ہم اور اردو

چچا غالب کا نام تو سنا ہو گا۔ جی ہاں وہی غالب جس کی
وجہ سے کبھی اردو کے پیپر میں پورے نمبر نہیں آئے۔ تو قصہ کچھ یوں ہے کہ کچھ دن پہلے سوشل میڈیا کی گلیوں میں پھرتے پھراتے ایک ریل سامنے آ گئی۔ کسی پوڈ کاسٹ کا کوئی کلپ تھا جس میں محترم عامر خان صاحب ( ارے وہی اپنے 3 ایڈیٹ والے بھائی) بیٹھے نانا پاٹیگر کا انٹرویو لے رہے تھے ۔ اب مہمان نے انٹرویو کی بجائے انٹرٹینمنٹ کا سوچا ۔ کہتے ہیں کہ غالب صاحب کا ایک شعر انہیں بہت پسند ہے

زندگی بھر آئینہ صاف کرتے رہے
دھول تو چہرے پہ تھی

شعر سن کر عامر خان ہاتھ پہ ہاتھ مار کہ کہتا ہے ارے باپ رے۔۔۔۔۔۔۔😎( شعرا کو داد دینے کا نیا طریقہ آیا ہے مارکیٹ میں)
میں نے بھی یہی سوچا ارے باپ رے، یہ کس ٹرک ڈرائیور کا شعر بھائی لوگ گالب صاحب کو چپکا رہے ہیں۔ لیکن خیر! عامر خان ایک کتاب دوست انسان ہیں اور اردو ان کی زبان نہیں ہے یہ تو ہماری زبان ہے۔ اب یہی ریل میں نے اپنے کئی دوستوں کو بھیجی۔ کچھ نے صرف دکھی سا ری ایکٹ کردیا کہ تمھارے تو غم ختم ہی نہیں ہوتے ،جو باقی رہ گئے انہوں نے تعزیت بھرے انداز میں تسلی بھی دی کہ کوئی نہیں زندگی ہے، ہوتا ہے۔ بات ہی ختم ۔
مگر کیا واقعی ہی بات ختم ہو گئی ۔ کیا یہی اردو کا مستقبل ہے ۔ میں نے کبھی غالب کو باقاعدہ نہیں پڑھا نہ ہی میں کوئی اردو کی کوئی بہت بڑی ڈیفنڈر ہوں مگر ایسا بھی اندھیر نہیں کہ یہی نہ پتا چلے کہ مرزا غالب کا شعر ہے یا پھر سڑک چھاپ شاعر کا ۔ اب تو جینریشن ذی نے باقاعدہ اردو کو ذلیل کرنے کا محاذ ہی کھول لیا ہے۔ اگر آپ نے کبھی سب ٹائٹل کے لیے لکھی اردو پڑھی ہو تو آپ کے چودہ طبق روشن ہوں جائیں گے۔
رہی سہی کسر ہمارے شعرا نے پوری کر رکھی ہے کہ اگ زبان بگڑ ہی رہی ہے تو معیار بھی برقرار گرنا چاہیے
تہذیب حافی صاحب فرماتے ہیں کہ

میں پاگل تو نہیں جو اس سے تنخواہ مانگوں
یہی کافی ہے کہ اس نے کام پر رکھا ہوا ہے

(😛چھوٹی سوچ ، تنخواہ تو لینی چاہیے)
ایک اور جگہ اپنی سالگرہ کا دکھ دوبالا کرتے ہوئے فرماتے ہیں کہ
تمھارے ہوتے ہوئے موم بتی بجھائی کسی اور نے
کیا خوشی رہ گئی جنم دن کی ،میں کیک کیا کاٹتا

یار اگر یہی لطیفے سننے ہیں تو مجھے بھی شاعر ہی سمجھو! ویسے آج کل یہ بیوروکریٹس میں بطور فیشن شاعر بننے کا کیڑا بھی پتہ نہیں کہاں سے گھسا ہوا ہے۔
ان کی شاعری کا معیار بھی وہی ہے جو ہماری بیوروکریسی کا ہے۔

