දිය යට සැඟවුණු කඩදොර

මේ කියන්න යන්නෙ ගොඩක් දුර ගමනක් ගැන නම් නෙවෙයි. කොත්මලේට ගිය ගමනක් ගැන. කොත්මලේ කියන්නෙ අපේ ඉතිහාසය එක්ක ලොකු සම්බන්ධයක් තියෙන ප්‍රදේශයක්. ඒ ගැනත් හොයල බලන්න.

මේ තියෙන්නෙ කොත්මලේ ජලාශය. අහලත් ඇති සමහරවිට දැකලත් ඇති. ගාමිණී දිසානායක අමාත්‍යවරයාගේ මහවැලි සංවර්ධන ව්‍යාපෘතියක් විදිහට මේ ජලාශය ඉදිකරද්දි ගොඩක් ගම් බිම් වතුරට යටවුණා කියනවනෙ. මේ පැත්තෙ මිනිස්සු අවුරුදු ගාණක් ජීවත් වුණු ගෙවල් දොරවල් අත්ඇරලා රටේ සංවර්ධනය වෙනුවෙන් ඈත දිහාවල යන්න වුනාලු. පුරාණ පන්සල් කීපෙකට පවා ඒ ඉරණම අත්වුණාලු. තමන් ඉපදුණු හැදුණු වැඩුණු ගෙවල් දොරවල්, වැඳුම් පිදුම් කරපු පන්සල් වතුරට යටවෙද්දි ඒ මිනිස්සුන්ට මොනව හිතෙන්න ඇති ද...

ඉතින් අපි හදිස්සියෙ මේ ගමන යන්න තීරණය කළේ මේ දවස්වල පෑවිල්ලට ඒ විදියට සම්පූර්ණයෙන්ම යටවෙලා ගියා කියන පන්සලක් මතුවෙලා කියන ආරංචියට. ඇත්තටම අවුරුදු කීපෙකට සැරයක් ලොකු පෑවිල්ලක් ආවම ඒ පන්සල උඩට මතුවෙලා තිබුණත් කවදාවත් බලන්න යන්න නම් ඉඩක් ලැබුණෙ නෑ. අපි හවස පිටත් වුණේ ඉර බැහැගෙන යනකම් ඉඳලා ලස්සන ෆොටෝ ටිකක් එහෙම අරන් එන්න.

ඒත් එතනට ගියා ගමන් හිතට ලොකු දුකක් දැනුණ. අවුරුදු තිස් ගානක් තිස්සෙ වතුරෙන් යට තියෙන හැමදාම වැඳුම් පිදුම් ලබපු බුදු පිළිමයක්.. නටඹුන් වෙලා තියෙන ගරා වැටුණු විහාර මන්දිරයක්...බලන්න එන මිනිස්සු මල් තියල පහන් පත්තු කරල තිබුණ. තව අවුරුදු කීපෙකින් එතන බලන්න දෙයක් ඉතුරු වෙන එකක් නෑ කියල දැනෙද්දි හිතට ලොකු රිදුමක් දැනුණ.

එතන හිටපු සෙනගයි හදිස්සියෙම ආපු වැස්සකුයි අපිට ෆොටෝ ගන්න නම් ලොකු ඉඩක් දුන්නෙ නෑ.

පිස්සු කන්න නම් කළේ පාඩුවෙ වතුරට ගල් ගහපු එක.

කොත්මලේ ජලාශයට යටවුණු වෙහෙර විහාර වෙනුවෙන් කොත්මලේ ජලාශයට ටිකක් ඉහළින් විශාල දාගැබක් ඉදිකරලා තියෙනව. ඒ මහවැලි මහා සෑය. ඒ දාගැබ ඇතුලට ගියාම හිතට දැනෙන්නෙ හරිම අමුතු හැඟීමක්. හිත හිස් වෙලා යන නිදහසක්. අපි යද්දි කවුරුත් හිටියෙ නෑ. රෑ නිසා. මල් පූජා කරල හිත සැහැල්ලු කරගෙන එන්න ආව.