කොහොමද යාළුවනේ ඔයාලා ඔක්කොම හොඳින් ඇති කියලා හිතනවා. මම අද කියන්න යන්නෙ මගේ ප්‍රදේශයේ මෑතකදී සිදු වූ වටිනා සංවර්ධන කටයුත්තක් ගැනයි. ඒ තමයි ගාල්ල හෝලුවාගොඩ ඉදිවූ දිය උද්‍යානය. මෙම උද්‍යානය ඉදි කිරීමට කලින් එතැන තිබුනෙ විශාල මඩ වගුරක්. ඇත්තෙන්ම කිව්වොත් සුලු ගංවතුර තත්වයකදී උවත් එතැන මාර්ගය ජලයෙන් යට වෙනවා. දැන් මේ ව්‍යාතිය මගින් ජනතාවට විශාල සෙතක් වෙනවා වගේම ඒ ගංවතුර ගැටලුවටත් එය විසඳුමක්. 2021 වසරේ ඉදිකිරීම් ආරම්භ වූ මේ උයන පසුගිය දිනක ජනතාවට විවෘත වුනා. මේ ස්තානය තියෙන්නේ ගාල්ල බද්දේගම 370 බස් මාර්ගයේ හෝලුවාගොඩ කියන ප්‍රදේශයේ. මහා මාර්ගය ආසන්නයේම තිබෙන නිසා ඕනෑම අයෙකුට ගාල්ල බද්දේගම 370 බස් රථයකින් මේ ස්ථානයට එන්න පුලුවන්. ඔබගේ පහසුව පිණිස එම ස්ථානය ගූගල් සිතියමේ පහතින් උඩුගත කරන්නම්.
මෙම ස්ථානයට ගියොත් බාල මහලු වැඩිහිටි ළමා ඕනෑම පුද්ගලයකුට විනෝදයෙන් ගත කරන්න පුළුවන්. මොකද එතන ළමයින්ට විනෝද වෙන්න ළමා උද්‍යානයක් තියෙනවා. එතනදි ඔවුන්ට විවිධ ක්‍රියාකාරකම් වල නිරත වෙන්න පුළුවන්. ඒවගේම එතන බෝට්ටු සේවයකුත් ක්‍රියාත්මක වෙනවා. ඔබ නිදහසේ හංස බෝට්ටුවක පාවෙන්න කැමතිනම් ඔබට එම පහසුකම ද මේ ස්ථානයෙන් ලබාගන්න පුළුවන්. ඒවගේම මෙම ස්ථානයේ ව්‍යායාම සඳහා වෙන් වූ ඇවිදින මං තීරුවක් ද තියෙනවා. ඔබට අවැසි නම් ආහාරපාන ලබා ගැනීමට මෙම ස්ථානයේ ඉඩකඩ සලසා දී තිබෙනවා. ඉතින් සියල්ල සපිරි මේ ස්ථානයට ඇවිත් බලන්න කියලා මම ඔබට ආරාධනා කරනවා. මේ කවි පෙල එම ඵලදායී ඉදිකිරීම අගයනු වස් ලියා තබමි.
link
අගයක් දිය යුතුයි ඔසවා තව උඩට
මෙතුවක් කලක් යටවී තිබු තැන මඩට
උයනක් වෙලා සිරියකි හෝලුව ගොඩට
තිබු මඩ වගුර උයනකි අද ලංකාවේ
ඉන්නට නිදහසේ වතුරින් වට දූවේ
මිනිසුන් පෙලට එයි පැතිරී ගොස් රාවේ
තව අය කියයි ලොකු ගානක් ගැසුවෝය
බුදුහිමි ලඟත් මේ වගෙ උන් විසුවෝය
හොඳ කළ එවුන් කවදත් දොස් ඇසුවෝය
අංචිම ඇදපු උන් හිටියා මේ වාගේ
අද ඵල දරා ඇත එදවස කල යාගේ
හොඳ වැඩ සඳහා දිය යුතුමයි සහයෝගේ
හදලා තියේ මං ඇඟටත් දා ගන්න
ඕනෑ උනොත් බඩ කට හෙම පිනවන්න
ඔක්කොම එකම තැනකින් හැක ගොඩවෙන්න
සිත් විය ලියන්නට කවි ගී තරුවකට
හප හප මොනව හරි දෙන පත් ඉරුවකට
ලැබුනොත් ඉඩක් එන් නෑ මම වරුවකට
මට දැනෙන ආකාරයට නම් මෙය ඇත්තටම ප්‍රයෝජනවත් සංවර්ධන කටයුත්තක්. එහෙත් සමහරු මෙය පරිසරය විනාශ කිරීමක් විදිහට කියනවා මට ඇහිලා තියෙනවා. සමහරුන්ට අනුව එය මහජන ධනය ඵල රහිත දෙයකට වියදම් කිරීමක්. සමහරුන්ට අනුව එය මහජන මුදල් කොල්ල කෑමක්. මේ මට ඇහුනු දේවල්. මා මෙහිදී එම චෝදනා වල සත්‍ය අසත්‍යතා විශ්ලේෂණය නොකරමි. මට දැනෙන අයුරින් එහි වටිනාකම පමණක් පැහැදිලි කරමි. ඔබට මතකද ශ්‍රී ලංකාවේ දක්ෂිණ අධිවේගී මාර්ගය ඉදි වූ මුල්ම අවධිය. එහිදී විශාල පිරිසක් එයට විරුද්ධ වුණා. ඔවුන්ගේ එකම තර්කය වුණේ මුදල් ගෙවා අධිවේගී මාර්ගවල ගමන් ගන්නේ කවුරුන්ද යන්නයි. එහෙත් එම නිර්මාණයේ වටිනාකම කියලා නිම කරන්න බෑ. බොහෝ පිරිසක් එයින් ප්‍රතිලාභ අත්විඳිනවා. ඉතින් මෙවැනි ඵලදායි සංවර්ධන කටයුතු සඳහා අප වචනයකින් හරි සහයෝගය ලබාදිය යුතුයි. වැරදි විවේචනය කරනවා සේම හොඳ ඇගයීමද කළ යුතුයි. අවසාන වශයෙන් ඔබට පුංචි ආරාධනයක් කරන්නම්. ඔබ ගාල්ල නගරයට හෝ බද්දේගම නගරයට පැමිණියහොත් මොහොතක් නිදහසේ ගත කරන්න මෙම ස්ථානයටත් ඇවිත් යන්න. ඉදිරියේදී තවත් මෙවැනි ලිපියක් තුලින් හමුවෙමු. ඔබට සුබ දවසක්.