း၊ လမ်းမှာ ရန်ဖြစ်ကြတဲ့ အကြောင်း၊ သူတို့ရွာက အကြောင်းတွေကို ကိုယ့်မှာ မက်မောစွာ နားထောင် နေမိတယ်”
“ဒီဆရာဝန် ဘဝကို အမှန်အတိုင်း ပြောရရင် ကိုယ်တိုင် ရွေးချယ်ခဲ့တာ မဟုတ်ဘူးလေ၊ မိဘတွေ ရွေးချယ်ခဲ့တာ ဆိုတော့ …၊ ကိုယ် ဝါသနာ ပါရာမှာ နစ်မြုပ်နေခွင့် ရတာ ဆိုရင်တော့ ငါ ဒီလောက်တော့ ခံစားရမှာ မဟုတ်ဘူး၊ တစ်ခါတလေ Uterus ရောဂါတွေ ကြည့်ပြီး ကိုယ်က Maiden ဘဝကို နှမြောနေမိတယ်၊ ကိုယ် ပြောတာတွေဟာ ခုချိန်မှာ ရယ်စရာ ကောင်းနေလိမ့်မယ်၊ ကိုယ့်မှာ Body တွေကို မြင်တွေ့ နေရတော့ တကယ်တော့ လူဟာ ဘာမှ မဟုတ်ပါလား ဆိုတဲ့ အသိတရား ရနေပြီ၊ အလုပ် ပြန်ချိန်တွေကလည်း သူနဲ့ ကိုယ်နဲ့ ဘယ်တော့မှ မတူဘူး၊ သူက မနက် ဆေးခန်း ဝင်ရတော့ ကိုယ် မနိုးခင် သွားနှင့်ပြီ၊ ညကျလည်း သူ စောရင် စောတယ်၊ ကိုယ်ကလည်း နောက်ကျတတ်တယ်၊ လင်မယား နှစ်ယောက် အတူတူ ထမင်း မစားဖြစ်တာတောင် ကြာပြီ၊ အေးအေးဆေးဆေးလည်း စကားမပြောဖြစ်ဘူး၊ အဓိကကတော့ ကိုယ်တို့ဟာ Life တစ်ခုထဲမှာ နစ်မြုပ်နေတယ်လို့ ထင်တယ်၊ အဲဒီအတွက် ငြီးငွေ့မှု တအားဖြစ်တယ်၊ သူလည်း အရမ်း ပင်ပန်းတယ်၊ ‘ကိုနေပိုင်’ ကို မိဘ သဘောတူတယ် ဆိုပေမဲ့ ငါတို့လည်း မေတ္တာရှိတော့ တခြား ပြဿနာတော့ မရှိပါဘူး”
“ကိုယ် စဉ်းစားတာ တစ်ခုတော့ ရှိတယ်၊ ကိုယ်တို့ Relax ဖြစ်အောင်နေပြီး တစ်ယောက်နဲ့ တစ်ယောက် အချိန်ပေးဖို့ လိုအပ်တယ်၊ အဲဒီလိုမှ မလုပ်ရင် ကိုယ်တို့ရဲ့ Body တွေဟာ စက်ရုပ်တွေ မဟုတ်ဘူးလေ၊ သေဆုံးကုန်လိမ့်မယ်၊ ရှင်တို့နဲ့ ခုလို စကားပြော လိုက်ရလို့ ခံသာသေးတယ်၊ ကိုယ်တို့မှာ အဓိက ပြဿနာက အချိန် ရှားပါးလွန်းတယ်၊ အိမ်ထောင် တစ်ခုကို ကြာရှည်ခိုင်မြဲဖို့ ဆိုရင် တစ်ယောက်အပေါ် တစ်ယောက် အချိန်ပေးနိုင်မှုနဲ့လည်း ဆိုင်မယ်လို့ ထင်တယ်၊ မဟုတ်ရင်တော့ ကိုယ်တို့ သွေးတွေက ကြာလေ အေးလေ၊ စိမ်းလေ ဖြစ်သွားလိမ့်မယ် … ဟားဟား …”

အဇင်က စကားပြောရင်း သဘောကျစွာ ရယ်ပါသည်။

“အဇင် လိုအပ်နေတဲ့ အချိန်တွေကို အတိုးနဲ့ ချေးမယ်”

