වචනයක් නොකියාම
කඳුලු හංගා සිනාසෙන
දරන්නට බැරිතරම්
අනෙක දුක් දරාගෙන
ලෝකයට නොපෙන්වා
සොඳුරු සිත් දරාගෙන
අපූරු ම ත්‍යාගය යි
ලොව මැවු සුන්දර ම
විටෙක අම්මා කෙනෙකි
විටෙක සුරතල් දුවකි
නොමැතිවම බැරි කෙනෙකි
දයාබර සොයුරියකි
දරන්නට බැරි තරම්
වේදනා හිත දරන්
හිතන්නටවත් බැරි ලෙසින්
සිනාවක් මුව සරි කරන්
හැරෙන්නටවත් බැරි ලෙසින්
තවකෙකුට නුඹ තරම්
වෙන්න සවිමත්
දිරිය හිත තද කරන්..
Content credentials
Generated with AI
අද මාර්තු 8. ලෝකයම කාන්තා දිනය සමරනවා.ඉතින් මට හිතුණා පුංචි දෙයක් කාන්තාව ගැන කියන්න. ඒත් මේ මොහොතෙත් කොපණක් නම් කාන්තාවන් කරදරයට ලක් වනවා ඇත්ද... කොපමණක් නම් පුංචි දියනිවරුන් අතවරයට ලක් වනවා ඇත්ද... අත්තටම කාන්තාවන්ට එකම දිනයක් වෙන් නොවී හැම දිනකම කාන්තාවන්ට නිදහසේ සිටින්නට පරිසරය හැදෙනවා නම් මොකටද තවත් එක දිනක්..
ඔබට පුළුවන් නම් දෙමාපියන් නැතිව ගමනක් බිමනක් යන්න, ඔබට පුළුවන් නම් අනෙක් අයගේ උපකාරයක් නැතිව තමන්ගේ වැඩ කටයුතු කරගන්න,
ඔබට පුළුවන් නම් පවුලේ ආර්ථිකයට පුංචි හෝ සවියක් වෙන්න , ඔබට පුළුවන් නම් වැටෙන හැම තැනකදීම ආයෙමත් වෙහෙස නොබලා නැගී සිටින්න , ඔබ ඇත්තටම ශක්තිමත් පිරිපුන් කාන්තාවක්..
මේ වචන ටික ලියන මමත් නොයෙක් අභියෝගයන්ට අත්දැකීම් වලට මුහුණ දුන් කෙනෙක්. ඒ හැම අත්දැකීමක්ම අභියෝගයක්ම සතුට සිනහව පිරුණු ඒවා නම් නෙවෙයි. හැබැයි ඒ හැම අභියෝගයකින්ම හැම අත්දැකීමකින් මම බොහෝ පාඩම් ඉගෙන ගත්තා. ඒ හැම දෙයක්ම මගේ ජීවිතය දවසින් දවස ඉස්සරහට ගෙන යන මට ගොඩක් උදව් උනා.
සුරංගනා ලෝකවල සුරංගනා කතාවල ජීවත් නොවී මේ ගෙන්දගම් පොළොවේ පය ගහලා ජීවත් වෙන්න ඔබට පුළුවන් නම් ඔබ ඇත්තටම සවිමත් පරිපූර්ණ කාන්තාවක්..
ඉපදුන දවසේ ඉඳලා අම්මා, තාත්තා, සහෝදරයා, පෙම්වතා, සැමියා මේ හැමදේම කරල දෙයි කියලා බලාගෙන ඉන්න සමහර කාන්තාවන් අතරේ තමන්ට පුළුවන් පුංචි දේ විතරක් නෙමෙයි තමන්ට බැරි දේ පවා හිතේ ශක්තියෙන් කරගන්න කාන්තාවන් ඕන තරම් අපේ සමාජයේ ඉන්නවා. ඔබ ඉදිරියට යන්න යන්න ඔබේ කකුලෙන් අදින පිරිස තව තවත් වැඩිවේවි. ඔබව වට්ටන්නට වචනයකින් හෝ හිත රිදවන්නට පෙළඹෙන අය වැඩිවේවි. හැබැයි , ශක්තිමත් ගැහැණියක්ව ආයෙමත් ආපස්සට ඇද ගන්න එක හරිම අපහසු දෙයක්..
ඉතින් ඔයාටත් පුළුවන් අභිමානයෙන් යුතු , ශක්තිමත් ගෑණු ළමයෙක් වෙන්න... දවසක ආයෙමත් ඔබේ අතීතය දෙස හැරී බලනකොට සතුටු වෙන්න පුළුවන් විදියේ අනාගතයක් අද ඉඳන් ගොඩනගන්න. ඉතින් මේ කාන්තා දිනය ලෝකයට එක දවසකට සීමා වෙද්දී ඔබ ඔබේ ජීවිතය පරිපූර්ණ කරගන්න වෙහෙස වෙන්න, ශක්තිමත් වෙන්න.