පුතේ අම්මට පිස්සු හැදිලා....

එකම විදිහට මාස ගාණක්
ඔයා සතිඅග එයිම හිතලා
දෙකට විතරම පාන්දර මහ
උයනවා ඇය නැගිටලා
මිඳුල් අතුගා ගෙවල් හෝදන්
නුබේ රෙදිටික තියනවා
මලුත් කඩලා වැඳන් බුදුනුත්
පේවෙලා මඟ බලනවා
....................................................
උදේ හත අට වෙද්දි මුහුණත්
පුලුටු කරගෙන මා දිහා
පුතේ බලබල උන්නෙ හිතකින්
නෙවෙයි ඈනම් ඉවසලා
දොලහ පහුවෙන විටදි ඇඳුමක්
දමන් යන්තම් සැරසිලා
පාර අයිනට ගිහින් එනකල්
ඉන්නවා ඇගෙ හුරතලා
.....................................................
හවස හත අට වෙද්දි හිමිහිට
ගාටලා ඈ ගේ දිහා
ටෝච් එකගෙන ආයෙ පාරට
යන්නෙ ඒවිම හිත හිතා
ෆෝන් වැඩනැති නිසා කලබල
වෙලා කඳුලුත් හල හලා
බැරිම තැන ඇය නින්දෙ වැටුනෙම
නොකා පුටුවේ ඇලවෙලා
.....................................................
පුතේ පාසල් යද්දි මතකයි
කෑම රස්නෙට ඕනෙ කියලා
අතේ අරගෙන දවල් උයලයි
දුන්නෙ ගෙනිහින් පයින් අම්මා
ඉහේ තියලයි උඹව හැදුවේ
රත්තරං මගෙ පනේ කියලා
හිතේ ඇතිනේ හුඟක් දේවල්
ඒකමයි ඔය උන්නෙ බලලා
.....................................................
කෝල් ගන්නෑ වැඩිය දැන්නම්
ලේලි අරගෙන තියයි බැනලා
නුඹට නම් නෑ අපිට කොහොමත්
කවුද ඉන්නේ නුඹව නැතිදා
එකයි කියලා සෙනෙහෙ දුන්නත්
කමක් නෑ නුඹ හිතින් හැරලා
" පුතේ එන්නට ඕනෙ නෑ මෙහෙ
හිතන්නෑ දැන් අම්මා ඕවා ,,
.......................................................

කමුද ඇහුව්වම හිනා වෙනවා
හිනාවෙද්දී අඬනවා
යමුද කිව්වම ඔහේ යනවා
අල්ල ගන්නේ පන්නලා
හිතට දුකමයි ඒත් කම්නෑ
මේක දැන්මට හුරුවෙලා

"ආයෙ එන්නට ඕනෙ නෑ නුඹ
පුතේ අම්මට පිස්සු හැදිලා ,, 😥
......................................................

මොනව ගැන පසුතැවීමක් ඉතිරිවුනත්
කවදාවත් අම්ම තාත්තට බලන්න බැරුවුනා කියන පසුතැවීම නම් ,,
ජීවිතේට එකතුකරගන්න එපා.

මේ ලෝකෙ වැඩියෙන්ම අපිට ආදරේ ,,
අම්මයි තාත්තයි .🙏