အသော်က ပြောတယ်။

“အဇင် Life ကလည်း တစ်မျိုးတော့ စိတ်ဝင်စားစရာ ကောင်းတယ်၊ ခရီး တစ်ခုခုကို ရက်ရှည် ထွက်ရင်လည်း တစ်နည်းအားဖြင့် လန်းဆန်းမှုတော့ ဖြစ်သွားမယ် ထင်တယ်”
“အမယ် ပြောတာကို ကိုယ် စဉ်းစားဖူးတယ်၊ ကလေး မရခင် အပန်းဖြေတော့ ထွက်ဦးမယ်လို့၊ ကဲ … အမယ့် အလှည့်၊ ပြော … စာရေးဆရာမ ဆိုတော့ ဇာတ်လမ်း အတုတွေတော့ မပြောနဲ့နော်”
“စိတ်ချ၊ ကျွန်မကလည်း ရှင်တို့ကို ပြောချင်နေတာ ကြာလှပြီ၊ ကိုနေနဲ့ ကျွန်မက အနုပညာသမားချင်း အိမ်ထောင် ကျကြတာပါပဲ၊ သူက ကွန်ပျူတာ ဒီဇိုင်နာ ဆိုတော့ အမြဲတမ်း ကွန်ပျူတာနဲ့ နပန်းလုံး နေတာပဲ၊ ခုဆိုရင် ကွန်ပျူတာ၊ အင်တာနက်၊ ပုဂံနက်နဲ့ စုံနေတာပဲ၊ တစ်ခါတလေ သူ့ကို ကြည့်ရတာ Robot (ရိုဘော့) စက်ရုပ်တစ်ရုပ် လိုပဲ၊ လူကနေ စက်ရုပ် ဖြစ်နေတဲ့ လူသားပဲ၊ ခုခေတ်ကြီးက အရမ်း တိုးတက်တော့ သူ့ဦးနှောက်တွေက အရမ်း အလုပ်လုပ် နေတယ်၊ တစ်ခါတလေ သူ ပြောတဲ့ အကြောင်းအရာတွေကို စိတ်မဝင်စားသလို၊ ကျွန်မ ပြောတဲ့ အကြောင်းအရာ ကိုလည်း သူက စိတ်ဝင်စားတာ မဟုတ်ဘူး”
“တစ်ခါတလေ ကျွန်မ ရင်ဖွင့်လိုတဲ့ အကြောင်းအရာတွေကို စိတ်ရှည်စွာ နားထောင် ပေးမယ့်သူ လိုသလို၊ အပြုံးနဲ့ နှစ်သိမ့်ပေးမယ့် သူလည်း လိုအပ်တယ်၊ လိုအပ်ချက်တွေကို အလိုက်တသိ ဖြည့်ဆည်း ပေးနိုင်မယ့်သူလည်း လိုတာပေါ့၊ အဲဒီလို အရာတွေကို အဆင်သင့် ရှိတတ်တဲ့ မိခင်က မရှိတော့ သူ့ကို ကျွန်မ မိခင်နေရာမှာ အစားထိုး ကြည့်ပေမယ့် မရခဲ့ဘူး၊ ပုံသဏ္ဌာန် တူညီပြီး အထဲက အရသာ မတူညီတဲ့ ဘီစကစ် တစ်ခုကို စားရသလိုပဲ”
“ကျွန်မ စာတွေကိုပဲ ဖိရေးနေတဲ့ အချိန်တွေမှာ သူ့ကို မေ့သွားတတ်တယ်၊ သူ့မှ မဟုတ်ပါဘူး၊ အရာရာကို မေ့သွားတယ်၊ သူကလည်း ကွန်ပျူတာခုံပေါ် ရောက်ရင် အရာအားလုံး မေ့သွားတယ်၊ ကျွန်မတို့ နှစ်ယောက်ရဲ့ ဆက်ဆံရေးက ကြာလေ အေးစက်လေပဲ၊ သူ ကိုယ့်အပေါ် အစာမကျေတာ တစ်ခုရှိတယ်၊ ယောက်ျားက ဒီဇိုင်နာ ဖြစ်လျက်နဲ့ ကျွန်မ ဝတ္ထု မျက်နှာဖုံး(Cover) တွေကို သူ့ကို ဘယ်တော့မှ ဆွဲမခိုင်းဘူး၊ ကျွန်မ သဘောက ကျွန်မ လုပ်တဲ့ အလုပ်တစ်ခုကို နှစ်ယောက် ပေါင်းပြီး လုပ်တယ်လို့ မမြင်စေချင်လို့ပဲ၊ အဲဒါကို သူက တစ်မျိုး မြင်တယ်၊ ကျွန်မကိစ္စတွေကို သူ ဝင်မပါသလို သူ့ကိစ္စတွေထဲလည်း ကျွန်မ ဝင်မပါဘူး”
“နောက်ပြီး ကျွန်မရဲ့ ရိုဘော့စက်ရုပ်က စကားအရမ်းနည်းပြီး အေးတော့ သူ့ရင်ထဲမှာ ဘာဖြစ်နေမှန်း တော်ရုံနဲ့ မသိရဘူး၊ တစ်နေ့တုန်းကတော့ ကွန်ပျူတာကို အမှတ်တမဲ့ ဖွင့်ကြည့်ရင်း သူ့ခံစားချက်တွေ ရေးထားတာ တွေ့ရတယ်၊ ကျွန်မလည်း တော်တော် အံ့ဩသွားတယ်၊ အဲဒီနေ့က စကားများထားတဲ့ နေ့ပေါ့”

