Haydan gəlib huya gedirdim...

Salam. Yaxşısınızmı? Yaxşı olun hər zaman.
İnsan həyatı ağ və qara rəngdən ibarətdi. Bəzən frekanslar qarışır. Ağ günə çıxmaq deyirsən, ağ adamlar deyirsən, "üzün ağ olsun" , - deyirsən. Müsbət deyirsən yəni. Ağa gözəl şeyləri yaraşdırırsan. Ordan bir ağ yalan çıxır. Yalanın ağ rənglə nə əlaqəsi. Düşünürsən, bu işin içindən çıxa bilmirsən. Hə, bir də üzünə ağ olmaq ifadəsi var. Dediyim o ki, o gözəlim ağın da üzüqara çalarları, mənaları var.

Bəs qara necə? Qaragünlü, qara - qara düşünmək, qəlbiqara adamlar, bəxti qara. Bütün bunların içində qaradan başqa rəng yoxdu ifadəsi. Şair deyir ki, hər kişinin öləndən sonra qəbrinin üstündə ağlamağa qara paltarlı bir gözəl qadına ümidi var. Qara qara düşünəndə çox şey gəlir insanın ağlına. Çox şeyin fərqində olmaq çox böyük bədbəxtçilikdi.

Bu yazımda niyyəti qəbahət axtarmaqda olanlar haqqında da nəsə yazacaqdım. Amma nə yazacaqdımsa yadıma sala bilmirəm. Yəqin qəlbimin dərinliyində o niyyəti qəbahət axtarmaq olanlara haqq qazandıran nyuanslar axtarmaqla məşğulam. Mazoxistliyim də var , nə yalan söyləyim.

İşıqlı insanlar çıxsın qarşınıza. Adının baş hərfi belə üzünüzdə təbəssümün xəritəsini çəkən insanlar. Qarası yalnız paltarında, saçında olub, qəlbi dünya boyda olan insanlar. Sizə tənhalığı, yalnızlığı sevdirməyən insanlar.
@nurengizbagirova