උසාවියෙන් කතාවක්

මේ සිද්ධිය උනේ මං දිවුරුම් දීල ජ්‍යෙෂ්ඨ නීතිඥවරියක් ළඟ පුහුණු වෙන කාලෙ.

මගේ ජ්‍යෙෂ්ඨ නීතිඥවරිය ඒ දවස්වල හුඟක් නඩු වලට පෙනී ඉන්න මාව තමයි උසාවියට යවන්නෙ. ඔයා යන්න නඩුව ගන්න කලින් මං එනව කියල.

මං දොර දිහාම බලන් ඉන්නව දැන් එයිනෙ කියල. අන්තිමේ නඩුව කැඳවනව. මං ඉතින් කොහොමහරි නැගිටල නඩුවට පෙනී ඉන්නව. මාව පුරුදු කරන්න වෙන්න ඇති එහෙම කළේ. ඒත් මං මුල්ම දවස් වල බොහොම බයෙන් තමයි තනියෙන් නඩු වලට නැගිට්ටෙ. මොකද ඒ දවස්වල හිටපු විනිසුරුතුමත් අළුතෙන් එන නීතිඥයන්ගෙන් පනත් ගැන වගන්ති ගැන ප්‍රශ්න එහෙම අහනව.

මට එදා නඩත්තු නඩුවක ඉල්ලුම්කාරිය වෙනුවෙන් පෙනී ඉන්න තිබුණ. ඒ නඩුව උසාවියෙ කැඳවන දෙවෙනි දවස. ඒ කියන්නෙ වගඋත්තරකාරයට නොතීසි එහෙම යවල ඔහුත් අධිකරණයේ පෙනී සිටීමට නියමිතයි.

ඒ නඩුවෙ පැමිණිල්ල කෙටුම්පත් කළේ මම උනත් මං ඉල්ලුම්කාරිය එක්ක පෞද්ගලිකව කතා කරල තිබුණෙ නෑ. එයා ලස්සන අහිංසක දෙමළ ගෑණු ළමයෙක්.. අවුරුදු තුනක විතර පුංචි බබෙක් එක්ක ආවත් මට වඩා අවුරුදු තුනක්වත් බාල ඇති කියල දැක්ක ගමන් මට හිතුණ . ඉතින් මං උසාවියට යන්න කලින් ඔෆිස් එකේදිම ඉල්ලුම්කාරියගෙන් විස්තර ඇහුවෙ විනිසුරුතුමා අහනකොට කියන්න හැමදේම දැනගෙන ඉන්න ඕනි නිසා..

පදිංචිය ගැන, වගඋත්තරකාරයගෙ ආදායම රස්සාව ගැන, බබා ගැන විස්තර අහල මං ඇහුව ඔයා අවම වශයෙන් කීයක් විතර බලාපොරොත්තු වෙනවද කියල.

"මට සල්ලි ඕනි නෑ මැඩම්..මට එයාව තමයි ඕනි" ඒ ගෑණු ළමය බබා දිහා බලාගෙන කැඩිච්ච සිංහලෙන් කියද්දි මට පුදුම හිතුණ.

නඩත්තු නඩුවෙන් මුදල් ඉල්ලීමක් කරාට එයා කැමති නම් ආපහු එකතු වෙන්න කිසිම බාධාවක් නෑ කියල මං එයාට කිව්ව. එයාගෙ හස්බන්ඩ් අද ආවොත් මං පවුල් උපදේශනයට ඉල්ලන්නම් කියලත් කිව්ව.

"එයාට වෙන කෙනෙක් ඉන්නව මැඩම්. මං මේ දරුවටත් වඩා එයාට තමයි ආදරේ උනේ මැඩම්.."

එයා කඳුලු පිහදගෙන ටිකක් වෙලා යනකම් මං ආයෙ කතා කළේ නෑ.

කොහොමහරි වගඋත්තරකාරය උසාවියට ඇවිත් හිටියෙ නෑ. ඒ වෙනුවට වගඋත්තරකාරය ඔහුගෙ පියා අතේ රුපියල් පන්දාහක් එවල තිබුණ. මාසයක් ගානෙ පන්දාහ ගානෙ දරුවට විතරක් ගෙවන්න කැමතියි කිව්ව.. ඉල්ලුම්කාරිය ඒ මුදලට එකඟ උන නිසා සහ පසුවට අවශ්‍යතා වැඩි වන විට මුදල වැඩිකරගැනීමේ ඉල්ලීමක් කළ හැකි නිසා ඒ මුදලට එකඟ බව මං අධිකරණයට දන්වා සිටියා.

නඩු ඉවරවෙලා මං ඔෆිස් එකට යද්දි ඇය හිටිය. "එයා ආවෙ නෑනෙ මැඩම්.. ඊළඟ දවසෙ එයි නේද"

එයා ඔෆිස් එකෙන් ගියාට පස්සෙ මං කල්පනා කළේ එයා උසාවි ආවෙ නඩත්තු සල්ලි ගන්න නෙවෙයි, එයාව දාල ගිය ආදරවන්තයගෙ මූණ බලල යන්න වෙන්න ඇති කියල.

Source