සත්තමයි වෙන කවුරුවත් නෑ, අපිට මිස් නිල් අහස් කුස හැර....

කකුල් දෙක කකියන තුරාවට
ඇවිදලා හැම ගෙයක් ගානෙම
මහපු පාපිසි දෙකක් සියයට
දෙන එකයි මිස් මගේ ජොබ් එක
දවසේම හාමතේ දුවලා
මහ රෑට කිරි එරෙන්නැති කොට
හඳෙන් ගෙන ආ පැනියි කියලයි
හාල් කැඳ ටික පෙව්වෙ ඕකට

පොතට බඩු දී අතින් අල්ලන
හන්දියේ මුදලාලියා ඇර
එන්න දුන්නෑ පන්සලටවත්
ගමේ උන් අඩු කුලේ කිය කිය
තනියෙන්ම පොඩි එකා ඉද්දි
සරුංගල් උඩ යනවා බල බල
හඳේ හාවයි ඌට හිටියේ
එකතු වී වැලි බත් උයන්නට

තහඩු ගැලවුණු වහලෙ පහළින්
තියෙන උගේ අප්පගේ ලෙඩ ඇද
එහා කොනටම ඇදිය යුතුමයි
වැස්ස දාකට තෙමෙන්නට පෙර
තාත්තට ඌ ගොඩක් කාලයි
ඒක හින්දම ගොරවනා හඬ
ඇහෙනකොට වූ ඉවෙන් දන්නවා
වැස්සේ සැර කීයටද යන වග

කඩන් වැටෙනා තරුවකට හරි
කිව්වොතින් මේ අපි විඳින දුක
සතුට ඒවි පුතේ අපිටත්
ඌට දවසක කිව්වනේ මම
පන්තියේ ඌ උඩ බලාගෙන
ඉඳී නම් ඔය කියන විදියට
වල්ග තරුවක් හොයනවා ඇති
නිමක් නැති හිස් අහස බලබල

ජාති ආගම් කුලය දුප්පත්
බැමි වලින් බැඳ තබා හිරකර
අම්මේ අපි තනියෙන්ම තියලා
මොකද මේ ලෝකයෙන් වෙන්කර
ඉතින් අඟහරු ලෝකෙ ගැන ඌ
මිසී එක්කල කියපු විස්තර
මාත් එක්කත් කියලා තියෙනවා
අම්මේ අපි එහේ යමුයි කිය කිය

අහස ඉර හඳ වළාකුළු තරු
තවත් වෙන වෙන ලෝකවල් ගැන
කොල්ලා ඇයි වැඩිපුර දොඩන්නේ
හේතු ඩිංගක් තමයි මිස් ඔය
ලෝකයෙන් අපි කොන් කරද්දී
බෙදාගන්නට අපේ දුක සැප
සත්තමයි වෙන කවුරුවත් නෑ
අපිට මිස් නිල් අහස් කුර උස හැර