අරුම පුදුම අපුරු මලක්

මේ දෙසැම්බර් පෝයට අපි පන්සල් ගියේ උදේ වරුවේ. ඒ මොකද එදා උපාසක ඇත්තන්ට දවල් ආහාරය සහ අතුරු පසට ice cream දුන්නේ අපි. ඒ වැඩේ ඉවර කරලා අපි ගියා බුදුන් වදින්න. පළමුවෙන්ම චෛත්‍ය වන්දනා කරලා, දෙවනුව බෝධිය වන්දනා කරලා අපි ගියේ බුදු ගෙය වන්දනා කරන්න. බුදුන්ට මල් පූජා කරද්දී දැක්ක අමුතු ජාතියේ මල් වට්ටියක් මල් ආසනයට කවුදෝ පූජා කරලා. මල නිකන් ඉටි මලක් වගේ. මම හිතුවේ හදාපු මලක් කියල. කෝකටත් කියල එක මලක් අතට අරන් බැලුව. හරිම ලස්සනයි. හරියට නිර්මාණය කරපු ඉටි මලක් වගේ. මට පුදුම හිතුණා. වැරදි වුණත් වට්ටියෙන් එක මලක් අතට අරන් බැලුවා. මම ජිවිතේ පළවෙනි වතාවට තමා මේ මල දැක්කේ.

මම පුදුමෙන් වගේ මල ගැන විපරම් කරද්දී මල් පූජා කරන්න ඇවිත් සිටිය උපාසක මාමා කෙනෙක් මට කීවා ඒ මලට කියන්නේ ගොඩ ඕලු මල් කියලලු. ගහ නිකන් කැනාස් ගහ වගේලු. පදුරක් හැදෙන නිසා කැනස් ගහේ වගේ මල් ගොඩක් හැදෙනවලු. ඉතින් මම ඉක්මනින්ම මගේ දුරකථනය අරගෙන මලේ චායාරූප කීපයක්ම ගත්ත. වැඩේ වැරදයි. ඒ වුණත් එක මලක් නෙමේ මල් වට්ටියම මල් ආසනයෙන් අතට අරන් චායා රූප කීපයක්ම ගත්ත. ඒ වගේම මම වගේ මේ මල කවදාවත් දැකපු නැති අයත් ඇති. ඉතින් හැමෝම බලා ගන්න. මේකට කියන්නේ ගොඩ ඕළු මල් කියලලු. මට හිතුණා මේ මල ගැන තවත් තොරතුරු ඔයාල කවුරු හරි දන්නවා ඇති කියල. ඒ නිසා මම හිතාගත්ත මේ මලේ චායාරූප කීපයක් ඔයාල සමඟ බෙදා ගන්න.

සමහර විට මේ මලට ආවේනික වෙනත් නමක් තියෙන්නත් පුළුවනි. ඒ වගේම මේ මල ඔයාල කාගේ හරි වත්තකත් ඇති. ඉතින් ඔයාල ඒ ගැන දන්නවා නම් කරුණා කරලා මේ ලිපිය පහලින් අකුරු කරලා අපිව දැනුවත් කරන්න.

මේ මල මම දැක්ක පළමු අවස්ථාව නිසා මම හරි ආශයි මේ මල ගැන තව විස්තර දැන ගන්න. අපි එක්ක පන්සල් ගිය වෙන කිසිම කෙනෙක් ඒ මල දැකලා තිබුණේ නෑ. ඒ ගැන අහල තිබුණෙත් නෑ. එහෙනම් මේ ලිපිය කියවල කවුරු හරි ඒ ගැන දන්න කෙනෙක් ඉන්නවා නම් අපිට වැඩි විස්තර ලබා දෙන්න.

ඉතින් ලස්සනයි නේද මල. ලිපිය කියෙව්වාට ස්තුතියි.