වෙලේ ළිඳයි කුඹුක් ගහයි | 10% for SL Charity

සමහර දවස් වලට අම්මා එලියෙ පොඩි පොඩි වැඩ කරද්දී පස්සෙන්ම එල්ලිලා යන්න හිතෙන වෙලාවල් තියෙනවා. මේ තවත් ඒ වගේ දවසක්. අම්මා ගොටුකොලයි තව පොඩි පැල වගයකුයි අරගෙන, අපේ පහල ඉඩමට යන්න සූදානම් උනා. අපි ඒකට පහල ඉඩම කියන්න හේතු වෙන්නෙ, අපේ ගෙදරට පහල පැත්තෙන් තියෙන වෙල් යාය ලඟ පිහිටා තිබීම තමයි.

මීට එහා පැත්තෙන් අපේ පුංචිලාගේ ඉඩම. දැන්නම් හොඳටම කැලෑ වෙලා. අපි ඉන්නේ අම්මලාගේ සීයාගෙ ඉඩකඩම් වල. උරුමයෙන් ලැබුනු කොටස්. මං මේ කිව්ව අපේ පුංචිට ලැබුනේ මී අත්තාගෙ එකම කුඹුරු ඉඩම.

මම මේ දෙවල් කිව්වේ මම දැන් කියන්න යන දේ මීට අදාල නිසා. phone එක අතේ තියාගෙන වටපිටාවේ photo ටිකක් ගන්න අතරේ මම දැක්කා කුඹුක් ගහ. අපිට මේ ගහ අලුත් දෙයක් නෙමෙයි. හරිම ලොකුවට හැදුනු, වටේටම සිසිල් හුලඟක් බෙදා දෙන කුඹුක් ගහ. දැන් එතන එකම කැලෑ ගාලක් විතරයි. මේ කුඹුර අයිනේ කුඹුක් ගහ තනියම හැදිලා විතරක් නෙමෙයි, මෙතන තියෙනවා පුංචි ලිඳක්.

ගමක හැදුන වැඩුන අයනම් දන්නවා ඇති, වෙල්‍ යායක් ලග ලිඳක් වරදින්නෙ නෑ ඉස්සර. ඒ වගේම කුඹුක් ගහක් ලග තියෙන ලිඳක වතුරෙ සීතල අඩුවක් වෙන්නෙත් නෑ. හරිම සනීපදායක සීතලක්.

අපි පුංචි කාලේනම් අම්මා එක්ක, එහෙමත් නැතිනම් පුංචිලා එක්ක මේ ලිඳ ලගට ඇවිත් නානවා. ලිඳ ගොඩක් ගැඹුරුත් නෑ, ඒත් කවදාවත් වතුර අඩුවකුත් නෑ. මම මෙතනට එන්න කැමති වෙන්න තව විෂේශ හේතුවකුත් තිබුනා. ලිඳ එහා පැත්තේ කන්ඩියේ තියෙන්නේ කිරිමැටි 😁. ඉතිං අනිත් අයට රෙදි හෝදන්න බැරිනම් ඕන දෙයක් කරගන්න කියලා මම කිරිමැටි වලින් රූප හද හද ඉන්නවා.

කුඹුක් ගහ දකිනවත් එක්කම මට මේ අතීත කතා ඔක්කොම මතක් වෙන්න පටන් ගත්තා. කිරිමැටි වලින් සෙල්ලම් කරපු හැටි මැවිලා පෙනුනා. තව photo ටිකක් ගන්න හිතාගෙන ලගටම ගියත් ලිඳනම් පෙන්නවත් නෑ. කැලෑ වැල් වලින් වැහිලම ගිහින්.

හැම තැනක්ම තණකොල පිරිලා තිබුනත්, එක තැනක විතරක් කවුරු හරි සුද්ද කරලා වගේ තියෙනවා. දැක්ක ගමන් මම දැන ගත්තා, කවුද මේ කුඹුක් ගහ යට හුලඟේ නිදාගන්න හාදයා කියලා.

ආපහු එන්නත් හැරිලා, මට මතක් උනා ඉස්සර ලිඳ අයින්නෙන් තිබුන ඉද්ද ගහ. අඩු තරමේ ඉද්ද ගහේ සලකුනක්වත් හොයගන්න පුලුවන්ද කියල විපරම් කරත්, ගහ දකින්න ලැබෙවි කියල බලපොරොත්තුවක් නම් තිබුනෙ නැති තරම්. පුදුමයකට වගේ මට දකින්න ලැබුනෙ, තමන්වත් යට කරගන්න හදන කැලෑව එක්ක සටන් වැදිලා මලකුත් පිපිලා තියෙන ඉද්ද අත්තක් 🥰.