හැකිනම් ඔබත් ලේ බිඳක් දන්දෙන්න - 5% to Sl Charity

ලේ දන්දෙන ගමන්

ටික දවසකට පස්සේ ලිපියක් ලියන්න පොඩි වෙලාවක් ලැබුනා. මේ ටිකේම වැඩත් එක්ක වෙනදට වඩා ටිකක් කාර්යබහුල වෙලා හිටියේ. මේ මාසේ 22 අපේ වැඩබිමේ ලේ දන්දීමේ වැඩසටහනක් පවත්වන්න සැලසුම් කරලා තිබුනේ. පිටස්තර අයව වැඩබිමට ගෙන්නගන්නේ නැතුව වැඩබිමේ ඉන්න පිරිස විතරක් සහභාගී කරගෙන ලේ දන්දීමේ වැඩසටහන කරන්න තමයි සැලසුම් කරලා තිබුනේ.

ටිකෙන් ටික දවස් ලං වෙද්දී අපි නොහිතපු ගැටලුවකට මුහුණ දෙන්න සිද්ධ උනා. ඒ වෙනකොට කොරෝනා සඳහා එන්නත අපේ වැඩබිමෙන් 90% කට පමණ ලබා දීලා තිබුනේ. ඒ එන්නත ලබා දීලා මාසයක කාලයක් යනකන් ලේ දන්දීම කරන්න බෑ කියලා ලේ බැංකුවෙන් අපිට දැනුම්දීමක් කලා. ඉතින් ලේ දෙන්න ඉන්න අයගෙන් බහුතරයක් මාසයකට අඩු කාලයකදී කොරෝනා එන්නත ලබාගත් අය. එන්නත ලබාගෙන මාසයකට වැඩි හා එන්නත ලබානොගත් කියන කාණ්ඩ දෙකට තමයි ලේ දන්දීමේ හැකියාව තියෙන්නේ. වැඩබිමේ මේ කාරනා දෙකෙන් එකක් හෝ සංතෘප්ත වෙන අය හිටියේ මමත් ඇතුළුව 20ක් වගේ පිරිසක්.

ලේ දන්දීමට අවශ්‍ය පෝරමය පිරවීමෙන් පසු

ඉතින් ලේ බැංකුවෙන් අපිට ඉල්ලීමක් කරා මේ දවස්වල තියෙන කොරෝනා උවදුරත් එක්ක ලේ බැංකුවේ ලේ හිඟයක් තියෙන හින්දා අපේ ලේ දෙන්න පුලුවන් පිරිසට ලේ බැංකුවට ඇවිත් ලේ දෙන්න පුලුවන්නම් ගොඩක් වටිනවා කියලා. ඉතින් එයාලගේ ඉල්ලීම පිළිඅරන් අපි ගියා නාරාහේන්පිට ලේ බැංකුවට මේ මාසේ 24 වෙනිදා ලේ දන්දෙන්න. එතනදිත් අපේ දෙතුන් දෙනෙකුට ඔවුන්ගේ බර සහ වෙනත් ගැටළු කිහිපයක් නිසා ලේ දන්දීමේ අවස්ථාව නැති උනා.

මගේ වාරය එනතෙක් පෝලිමේ

ඉතින් මට පුළුවන්කම ලැබුනා අවුරුදු තුනකට පස්සේ 8වෙනි වතාවට ලේ ටිකක් දන්දෙන්න. එතනදිත් ඔවුන් මගෙන් විශේෂ ඉල්ලීමක් කරා. ඒ තමයි පුලුවන්නම් ඇවිත් මාස 4කට වතාවක් ලේ දන්දෙන්න කියන එක. මේ කාලේ ගොඩක් අය රටේ පවතින තත්වයත් එක්ක ලේ දෙන එක අඩු වෙලා තියෙන්නේ. ඉතින් විවිධ හේතු හින්දා දිනකට විශාල ප්‍රමාණයක් රෝගීන්ට ලේ දෙන්නත් ඕනි වෙනවලු. ඉතින් මේ හින්දා ලේ හිඟයක් තියෙනවා කියලයි දැනගන්න ලැබුනේ. මේ ජීවත්වෙලා ඉන්න ටිකේ අපිට කරගන්න පුලුවන් ලොකු පිනක් තමයි ලේ දන්දෙන එක. අපි දෙන ලේ ටිකෙන් තව කෙනෙක් ජිවත් වෙනවනම් ඒක මොන තරම් සතුටක්ද අපිට. සමහරවිට ඒ ලේ ගන්න කෙනා මුළු පවුලක්ම ජිවත් කරවන කෙනෙක් වෙන්න පුලුවන්. ඉතින් මෙහෙම හිතද්දී හිතට ලොකූම ලොකු සතුටක් එනවා අපි හින්දා තව කෙනෙක් ජිවත් වෙනවා නේද කියලා. හැම මාස 4කටම සැරයක් ලේ දෙන්න මං තීරණය කලා. ඉතින් ඔයාලත් පුලුවන්නම් ගිහින් ලේ ටිකක් දන්දෙන්න. මේ ඒකට සුදුසුම කාලයයි.