රන් අකුරින් ලිය විය යුතු දවසක්. | 09/07/2022 | 5% for SL-Charity

මම හිතනවා ඔයාලා හැමෝම මේ දවසත් එක්ක එකතු වෙන්න ඇති කියලා. මොකද මුළු රටක්ම හදවතින් හරි මේ වෙලාවේ අරගල අරගලය එක්ක හිටියා. මේ විදියට ජනතාව එකතු වුණේ නැතිනම් කවදාවත් මේ රට ගොඩ ගන්න බෑ. ගොඩක්ම සතුටු හිතුන දවසක් තමයි 2022 ජූලි 09 කියන්නේ.

මේ දවස මටත් රාජකාරි දවසක් උනත් මම තීරණය කලා කොහොම හරි Galleface අරගල භූමියට යනවා කියලා. මම නැවතිලා ඉන්නේ අතුරුගිරියේ නිසා මෙහෙ ඉඳන් මට කිලෝ මීටර් 25ක පමණ දුරක් Galleface එකට තිබුණා. පයින් හරි යන්න බලාපොරොත්තුවෙන් උදේම යාළුවයි මායි මෙහෙන් පිටත් වුණා. අතුරුගිරිය පහුවෙලා කිලෝමීටරයක් පමණ යන විට car එකක් නවත්තලා අපෙන් ඇහුවා අරගලයට ද යන්නේ කියලා. එහෙම ඇහුවේ ඒ car එක drive කරන් ආව නංගි. එයා එක්ක තව එයාගෙ අම්ම සහ තාත්ත හිටිය. අය්යලා දෙන්නා තලවතුගොඩට යනකම් එක්කන් යන්නම් කියලා කිව්වා. ඇත්තටම හිතාගන්න බෑ මිනිසුන්ගේ හිත් වෙනස් උන විදිය. එයාලත් හිටිය හොස්පිටල් එකකට යන ගමන් තාත්තට බෙහෙත් වගයක් ගන්න කියලා. ඇත්තටම එහෙම නැති වුණා නම් අපිව Galleface එකටම දාන්න තරම් හැඟීමකින් එයාලා හිටියේ. මොකද එයාලා කතා කළ දේවල් එක්ක එයාලටත් එතැනට එකතු වෙන්න ලොකු උවමනාවක් තියෙනවා කියලා තේරුණා.

කොහොමහරි අපි තලවතුගොඩින් බැහැලා ආපහු පයින් යන්න පිටත් වුණා. එතන ඉඳන් මීටර් විස්සක් යන්න වුණේ නෑ තවත් වාහනයක් නවත්වලා අපිට නගින්න කිව්වා. එයාලා නම් දිගටම ගෝල්පේස් එකට යන සෙට් එකක්. අපි ඔහොම තමයි අරගලයට උදේ එකතු වුණේ.

අපි ඔය විදිහට අරගලයත් එක්ක එකතු වෙලා කෙලින්ම ගියේ ජනාධිපති ලේකම් කාර්යාලය ඉස්සරහට. අපි එතන ඉද්දි තමයි ඒක ඉස්සරහ තියෙන වැට ගලවා දැම්මෙ. ඒක ගලවන වත් එක්කම පොලිසිය එතැනට කඳුළු ගෑස් ගැහුවා. කැම්පස් කාලේ කඳුළුගෑස් නම් ඕන තරම් කාල තිබ්බත් ඊයෙ තමයි කඳුළු ගෑස් වඳින මොහොතේත් හෙල්ලෙන්නෙවත් නැතුව එකම තැනකට වෙලා ඉන්න සිද්ධ වුණ දවස. මොකද එතන ඒ තරමට සෙනග. එතනට තව තව කඳුළු ගෑස් ගැහුවා නම් එතන හිටිය මිනිස්සු තෙරපිලා මැරෙන්න වුණත් ඉඩ තිබ්බා. කොහොම උනත් අන්තිමේ පොලීසියටවත් හමුදාවටවත් ජනතාවගේ ශක්තියට එරෙහි වෙන්න බැරි වුණා. අවසානයේ දී ජනතාව ජයගත්ත.

එතන ඉද්දි තමයි අපිට දැනගන්න ලැබුණේ ජනාධිපති මන්දිරය ටත් ජනතාව ඇතුල් වෙලා කියලා. ඊයේ දවසේ මිනිස්සුන්ට තියෙන බලය හොඳටම පේන්න ඇති කියලා මම හිතනවා. හවස් වන විට අරලියගහ මන්දිරය ඇතුලටත් ජනතාව ඇතුල් වෙලා තිබ්බා. ඒ ඒ තැන් වල හිටපු මිනිස්සුන්ගෙ මිනිසුන්ගේ මුහුණු වලින් ලොකු සතුටක් පෙනුනා.ඒ වුණත් අරගලයට අවශ්ය දේ තාම ඉටු වුණේ නෑ.

මම හිතන විදියට මේ හොර දේශපාලඥයෝ තව තවත් ඔවුන්ගේ බේරීම සඳහා අවශ්ය ක්රියාමාර්ග ගන්නවා ඇති.ඒකට තමයි 13 වෙනකන් කල් ඉල්ලුවේ.අපි බලමු ඉදිරියේදී මොකද වෙන්නේ කියලා. අරගලයට ජය වේවා.