අකුරු නොලියන කඩදාසි | Origami | 5% for SL Charity

කොරෝනා නිසා ගෙදරට වෙලා හරිම ඒකාකාරී විදියට ඉන්නකොට අපිට වගේම අපේ මොලෙත් හැමතිස්සෙම වෙනසක් හොයනව. මම ඔරිගාමි කලාව ඉගෙනගන්න පටන් ගත්තෙත් එහෙමයි. ඇදට වෙලා Youtube එකේ උඩ පහල යනකොට නිකමට Origami tutorial එකක් දැක්ක. වැඩේ එච්චර අමාරුත් නෑ වගෙ.

මම ආසම චරිතයක් තමයි Prison Break කතා මාලාවෙ Michael Scofield. ඉතින් මටත් මුලින්ම ඕන කලේ එයා හදනව වගේ හංසයෙක් හදන්න.

වීඩියෝ බලාගෙන යද්දි මම දැක්ක ලස්සන හංසයෙක් හදන විදිය තියනව. ඒක නම් ටිකක් සංකීර්ණ වැඩියි වගේ පලවෙනි උත්සාහයට. ඕන එකක් වෙන්න කියල මමත් පටන් ගත්ත ඒකෙන්ම. ඉතාම පරිස්සමෙන් පියවරෙන් පියවර කරගෙන ගියා. නැවුමක් වැරදුනොත් ඒක සමහරවිට මුළු නිර්මාණයටම බලපාන්න පුළුවන්.

අන්තිමට කොහොමහරි හදල ඉවර කලා. ඒක හරි අපූරුවට ආවා. තව රූප කීපයක් හදන්න මම වීඩියෝ save කරගත්ත. ඇත්තටම සැලකිය යුතු කාලයක් යනව ඒකට. Origami කියන නම නැතුවට අපි පොඩි කාලෙ රොකට්, බෝට්ටු හදල සෙල්ලම් කලානෙ. හරියට බැලුවම ඒවත් origami තමයි.

Origami swan Tutorial

Origami කියන්නෙ ඉතාම රසවත් කලාවක්. ළමයින්ට කුඩාකල සිටම මෙම කලාව ඉගෙනගැනීමෙන් ඉවසීම, නිර්මාණශීලී හැකියාව, පිලිවෙලට වැඩකිරීම, තරහ පාලනය සහ ඒකාග්‍රතාව වැඩිවෙන බව පරීක්ෂණ මගින් හොයාගෙන තියනව. මම දැකල තියනව ඇතැම් හිරගෙවල්වල සිරකරුවන්ට පවා මෙම කලාව උගන්වනව.

Origami Butterfly Tutorial

මම කුතුහලය නිසාම origami කලාවෙ ඉතිහාසය ගැනත් පොඩ්ඩක් හොයල බැලුව. Origami කියන්නෙ ජපන් වචනයක්. එය orikata යන වචනයෙන් බිදී ආ වචනයක්. එහි තේරුම නවන ලද හැඩතල (folded shapes) යන්නයි. ජපන් භික්ෂූන් විවිධ ආගමික කටයුතු සදහා origami නිර්මාණ යොදාගත් බව පැවසෙනව. තවත් එක් වෙනස් මතයකුත් මේ අතර තියනව. මුලින්ම කඩදාසි සොයා ගත්තෙ චීන ජාතිකයන් නිසා origami යන වචනයෙන් නැති උනත් කඩදාසි නැමීමේ කලාවේ උපත චීනයේ සිදු වූ බව එම මතයයි.

කෙසේ වෙතත් කඩදාසිය ඉරීමකින් තොරව සිදුකරන මෙම origami නිර්මාණ කාලයෙන් කාලයට වර්ධනය වෙලා ඉතාමත් ලස්සන කලාවක් බවට පත් වෙලා තියනව. ඒ වගේම මෙම කලාව ඕන කෙනෙක්ට ඉගෙනගන්නත් දැන් හරිම ලේසියි. මම ආරාධනා කරනව හැමෝටම, මේක ඉගෙනගත යුතුම කලාවක් කියල.