#club5050 || The diary game: 14.11.2021 / Ağac səbiri öyrədir.

Ağac haqqında o qədər atalar sözləri və deyimlər var ki, hamısı da düşündürücüdür. Viktor Hüqo daha içdən, daha dərindən yanaşıb ağac olayına. Yazıb ki, "Məhəbbət ağac kimidir: öz-özünə bitərək, varlığımızın ən dərin qatlarına kök atır və bəzən ürəyimizin xarabalığında da çiçəkləyib yaşamaqda davam edir".
Dünən bağçamızdakı ağacların qol-budaqlarını kəsdilər. Daha doğrusu, budadılar.

Biz də yuxarıdan seyr edirdik. Bu, mətbəx pəncərəmizdən olan görüntüdür.

Mütəxəssislərə görə, "Ağaclarda vegetasiya dövrü başa çatdıqdan, yəni yarpaqlar saralıb töküləndən sonra payız, qış və erkən yaz dövründə budanma aparılmalıdır. Budanma ağacın növündən, yaşından asılı olaraq aparılır. Əgər ağacın yaşı çoxdursa, budanma cavanlaşdırma məqsədi daşıyır. Bunun üçün ağacın çətirinin forması saxlanılmaqla gövdənin baş hissəsindən, əsasən isə xəstə, quru, qurumaqda olan və həşəratlarla sirayətlənmiş budaqların kəsilməsinə önəm verilməlidir. Kəsilmiş hissələrə isə xüsusi hazırlanmış ağac boyası sürtülməlidir".

Düzü bilmirəm, bağçamızda ağacların hamısının canına oxuyan o bağbanlar yuxarıda yazılanlara nə dərəcədə dəqiq əməl etdilər, nəticə bu oldu ki, yayda bizə xeyli kölgə salan iki böyük ağacımız lüt-üryan qaldı)

Yuxarıdan kəsilən qol-budaqlara baxıb üzülsək də, ətraf yığışdırılıqdan və bağbanlar öz maşınları ilə getdikdən sonra bağçamız xeyli gözəlləşdi və daha səliqəli göründü. Ürəyimdə dedim, boşuna üzülmüşük burda) Adamlar işlərini görüblər.

Belə, dostlar. Yazımın başında Hüqodan sitat gətirmişdim. Əslində, "Qadının üç yaş dövrü" romanımda Həyat ağacı haqqında özüm də yazmışam. İntəhası uzundur. Sizi yormayım)
Migel de Servantesin sitatı ilə bitirim)
Yazıb ki, "Yaxşı bir ağaca sarılan kölgəsiz qalmaz".
Biz də Steemit ağacına sarılmışıq. Steemitlə qalın. Kölgəsiz qalmayın)