His Christmas and her Christmas! | 5% to SL-Charity

නත්තල කියන්නෙ හරි ලස්සන ආගමික උත්සවයක්නෙ. දැන් මෙහෙම හිටියට මමත් පුංචි කාලෙ මට පුළුවන් විදිහට නත්තල් ගස්, ගවලෙන් හදපු කෙනෙක් තමයි. ඒ විතරක් නෙවෙයි ඒ කාලෙ ටීවි එකේ ගිය නත්තල් කතා, කාටුන් සේරම බලපු කෙනෙක්. ඒ හැම කතාවකම තිබුණෙ නැතිබැරි අයට උදව් කරන එක, වැඩිහිටියන්ට සලකන එක, බෙදා හදා ගන්න එක වගේ උතුම් මිනිස් ගුණාංග. ඉතින් ආගම මොකක් උනත් අපි නත්තලට ආදරෙයි.

විශ්වට ආරාධනාවක් ලැබිල තිබුණ නත්තල තේමාව කරගෙන ෆොටෝෂූට් එකක් කරන්න. ඇත්තටම ඒක බතික් ඇඳුම් නිර්මාණය කරන මල්ලි කෙනෙක් එක්ක තමයි සැලසුම් කරල තිබුණෙ. හොඳ නරක කියන එක ඇරෙන්න මං නම් කිසිම සහයෝගයක් දුන්නෙ නෑ. හැබැයි එයාලගෙ මහන්සිය අපතේ ගිහින් තිබුණෙ නෑ.

Source

ඔය අස්සෙ පිස්සු කන්නට නත්තල් ගහක් ඕනි උනා. මං එයාට කොළ පාට කොළේකින් නත්තල් ගහක් හදල ඒකෙ අලවන්න පාට පාට තරු තියෙන ස්ටිකර් කාඩ් එකකුත් ගෙනත් දුන්න. එයා ඒක දැක්ක ගමන් ගොඩක් සතුටු උනත් පස්සෙ මට තේරුණා ඒක එයා අතින් බිම වැටෙනව එහෙම වැඩි කියල.

"තාත්ත ලස්සන ලොකු නත්තල් ගහක් හදල දෙයි නේද පුංචි.. මේක නම් එච්චර හරියන්නෑ.." පිස්සු කන්න කටත් ඇද කරල කිව්ව.

මං බොරුවට දුක හිතුණ වගේ හිටිය.

"නෑ නෑ මේකත් ලස්සනයි. අපි මේක තාත්ත හදන ගහේ එල්ලමු.." ඕව කියන්නෙ මගේ හිත හැදෙන්න වෙන්න ඇති. අපි නං අහුවෙයි.

කොහොමහරි පිස්සු කන්න තාත්තට කියල නත්තල් ගහක් හදාගෙන තිබුණ. ලොකුවට නෙවෙයි.. පිස්සු කන්නගෙ හිතට හරියන තරමට..එයා ඒක වටේ කෑ ගගහ නටන තරමට...මං හදල දීපු කඩදාසි ගහත් ඒකෙ එල්ලල තිබුණ.

"අපි මේක ගොඩාක් කල් වතුර දදා තියාගමු පුංචී.." පිස්සු කන්න ආසාවෙන් කිව්ව. දැනටමත් වේලිලා තිබුණ උණ පඳුරෙ අත්තක් දිහා බලල මං හිනාවුණා.