නීවරණ

නිසලය හරිත වන අරණ
පත් ගිලිහෙන ඉසියුම් නද පමණ
බිඳ බරැති බලගතු නිහඬතාව
අවුළුවනු වස්
බුද්ධාලම්භන ප්‍රීතිය
අරඹමි නමස්කාරය

නමෝතස්ස භගවතෝ අරහතෝ.....

පිහිටුවා පන්සිල්හි
සිල්වතුන් රුක්ඛ මූලගත
විවර කර බලමි නෙතු පියන්
සීරුවෙන් හාත්පස

සියල් ශ්වේත වස්ත්‍රධාරීන'තර
රන් වනින් දුලන වුවනතකි
ඈත කොසඹ තුර සෙවණෙහි
මේ දැන් නිකළැල් පෙති විහිදූ
පොහොට්ටුවක අසිරි මවන
ලා රත් පැහැ
මන්දස්මිතයක් ද ඒ

සුපුරුදු කමටහන දෙමි
ම'හඬට පමණක් පටිච්ඡව
අන් සිතිවිලි ද අවට නෙක හඬ ද
අත් හරිනුව
නාසිකා අග්‍රයෙහි ගැටෙන
සුළං රැල්ල පමණක්
විමසනුව

ආන අපාන
ආන අපාන
ආන අපාන
..................
..................
..................
අහෝ සිත නොඑළඹේ
කිසිදු සමාධියකට අද
මග අහුරණ
නීවරණයකි ඒ

එහෙත්......
අහා ඒ රුව
නොසෙල්වේ බිඳකුදු
මවෙතින් පලාගිය සමාධිය ඇය අස

source of image: drtorresseaton.com

--- චාම්---