Ağacda qalanlar.

Salam, axşamınız xeyir. Güman eləyirəm ki, hamınız yaxşısınız. Bu gün məktəbə gedib gələndə yolda rastlaşdığım ağaclarda tənha qalan meyvələri çəkmişəm. Bilmirəm buna meyvə demək olar ya yox)

Son vaxtlar dərin mövzulara girmək heç içimdən gəlmir. Dahilər də girməməyi tövsiyə edirlər. Hər şeyin fərqində olmağın bir xəstəlik dərəcəsində özəllik olduğunu keçən dəfə də yazmışdım. Elə çiçəkdən, böcəkdən yazsa yaxşıdı adam. Alim alim mülahizələr yürüdürük ha, insanlara ağıllı ağıllı tövsiyələr veririk ha, onların heç birinə özümüz əməl eləmirik. Bu arada tövsiyə sözü də bir y hərfi ilə yazılır. Bunu da nəzərdə saxlamağınızı tövsiyə edirəm)
Dekabrın sonu çatdıqca sosial şəbəkələrdə yeni ili qeyd etmək və ya etməmək mövzusunda mübahisələr qızışır. Hər kəs buna öz baxış bucağından yanaşır. Mənə qalırsa, mənim bayramlara subyektiv yanaşmam var, Yeni il bayramı da istisna deyil. Bayramlar mənim nəzərimdə mənasız nəsnələrdi. İnsanın özünü rahat, hüzur içində, sağlıqlı hiss etdiyi hər gün bayramdı. Bu qədər bəsit. Yeni il stoliçnı salat bayramıdı. Qızlarım sevir, mən də sevə sevə hazırlayıram. Guya postumu ağacda qalan meyvələrə həsr etmişdim.

Qonşunun bağındadı. Doqqazdan keçib ağaca yüngülcə toxundum. Ölümünə yetişmişdi. O saat düşdü. İndi qoymuşam evə. Ətri 100 metrə yayılıb desəm yalan olmaz)

Bu da ağacda qalan almadı. Bircə dənə qalıb. Onu dərmədim. Sərçələrin ruzisidi o.

Bu qədər. Çalışın, yaxşı olun.
@nurengizbagirova