بطور قوم ہم نے جو کچھ اپنی زبان کے ساتھ کیا ہے شاید یہی وجہ ہے کہ آج کہ دور میں کوئی فیض ، کوئی عصمت،کوئی انشا ، کوئی غلام عباس پیدا نہیں ہو گا۔ ابھی 2024 میں کوریا کی ہان کانگ نے اپنے ملک کے لے ادبیات میں پہلا نوبل پرائز جیتا ہے ۔
کیا کوئی امکان ہے کہ کبھی اردو ادب کے لیے ایسا موقع آئے گا ۔ تو جواب ہے "کم از کم مستقبل قریب میں تو یہ ممکن نہیں"۔
کیوں ؟
کیوں کہ جس معیار کی اردو ہمارے تعلیمی اداروں میں پڑھائی جا رہی ہے اور جس طرح سے اردو پڑھائی جا رہی اس کو دیکھ کہ نہیں لگتا کہ کوئی ایسی جرات کرے گا۔
پاکستان میں سول سروسز کے امتحانات انگریزی میں ہوتے ہیں ان پہ بہت دفعہ بحث ہوتی ہے کہ اردومیں لیے جائیں ۔ تو دو سال پہلے سی ایس ایس کیلیے پی-ایم-ٹی شروع کیا گیا جس میں اردو کا ضروری حصہ شامل ہے اب خدا جھوٹ نہ بلوائے میں نے ٹیسٹ دینے والے مجاہدین کو کانوں کو ہاتھ لگا کر اپنے گناہوں کہ معافی مانگتے دیکھا ہے۔ وہ اس بات پہ تو راضی ہیں کہ بیشک پیپر اس انگریزی میں آ جائے جو اب انگریز بھی بولنے چھوڑ چکے ہیں مگر ہمارے اردو کے مرحوم مصنفین کو زحمت نہ ہی دی جائے اور اگر ممکن ہو تو ہر مصنف کے قبر کہ پاس اس کی تخلیقات کو بھی دفن کرنے کی گنجائش نکالی جائے۔
اور اردو سے اس محبت کی وجہ بلاشبہ ہمارے ہمارے اساتذہ کرام ہیں۔ مجھے یاد ہے کہ ایف ایس سی میں اردو کی لیکچرار نے ہر غزل کو زبردستی عشق حقیقی سے اس طرح جوڑ کر دیکھایا تھا کہ مرحوم شاعر بھی سن کر داد دیتے کہ ارے باپ رے😖 یہ تو ان کے گمان میں بھی نہیں تھا ۔ اور پھر ایک شعر ایسا کہ

آہ کو چاہیے اک عمر اثر ہونے تک
کون جیتا ہے تیری زلف کے سر ہونے تک

کلاس اس انتظار میں تھی کہ اب کوئی معجزہ ہی اس شعر کو عشق حقیقی کی منزل پہ پہنچا سکتا ہے۔ مگر سامنے بھی استاد تھا کہہ دیا کہ یہ شعر امتحان میں آنا ہی نہیں ہے ۔اور آپ نے اتنا علم حاصل کر کہ کیا کرنا ہے
ہاں جی کیا کرنا تھا ہم نے ۔۔۔۔!
کوئی نوبل پرائز تھوڑی نہ لے لینا تھا ۔
تحریر کی دم
میں کوئی سکالر نہیں ، تو بیشک میری اردو کی بھی غلطیاں نکال لیں
میں نے اردو میں کچھ لفظ انگریزی کے بھی لکھے ہیں کیوں کہ مجھے لگتا ہے کہ اردو اک لشکری زبان ہونےکی وجہ سے اپنے اندر الفاظ کو سمونے کی صلاحیت رکھتی ہے۔اور ہاں رومن بھی اردو لکھنے کا اچھا طریقہ ہے کیوں کہ اس طرح سے یہ زیادہ لوگوں کی سمجھ میں آتی ہے
مقصد صرف یہ ہے کہ کم از کم جو اردو بولی اور لکھی جائے وہ تو درست ہو۔
آپ بیشک سندھی ، پشتو ، پنجابی بلوچی ، بولیں یا انگلش ، اٹالین فرنچ سیکھ لیں اور چاہے آپ کا عشق فارسی اور عربی تک بھی پہنچ جائے لیکن اگر آپ اس بات میں دلچسپی رکھتے ہیں کہ بطور قوم ہماری شناخت باقی رہے تو اردو کے علاوہ کوئی چارہ نہیں۔
اور بحثیت قوم ہمیں اپنی زبان کو اپنانا ہی ہوگا کیوں کھوکھلی جڑوں والے درخت زیادہ دیر نہیں ٹک پاتے۔

!کچھ کہو۔۔۔۔۔ @aminasafdar !