“ကျွန်တော့်မိန်းမ စာရေးဆရာမ ‘မယ်ဘုန်းခင်’ ဟာ ကျွန်တော့်ကို အရမ်း အထင်သေးပါတယ်၊ ကျွန်တော့်ကို ဥပေက္ခာ ပြုထားပါတယ်၊ ကျွန်တော့် ခံစားချက်တွေ ပြည့်နှက်လာတိုင်း ကွန်ပျူတာနဲ့ပဲ အဖော်လုပ်ခဲ့ရ ပါတယ်၊ သူ ကျွန်တော့်အပေါ် ကောင်းပါတယ်၊ ဒါပေမဲ့ မေ့ထားတဲ့ အချိန်တွေ များတယ်၊ ကျွန်တော် မပြောရက်ပါ၊ သူ စာရေးပျက်မှာ စိုးရိမ်ပါတယ် တဲ့”
“အလို … ရှင့်ရဲ့ စက်ရုပ်ကြီးက အလာကြီးပါလား၊ ရယ်ရတယ်”
“အမယ် … အမှန်တော့ ရှင့်လစ်ဟင်းမှုတွေ များပြီလို့ ထင်တယ်”
“အမင်းရယ် … စာရေးတယ် ဆိုတဲ့ အလုပ်က ဈာန်ဝင်တဲ့ အချိန်မှ ရတာဆိုတော့ …”
“ဒါတော့ ဒါပေါ့ဟာ၊ သူ့ခံစားချက်လေးက ငါတောင် သနားလာပြီ”
“အဇင်စုတ် … ရှင်နဲ့ ဘာဆိုင်လို့လဲ”

အသော်က အဇင့်ကို ထုရင်း ပြောတယ်။

“ငါတို့ အားလုံးရဲ့ တစ်ယောက်ချင်း ပြဿနာက ဘာမှ သိပ်မကြီးကျယ်ဘူးလို့ ထင်တယ်၊ ဘယ်လိုဆိုရင် ပိုပြီး အဆင်ပြေနိုင်မလဲ၊ စာရေးဆရာမ အမယ့်ကိုပဲ အကြံတောင်း ရမှာပဲ”

