මල්ලිගෙ චෙස්

ඊයෙ සදුදා දවසක් උනත්, සෙනසුරාදා ඉරිදා දෙකේම විශේෂ නිවාඩු දෙකක් තිබුන නිසා ඒ වෙනුවෙන් අපිට නිවාඩුවක් ලැබුනා.

අමතර නිවාඩුවක් නිසා මම විශේෂ වැඩ කිසිම දෙයක් කරන්න හිතාගෙන හිටියෙ නෑ. කොහොම උනත් දැන් දවස් කීපයක ඉදලම මම පුංචිට කියල මහගත්ත ඇදුම් දෙකක අඩු පාඩු වගයක් හදාගන්න හිතාගෙන හිටියා.

පුංචිට කෝල් එකකුත් දීලම ගියාට මම එහෙ ගිහින් පැයකින් වගේ කරන්ට් එක ගියා. ඇදුම පස්සෙ හදලා එවන්න කියල තියල ආවොත් ආයෙ මාසයකට විතර ලැබෙන්නෙ නෑ කියල දන්න නිසාම මම කරන්ට් එක එනකම් ඉන්නවා කියලා හිතුවා.

මේ ඉන්න අතරෙ නංගිල දෙන්නයි මල්ලි ඉස්කෝලෙ ඉවර වෙලා ආවා. මල්ලිට අහුවුනොත් ඉතිං කන් දෙකේ ෆියුස් යනකම් අහගෙන ඉන්න වෙනවා කියවන ඒවා.

එයා චෙස් ප්‍රැක්ටිස් යන්න පටන් අරගෙන. ඊයෙ තමයි එයාගෙ චෙස් බෝඩ් එක ලැබිල තියෙන්නෙ. මෙයා ඒකත් අරගෙන ඇවිත් චෙස් අදිමු කිව්වා. මම චෙස් සෙල්ලම් කරන්න දන්නෙ නැති උනත් ඉතිං ප්‍රශ්නයක් නෑ, එයත් දන්නෙ නෑනෙ.

චෙස් වල තියෙන නීතිනම් වැඩිය අදාල උනේම නෑ, මල්ලිට ඕන විදියට තමයි වැඩේ කරන්න උනේ.

එයාලට තාම චෙස් පීසස් වල නම් සහ මූව්මන්ට් කීපයක් විතරයි කියලා දීලා තියෙන්නෙ. ටික වෙලාවක් යද්දි චෙස් ඉත්තො ටික මල්ලිට කැමති කැමති පාරවල් වල යන්න ගත්තා 🤣. සමහර වෙලාවට එයාගෙ එවා මට පෙන්නලා, ඔයාට ඕන නම් ඔයා මේක කපන්න කියනවා. තව වෙලාවකට ඔයා ඕක මෙතනින් තියන්න එතකොට මට ඔයාගෙ ඉත්තා කපන්න පුලුවන් කියනවා.

කොහොම උනත් චෙස් සෙල්ලම් කරලා මේ වගේ ආතල් එකක් නම් ආයේ ජීවිතේට ගන්න බැරි වේවි. ඔය වගේ රවුන්ඩ්ස් 4,5ක්ම අපි සෙල්ලම් කරා. සමහර රවුන්ඩ්ස් වල මොකද උනේ කියල මම දන්නෙත් නෑ. පුංචි එක්ක කතා කරලා හැරිලා බලනකොට දෙපැත්තෙම ඉත්තො එයාම ඇදලා. එක්කො මම දිනල. දන්නෙම නැතුව. නැත්නම් එයා දිනලා.

සෙල්ලම් කරේ නම් චෙස් නොවුනට, චෙස් ඉගෙනගන්න ආසාවක්නම් අන්තිමට ඇති උනා.