#confessionsofmarriedwoman #share_ur_success #happy_marriage

قليل لما حد بيتكلم او يحكي تجربة جواز ناجحة وسعيدة ، طلبنا من ستات تشارك حكاية حب وجواز ناجحة عشان تنشر أمل في ظل المشاكل الكتيرة اللي بنشوفها حوالينا ودي أول قصة وان شاء الله مش الأخيرة😉
صوت مفتاحه في باب البيت بيخلي قلبي يدق زي العيلة المراهقة لوً شافت نجمها المفضل في الشارع و اخدت معاه صورة!
لما بنتقابل برة البيت روحي بتجري عليه اول ما اشوفه كأنها كانت غايبة و رجعتلي!!
الجواز مش نظام اجتماعي فاشل و لا هو شر لابد منه و لا سجن و لا مقبرة الحب!! الجواز ال انا اعرفه أحلي خبرة في الحياة!
القصة في اختياراتنا!
اخترت أكون مين و اخترت أتعهد العهد الأبدي دة لمين؟
من ١٠ سنين قاللي انه بيحبني!
كنت صغيرة و من كتر البيوت ال مليانة حزن و وجع كنت مرعوبة!
كنت متأكدة ان الارتباط دة سجن مظلم هيسرق اَي حاجة حلوة ممكن أعيشها!
كنّا صحاب، فاكرة كويس انه لما قاللي كدة طلبت ابقي لوحدي و انهارت في البكا و رفعت قلبي لربنا و حسّيت بذنب رهيب، ازاي سيبته يحبني و ايه مصيرنا دلوقتي؟
رجعتله بإجابة مضحكة جدا: خلينا صحاب أحسن
المضحك اكتر انه وافق 😂 (خلبوص - كان متأكد أني مش هقدر أقاوم او كان عارف أني بحبه بس مش قادرة أواجه نفسي)
فضلنا سنة كاملة نتعامل محترمين حدود أن مفيش بيننا اَي مشاريع ارتباط
كان كل واحد فينا بيكتشف نفسه و بيحدد رؤية حياته و بيخطط لمستقبله!
بس بصراحة الحب كمان كان عمال يزيد !أخلاقه و حبه الغير مشروط و اللي حتي مكانش فيه اَي أمل لأي حاجة خلاني أشوف حاجات كتير بشكل مختلف!
و فعلا مقدرتش أقاوم 😍😍 - الحب بهدلة برضك 🙊
اعترفت من غير اَي اقلام 😂
و ساعتها قررنا اننا ندرس بعض عشان نتخطب (اَي نعم - هنبدأ ندرس بعض من منظور غير الصداقة ال كان بقالها ٥ سنين ساعتها)
و بدأت رحلة التعلم عن كيفية اختيار الشريك و عن كيفية ان أنا شخصيا أتأهل أني أكون شريك و سند صالح و ناضج، رحلة نضوج لا تخلو من ألم مواجهات الماضي و مخاوف المستقبل!
و بعد شوية اتخطبنا و رحلة التعلم وسعت و اتخذت أعماق ابعد بكتير، كنّا بنذاكر بعض و نفسنا و طبيعة العهد الابدي للجواز اكتر من اَي حاجة تانية بنعملها - حوالي ٧ كورسات و ٥ كتب و ارشاد نفسي و خبرات ناس شوفنا تجربتهم ناجحة!
(بالمناسبة اتخطبنا لمدة سنتين - حاجة كدة دراسات عليا😂 و بصراحة يعني الفقر مش عيب برضه كنّا بنعافر عشان نعرف نغطي الاحتياجات المادية)
يوم فرحنا كنت لأول مرة في حياتي علي يقين اوي كدة من الاختيار و القرار أني اربط حياتي بيه علي الحلوة و المرة و لما ربنا يحاسبني بعد الحياة كمان يحاسبنا اننا واحد مش اتنين!
و لحد النهاردة انا قبل ما أفتح عيني باخد قرار أني بحبه بكل تفاصيله و هعمل كل حاجة تنفع عشان اوريله دة بالفعل مش بالكلام! و لما بفتح عيني بلاقيه يا اما بيبصلي بكل الحب ال في الدنيا يا اما نزل شغله و سايبلي وردة علي المخدة جابها من حوض الزرع ال عندنا بعد ما سقاه!
قابلنا و بنقابل و هنقابل تحديات كتير و حياتنا مكانتش سهلة خالص و لسة مش سهلة زي كل ال بيشقوا و بيصارعوا عشان يعيشوا بس احنا سوا سند لبعض و متفقين ان السند ميقفش عندنا! بنحاول نكون بنحب و نسند الناس ال بيعدوا ف حياتنا علي قد ما نقدر ف الحب يمتد و يكبر!
بنختلف ساعات بس باحترام و بحب حقيقي معلن في وسط الاختلاف، عشان كدة الاختلاف بيبقي مثري بدل ما يكون هدام!
بنتكلم و نتواصل طول الوقت عشان كدة فضلنا صحاب و بنهتم ننمي صداقتنا و ناخدها في أعماق أبعد فيها قدرنا نتعري وجدانيا فنتشارك في أدق أعماق الفكر و المشاعر و أرواحنا تتحد فعلا!
الجواز ال انا اعرفه شركة و اتحاد و عهد مقدس قدام الله بالحب علي الحلوة و المرة، الغني و الفقر، الصحة و المرض، سند و ثقة و عطاء غير مشروط.. نمو مستمر و تعلم مبيوقفش
مجهود كبير للخروج برة ذواتنا و كبريائنا
مسؤلية و وظيفة 24/7 عشان الحياة و شرها ميقدروش يهدوا البيت دة... مفاهيم متفق عليها مسبقا من الطرفين
كل دة مبيتقررش ف يوم و ليلة دة عاوز شغل بعد الضهر عشان أتأكد ان الشخص دة هو الصح ال هيكون قد الرحلة!
رحلة سعيدة 😊
#confessionsofmarriedwoman
#share_ur_success
#happy_marriage