အသော်က ခေါင်းတညိတ်ညိတ်နဲ့ ပြောတယ်။

“ရှင်တို့ကို တစ်ခု ပြောမယ်၊ ရိုးတံနဲ့ ပန်းပွင့်ကို ဘယ်လို မြင်သလဲ၊ အဲဒီ ရိုးတံနဲ့ ပန်းပွင့်ရဲ့ကြားထဲက ဆက်သွယ်မှုကို ဘယ်သူမှ မမြင်နိုင်ကြဘူး၊ ပန်းပွင့်ဟာ ခိုင်မာတဲ့ ရိုးတံ မရှိရင် မဖြစ်သလို၊ ပန်းပွင့် မရှိရင်လည်း ရိုးတံ ဘဝဟာ အဓိပ္ပါယ် ရှိလာနိုင်မှာ မဟုတ်ဘူး၊ မမြင်နိုင်တဲ့ ဆက်သွယ်မှုနဲ့ ရိုးတံနဲ့ ပန်းပွင့်ကို ချည်နှောင်ထားတယ်၊ တစ်ခုနဲ့တစ်ခု ဒွန်တွဲနေတယ်၊ ကျွန်မတို့ရဲ့ ဘဝကလည်း အဲဒီ သဘောတရားနဲ့ တူတယ်၊ ရိုးတံကို ပစ်ပယ်လို့လည်း မရဘူး”
“ပန်းပွင့်တွေမှာတောင် သူတို့နဲ့ လိုက်ဖက်ညီတဲ့ ရိုးတံတွေ ဖွဲ့စည်း ပေးထားတယ်၊ ကျွန်မတို့လည်း ဘဝမှာ လိုချင်တဲ့ အရာကို ရွေးချယ်ပြီး ပြတ်သားတဲ့ ဆုံးဖြတ်ချက်တွေ ချမှတ်ခဲ့ကြတယ်၊ ဘယ်သူကမှ အဲဒီဆုံးဖြတ်ချက်ကို မမှားချင်ကြဘူး၊ အိမ်ထောင်ကွဲ ဘဝကို ဘယ်သူမှ မရောက်ချင်ကြဘူး၊ ဘာကိုမှလည်း အဆုံးရှုံး မခံချင်ကြဘူး၊ အဲဒီ မဆုံးရှုံးချင်တဲ့ အရာကို ကာကွယ်ဖို့ နည်းတစ်နည်းတော့ လိုအပ်တယ်၊ အဲဒါကတော့ ကိုယ်စီရဲ့ ရင်ထဲမှာ ကိန်းအောင်းနေတဲ့ အရာတွေကို ပွင့်လင်းစွာ တိုင်ပင်ဆွေးနွေးဖို့ပဲ”
“အမယ် ပြောတာ လက်ခံတယ်၊ အသော်ကတော့ သူ့ကို အိမ်ထောင်ရေးမှာ သစ္စာမြဲမယ့်၊ လူ့ကျင့်ဝတ်နဲ့ ညီတဲ့သူ ဖြစ်စေချင်တယ်”
“အဇင်ကတော့ တစ်ခါတလေ တစ်ရေးနိုးရင် အားလုံးကို စွန့်ပြီး တရား အားထုတ်ချင်မိတယ်၊ တကယ်တမ်းကျတော့ ပါရမီဆိုတာ မပါသေးတော့ လူ့လောက စစ်ပွဲထဲမှာ နေနေရဦးမှာပဲ”
“ဒီလူ့လောက စစ်ပွဲထဲမှာ နေသရွေ့ ကိုယ် ရွေးချယ်တဲ့ ဘဝမှာ နေပျော်စရာ ဘဝတစ်ခု ဖြစ်အောင်၊ ကျေနပ်နိုင်အောင် နေရမှာပဲ၊ သိပ် မကြီးထွားသေးတဲ့ ပြဿနာကို ပြေလည်အောင် ဖြေရှင်းရမှာပဲ၊ ကျွန်မတို့ ပန်းပွင့်တွေ လှပဖို့ ရိုးတံဟာ ခိုင်ခံ့ဖို့ လိုအပ်တယ်”
“အမင်းကတော့ သူ မလုပ်ချင်တာ ဇွတ်မလုပ်ခိုင်းပါဘူး၊ ပြေလည်အောင် ညှိယူဖို့ စဉ်းစားထားတယ်”
“ကျွန်မကတော့ ဝတ္ထုအတွက် Plot တစ်ခုရပြီ”

ထိုနေ့ကတော့ ကျွန်မတို့အားလုံး စကားဝိုင်းလေး ရုပ်သိမ်းပြီးချိန်မှာ ထူးခြားစွာ ပို၍ လွတ်လပ်ပေါ့ပါး နေပါသည်။ ညရောက်တော့ စာရေးစားပွဲမှာ မထိုင်ဖြစ်တော့ဘဲ ကွန်ပျူတာ အခန်းထဲက ရိုဘော့စက်ရုပ်နား သွားရင်း ကော်ဖီတစ်ခွက် ချပေးတော့ သူ အံ့ဩသွားတယ်။ သူ့ဘေးနား ထိုင်ရင်း သူ့ရဲ့ ဒီဇိုင်းတွေကို ကျွန်မ ဝေဖန်ပေးတယ်။ သူက ကျွန်မကို အခြား လုပ်ထားတဲ့ ဒီဇိုင်းတွေ ထုတ်ပြတယ်။ သူ့ရဲ့ လှုပ်ရှားမှုနဲ့ စကားသံတွေက ပိုသွက်လက် လာတယ်။

“ကျွန်မ နောက်ထွက်မယ့် ဝတ္ထုမျက်နှာဖုံးပုံကို ဆွဲပေးရမယ်နော်” လို့ ပြောတော့ သူကအံ့ဩစွာ ခေါင်းစောင်းကြည့်ပြီး ရယ်မောရင်း …

“ခုတော့ … ကိုယ့်မိန်းမ ကိုယ့်ကို အသုံးလိုအပ် လာပြီပေါ့၊ အလှဆုံး ဖြစ်အောင် လုပ်ပေးရမှာပေါ့၊ ခေါင်းစဉ်က ဘာတဲ့လဲ”
“ရိုးတံနဲ့ ပန်းပွင့်”

သူ့နှုတ်ခမ်းက “ရိုးတံနဲ့ ပန်းပွင့်” လို့ လိုက်ရေရွတ် လိုက်တယ်။

ကျွန်မကလည်း “ရိုးတံနဲ့ ပန်းပွင့်” လို့ ပြောရင်း ခပ်နွေးနွေး ရယ်မောလိုက် ပါတော့တယ်။