So nyan Adam Kokesh?

Asai Gamba: http://www.star-telegram.com/news/state/article196616409.html

Lam padup uronyo Tuwanku Raja peurati bak steemit rame rakyat yang teungoh gabuk ngon Adam Kokesh. Na padup-padup dro rakyat yang dipeuget tulesan masalah @adamkokesh, nyan lapuran daripada intlejen Asam Sunti bak Tuwanku. Teuman so nyan @adamkokesh? Pu toke kereupuk, toke asam atawa toke beulacan? Nyan meunan ditanyeng bak Tuwanku le padup-padup dro rakyat steemit. Yang palo, Tuwanku pih golom na meurumpok ngon si Adam sampo ngon uronyo.

Sebab nyankeuh, Tuwanku parintah Panglima Intlejen Asam Sunti untuk jak pareksa so nyan Adam Kokesh. Pakon rakyat geutanyo deuh that gabuk keu Adam nyan. Padahai Adam nyan hana leumah gabuk keu geutanyo. Hana meutatupat gampong pih, pu di simpang brujuek atawa cot tameh brok. Hana jelaih lom bak Tuwanku.

Maka dijaklah Panglima Intlejen dijak pareksa ngon teknologi yang that canggih untuk dimita info so nyan Kokesh. Tuwanku na jok biaya bacut keu intlejen untuk jak po keudeh u nanggro kokesh. Maka dipo lah parte intlejen ngon dimeugantung bak aki geureuda nyan teungoh dipo ngon Malem Diwa.

Hase daripada lapuran Panglima intlejen oh lheuh diwo nakeuh meuno:

Nan aseuli si @adamkokesh nakeuh Adam Charles Kokesh. Gopnyan lahe di San Fransisco California bak thon 1982. Gopnyan meuphom bahasa Arab, sabab na geumeuruno side di Irak awai. Teungku Kokesh nyan nakeuh sidro aktiphih libertarian yang that anti keu sigala prang yang dipeugot le mamarika. Kokesh menurot info Asam Sunti na rencana dijak ek keu presiden Mamarika bak thon 2020. Dan si Kokesh na tuleh saboh buku yang diboh nan Freedom. Teungku Kokesh na rencana meunak ubah Mamarika bek le lage uronyo dan lage yang kaka. Kon ka neuteupu Mamarika nyan galak that jak peugot prang bak nanggro gop. Si Kokesh hana galak model-model preman meunan, parte preman lungkik dapu.

Asai Gamba: https://www.pinterest.com/liberty4rp/adam-kokesh/

Adam Kokesh na keuh sidro veteran prang Irak yang that anti keu prang. Kokesh dimengaku hana galak keu prang dan hantom dipoh ureung hana salah wate prang.

Bak thon 2007 Kokesh geujak proteh peukara prang Irak yang dipeubut le Mamarika. Wateenyan Kokes didrop le pasukan Keurajeun Mamarika yang hana galak proteh. Tapi adak pih didrop le pasukan keurajeun, Teungku Kokesh hana geupiyoh geusemurak dan geupidato untuk geupeusampo meukeusud gopnyan yang hana galak ke prang, sabab ngon prang nyan abeh mate ureung, abeh anco nanggro gop.

Kokesh na padup-padup ge geupeuget aksi proteh nyan di padup-padup boh teumpat di Mamarika, wateenyan sabe-sabe meuurusan ngon plisi keurajen Mamarika. Na padup-padup go demo sempat karu sampek plisi payah didrop @adamkokesh.

Bak saboh wate Kokesh na pernah sit didrop dan dipoh le plisi keurajeun sabab di meunari bak geudong Thomas Jefferson. Rupanya brat but awak keurajeun Mamarika nyan.

Salah saboh pikeran Adam Kokesh nakeuh dilake Pamarintah Federal nyan bek nak le, diyu toep keudeh ngon got-got, bek dawa-dawa.

Nyan sagai dile yang na laporan bak Tuwanku. Enteuk wate Tuwanku meurumpok langsong si Adam jeut Tuwanku calitra lom. Meunyo gata nak tuleh keu si Adam peugot laju hana masalah, hana so tham. Teuman bek sampe gabuk ngon si Adam katuwo jak Jumat.

Asai Gamba: https://twitter.com/adamkokesh/status/841748117917642752

Asai Aso:

https://thefreedomline.com/
https://en.wikipedia.org/wiki/Adam_Kokesh
https://www.mysanantonio.com/news/local/article/Libertarian-presidential-candidate-arrested-in-12507794.php
https://www.quora.com/What-do-you-think-about-Adam-Kokesh-from-the-Libertarian-Party
http://independentpoliticalreport.com/2017/09/adam-kokesh-the-new-libertarian-strategy/