ලබු කිරිබත් කමු - 5% to sl charity

පුංචි කාලේ අපි හැමෝම අතර ජනප්‍රිය කතාවක්නේ නරියයි, හාවායි ලබු කිරිබත් කාපූ හැටි. අංහිසක හාවාව රවට්ටලා, නරියා ලබු කිරිබත් මුට්ටියම කාපූ විදිය ඒ කාලේ අපි හරි ආසාවෙන් ඇහුවා. ඉතිං අද මම කියන්න යන්නේ නරියයි හාවයි ගැන නෙමෙයි, ලබු කිරිබත් ගැන.

Edited by pics art

පුංචි කාලේ ඔය කතාව මට කියලා දුන්නේ අත්තම්මා. අත්තම්මා නරියයි හාවයි ලබු කිරිබත් කාපු හැටි මට සියපාරකට වඩා කියලා ඇති. ඉතිං ඕක අහලාම මට ලබු කිරිබත් කන්න ඕනී උනා. හැමදාම ලබු කිරිබත්ම ඉල්ලන නිසා අපේ ලොකු අත්තා ලබු ගෙඩියක් හොයාගෙන ඇවිත් මට ලබු කිරිබත් හදලා දුන්න විදිය තාම මතකයි. ඒවා හරි සුන්දර මතක. ඊට පස්සේ මගේ ලබු කිරිබත් දොළ දුක සනීප උන නිසා ආයේ ලබු කිරිබත් කන්නම උනේ නෑ.

මේ මෑතක මම ගෙදරට ඕනී එලවලු කලමනා ගන්න ගියාම දකිනවා එලවලු කඩේ ලබු ගෙඩියක් තියනවා. මම ඒ කාලේ දැකපු තරම් ලොකු ලබු නෙමෙයි ඉතිං. ප්‍රමාණයෙන් පොඩියි. ලබු කිරිබත් කාලා කාලයක් ගත වෙලා ගිහින් මට ඒ රසත් අමතක වෙලා නිසා මම ඒ ලබු ගෙඩිය අරගෙන එනවා කිරිබත් හදන්න හිතාගෙන. කිරිබත් හදන්න හිතාගෙන ආවාට මොකද මම ඉතිං හදන්න දන්නේ නෑ. සාමාන්‍යයෙන් ගහක කොලක දෙයක් පැරණි විදියට රසවත්ව හදන්න ඕනී උනාම මම උපදෙස් ගන්නේ අපේ තාත්තාගෙන්. අපේ අම්මාට වඩා ඒ දේවල් ගැන තාත්තා හොඳටම දන්නවා. මම තාත්තාගේ උපදෙස් අරගෙන ලබු කිරිබත් හදපු විදිය තමයි මේ කියන්න යන්නේ.

මුලින්ම ලබුගෙඩිය සෝදලා දෙකට කපලා පොතු සුද්ද කරගන්න ඕනී. ටිකක් තද පොත්තක් තමයි ලබු වලට තියෙන්නේ. ඊට පස්සේ ලබු ගෙඩියේ මදය සුද්ද කරලා ඉවත් කරගන්න ඕනී. ඊට පස්සේ අපිට පුළුවන් ලබු ටික පොඩි පොඩි කොටු වලට කපගන්න.

ලබුවලට සමාන ප්‍රමාණයක් කැකුලු හාල් අරගෙන සෝදලා පැය බාගයක් වගේ පෙගෙන්න තියන්න. පෙගෙන්න තියන එක අත්‍යවශ්‍ය නෑ. නමුත් ටිකක් පෙගුනාම ඉක්මනට තැම්බෙනවා.ඊට පස්සේ භාජනයකට (මම නම් ගත්තා මැටි හට්ටියක්) හාල් ටිකයි, ලබු ටිකයි, ලුනු රස අනුව දාලා ඒක මිටි කිරෙන් සාමාන්‍ය කිරිබතක් විදියට උයාගන්න ඕනී. බත් ටික හොඳට තැම්බුනාම මිටිකිරි ටික දාලා වරින් වර හැදීගාමින් කිරිබතේ පදමට හින්දගන්න.

හොඳ කටට සැර ලුනු මිරිසක් සහ උණු උණු ප්ලේන්ටි එක්ක මේකට හොඳට ගැලපෙනවා. ප්‍රධාන ආහර වේල් එක්ක ප්ලෙන්ටී බොන එක නම් එච්චර හොඳ දෙයක් නෙමෙයි. ඒ උනාට මේ වෙලාවේ නම් ප්ලේන්ටී එකක් නැතුවම බැරි උනා.