නූල් සූත්තර | 5% to SL Charity

අපේ අලුත් ව්‍යාපාරය නිසා වෙච්ච දෙයක් තමයි ගේ හැමතැනම නූලුයි, රෙදියි වැඩිවෙච්ච එක. ඉතින් මේවා එහෙ මෙහෙ දැම්මම හදිසියට ගැළපෙන පාට නූල් හොයාගන්න එක හරිම කරදරයි. අවශ්‍ය නූල අවශ්‍ය වෙලාවට හොයාගන්න බැරි වුණාම වෙලාව වැය වෙනවා. ඉතින් දවස් ගාණක් තිස්සේ හිතේ තියන් හිටියේ මේ ටික පිළිවෙලක් කරන්න.

කොහොම හරි පහුවෙලා පහුවෙලා ඊයේ වැඩේ පටන් ගත්තා. මං මේකට ගෙදර තියෙන ඉවත දාන දේවල් තමයි ගත්තේ. වැඩි දෙයක් ඕන වුණේ නෑ. පරණ කේක් බෝඩ් එක්කුයි, මගේ ඉවර වුණ පෑන් බෑග් එකෙන් පෑන් ටිකකුයි ගත්තා.

මං තෝරගත්තේ සිහින් පෑන් ටිකක්. එකම පෙනුම තියෙන පෑන් ටිකක්. Glue gun එක තියෙන එක මේ වැඩේට ලේසි වුණා. මුලින් මං ඇතුළේ රවුමක් ළකුණු කරගෙන නූල් කෝන් එකක් තියල බැලුවා කොච්චර ඉඩක් යනවද කියල.

ඒ විදියට කෝන් හතරකට ඉඩ තිබුණා එතන. ඊට පස්සේ glue gun එක පාවිච්චි කරලා, ඉඩ බැලන්ස් වෙන විදියට පෑන් සවිකරා. ඊට පස්සේ වටේ රවුමේ වැඩ පටන් ගත්තා. ඒකට නම් පෑන් ගොඩක් ඕන වුණා. සම්පූර්ණ වැඩේට හිස් පෑන් විස්සක් විතර ගියා. හොඳ වෙලාවට මං ළඟ පෑන් 1000ක් විතර තියෙනවා.

නූල් කෝන් එකට ඉඩ ඇති වෙන විදියට පෑන් ටික අලවලා, ඊට පස්සේ පොඩි නූල් රීල් දාන්නත් ළගින් ළගින් වගේ තව පෑන් ටිකක් ඇළෙව්වා. දැන් වැඩේ හරි. වේලෙන්න ලොකු වෙලාවක් යන්නෙත් නෑ. ගම් එක ඉක්මනට වේලුණා. හොඳටම වේළුනාම තමයි ඊළඟ පියවරට යන්න වෙන්නේ.

ඊට පස්සේ ගැළපෙන විදියට නූල් ටිකත් දාලාම වැඩේ ඉවර කරා. දැන් නූල් එහෙ මෙහෙ දාන්න ඕන නෑ. හොයා ගන්නත් ලේසියි. ගන්නත් ලේසියි. පිළිවෙලට තියෙනවා. තියෙන පාටත් පේනවා. 🤭අන්න එහෙමයි ඉවත දාන දේවල්වලින් ප්‍රයෝජන ගන්නේ.