අවුරුද්දට කලින් නෑගම් |10% to sl charity

මේ එළඹිලා තියෙන්නේ හැමෝටම අමාරු කාලයක් . විශේෂයෙන්ම ශ්‍රී ලංකාවේ දැනට තියෙන ආර්ථිකයත් එක්ක මොන විදිය රැකියාවක් කළත් ජීවත් වෙන එක හරි අමාරුයි. එහෙම එකේ රස්සාවක් නොකරන මිනිස්සු එහෙමත් නැත්තං එදිනෙදා කුලී වැඩක් කරගෙන ඉන්න මිනිස්සු කොහොම ජීවත් වෙන්නද.

ඒවගේ ආර්ථික අපහසුතා තියෙන පවුලක් පහුගිය දවස්වල අපිට මුණ ගැහුණා . ඉතින් මමත් අම්මත් හිතුවා අපිට පුළුවන් විදියට උපකාරයක් කරන්න . අලුත් අවුරුද්දත් ලඟ එන නිසා බොහෝ අයට ආර්ථික අතින් ගොඩක් අමාරුයි. හැබැයි අපිට පුළුවන් විදියට උදව් කරන්න පුළුවන් නම් ඒක ලොකු පිනක්.

මේ ගෙදර පිහිටලා තියෙන්නේ ගාල්ල , මානම්පිට ප්‍රදේශයේ . වයසක අම්මයි තාත්තයි විවාහ නොවුණු දුවක් තමයි මේ ගෙදර ජීවත් වෙන්නේ . ඒ වයසක ආච්චි එක්තැන් උන කෙනෙක්. ඒ වගේම සීයත් ගොඩක් වයසයි . කිසිම රැකියාවක් කර ගන්න තරම් ශක්තියක් ඔහුට නෑ. අවිවාහක දුවට සිදු වෙලා තියෙනවා. තමන්ගේ අම්මවයි තාත්තවයි රැකබලා ගන්න ගමන් කීයක් හරි උපයාගන්න . ඒත් එක්තැන් වුණු අම්මා නිසා ඇයට රැකියාව කරගන්නට හැකියාවක් නෑ.

ඉතින් අවුරුද්දට කලින් අපි ගියා නෑගම් .අපි එහේ යනකොට ඒ සීයා පුටුවක වාඩි වෙලා ඈත බලාගෙන හිටියා. සමහර විට කල්පනා කරනවා ඇති කොච්චර අසරණ තත්ත්වයකට අප පත් වෙලාද කියලා . අපි ඊට කලින් දවසේ අපිට පුළුවන් විදියකට පරිප්පු, සීනි , ලූණු, නූඩ්ල්ස්, පාන් පිටි, මිරිස් තුන පහ, ලුණු , සබන් ආදිය මිලදී ගත්තා . හැබැයි අපේ හිතුවට වඩා ඒ බඩු ටික ප්‍රමාණවත් වුණා .

අපි ඒ ගෙදරට යන කොටත් උදේට වත් දවල්ට වත් උයලා තිබුනෙ නෑ. ඒකට හේතුව තමයි ඒ අවිවාහක දුව අම්මගෙ සියලුම වැඩ කටයුතු කරන්න ඕන. ඉතින් ඇයට නිවසේ වැඩ කටයුතු කරන්න වෙලාව මදි .

මේ වගේම පින්කමක් අවුරුද්ද පටන් ගන්න කොටත් අපිට කරන්න හැකියාව ලැබුණා. ඒ මගේ තාත්තාගේ හත්වැනි අවුරුදු දානය වෙනුවෙන්. ඒකට ගොඩක්ම උදව් කළේ @sandu සහ ඇයගේ අම්මයි තාත්තායි. අපි එකට තෝරගත්තේ කරන්දෙණිය ප්‍රදේශය. ආර්ථික අපහසුතා තියන පවුල් හයකට උදව් කරන්න අපිට පුළුවන් වුණා .

ඇත්තටම හිතට ලොකු සතුටක් වගේම සැනසීමක් දැනුනා ඒ වගේ පවුල්වලට උදව් කරන කරන්න ලැබීම ගැන. නිතරම මට හිතෙන දෙයක් තමයි අපිට කොහොමහරි කන්න බොන්න දෙයක් ලැබෙනවා. ඒ අපි පෙර ආත්මෙක කරපු පින් නිසාත් වෙන්න ඇති. හැබැයි දවසකට එක වේලක්වත් කන්න නැති අසරණ දුප්පත් මිනිස්සු කොච්චර නම් මේ රටේ ඇත්ද. කිරි උගුරක් බොන්න නැති චූටි දරුවෝ කොච්චර නම් දුක් විඳිනවා ඇද්ද . ඒ අතින් අපි ගොඩක් වාසනාවන්තයි. එහෙම ජීවිතයක් ලබපු අපිට පුළුවන් විදියට අසරණ මනුස්සයෙකුට උදව් කරන්න තියෙනවා නම් ඊට වඩා පිනක් තවත් මේ ආත්මෙ කරන්න පුළුවන් කියලා මං හිතන්නේ නෑ.