ඇල්ල සහ කූඩැල්ලා

පහු ගිය සතියෙ සෙනසුරාද රෑ කෝල් එක එනකොට මම වැඩ කර කර හිටියෙ. ඒ සතියෙත් තිබුනෙ හවස ශිෆ්ට් එක නිසා. කෝල් එක ආවෙ නවෝදිනීගෙන්. එයා ගාල්ලෙ ඇවිත්. ගාලු කොටුවෙ ඇවිදල රව්මක් දාල සදුනියි රසී එක්ක, රෑට සදුනිගෙ ගෙදර නවතින්න. සඳුනි ඉන්නෙත් අපේ ගෙදරට කිට්ටුව නිසා මං ආරාධනා කරා උදේට අපේ ගෙදරඑන්න කියල.

නවෝදිනී කියන්නෙ සදුනිගෙයි රසීගෙයි කැම්පස් එකේ බෝඩිම් සගයා. ඒ ඇදුනුම් කමත් එක්කම කැම්පස් එකේ nature team, hiking club එකේ වැඩ වලදි අපි එකට වැඩ කළා. එකට හයික් ගියපු හොදට ඇවිදල කරල ඉන්න කෙල්ලෙක්!

ඉතින් එහෙම කෙනෙක් ආවම කොහේ හරි ඇවිදින්න එක්කන් යන එක අපේ යුතුමකනෙ. ඒ නිසා පහු වෙනිදට අපේ ගෙදර ඇවිත් අඬාහැලෙන ඇල්ල බලන්න යන්න කතා උනා.
අඬාහැලෙන ඇල්ල කියන්නෙ අපේ ගෙවල් වලට කිට්ටුවෙන්ම තියෙන දිය ඇල්ල.ගෙදර ඉදන් සාමන්යෙන් විනාඩි 40 ක් වගේ දුරකින් තියෙන ලස්සන පුංචි දිය ඇල්ලක්. අපේ පැත්තට කවුරු හරි යාලුවෙක් ආවොත් එහේට තමයි එක්කන් යන්නෙ. බීච් එකේ ඉදන් විනාඩි 40 වගේ අඩු කාලයකින් ලගාවෙන්න පුලුවන් තව දිය ඇලි තියේද කියල මම දන්නෙ නෑ. ඒනිසා එක දවසින් ඒ අත්දැකීම් දෙකම ගන්න මෙහේ එන යාලුවොන්ට පුලුවන් .😂

ඉරිද උදේ 10 විතර වෙනකොට කට්ටිය ආව අපේ ගෙදර. ගෙදර අස් කර කර හිටපු නිසා කට්ටියව ඉස්තෝප්පුවේම වාඩි කරල තියන්න සිද්ද උනා මට ඇතුලට වත් ගන්න බැරුව. අපි ගෙදරින් එලියට බහිනකොටම හමීරයි ඉමේශුයිත් ආව වෙන වැඩකට. ඒ දෙන්නවත් කතාකරගෙන අපි 6 දෙනාම අඬාහැලෙන ඇල්ල බලන්න පිටත් උනා.

වාහන ලඟ ගෙදරක දාල අපි කන්න දේවල් ටිකකුත් අරගෙන ඇල්ල ළගට එන්න ගත්ත. සදුනිගෙ අම්ම හැලපයි තැඹිලි ගෙඩි එවල තිබ්බ මගදි කන්න. ඇල්ල ගාවට ලගාවෙන්න තව මීටර් 600 ක් විතර කැලේ මැද්දෙන් වතුර පාරවල හරහා කැඩිච්ච ගස් උඩින් යන්න ඕන..පොඩි ත්‍රාසජනක ගමනක්..ලස්සන දෙයක් බලන්න යනකොට කොහොමත් එහෙම තියෙනකොට ඒ දේ ලස්සන වැඩිපුර දැනෙනව..ඇල්ල ළගට ඇවිත් අපි ටිකක් ගිමන් හැරිය..පිංතූර ටිකකුත් ගත්ත. එතන හිටපු රිලා රචුවෙන් අපේ කෑම ටික පරිස්සං කරගන්න සෑහෙන අවදානෙන් ඉන්න උනා අපට.

ඇල්ලෙ නාන තැන තියෙන්නෙ ඇල්ල උඩ. එතනට යනකොට ටිකක් සෙනග හිටිය. එදා ඉරිදාවක් නෙ. ඉතින් ගමේ අය වගේම ඈත අයත් ඇවිත් හිටිය ටිකක් විනෝද වෙලා නාගෙන යන්න.එතන සෙනග වැඩි නිසා අපි තව ටිකක් වතුර පාර උඩට ගිහින් නිදහසේ ඉදල කාල බීල පිංතූර ටිකකුත් අරගෙන ආපහු බැස්ස. කොච්චර ලස්සන තැනක් උනත් එතන බීල හාල එන එක අපේ ලංකාවෙ මිනිස්සුන්ගෙ කැත පුරුද්දක්. 😐. එතනත් බීල විසිකරපු බියර් කෑන් මල්ලක්ම තිබුන. ඒව එහෙම තියෙනව දැක දැක අහක බලන් එන්න පුලුවන් කමක් තිබුනෙ නෑ අපට.ඒ මල්ලත් අරගෙන ආපහු අපි පහලට බැහැල ලග ගෙදරකින් තිබ්බ නිසි පරිදි බැහැර කරන්න කියල.

ඉමේශ් හමීර දෙන්න බයික් එකේ පිටත් උනා ගෙදර යන්න. රසීත් බැස්ස ඇල්පිටියෙන්. නවෝදිනීව බස් එකට දාන්න අම්බලන්ගොඩ යනකොටනෙ මතක් උනේ බොන්න බැරි උන් තැඹිලි ගෙඩි තුන! එන මග දිගට නවත්‍තල පාරෙ අයිනෙ ඉදන් බොන්න හොද තැනක් හම්බුනේම නෑ. ඉතින් බීච් එකටත් ගියා ඒව බොන්නම. එතකොට තමයි දැක්කෙ මගේ කකුලෙ ඇගිලි දෙකක් අතරින් ගොඩක් ලේ ගිහින් තියෙනව. බලනකොට කූඩැල්ලෙක්..මට දැනුනෙවත් නැති හැටි මෙච්චර වෙලා යනකන්!

කූඩැල්ල එයාගෙ ස්වාභාවික පරිසරයෙන් ගොඩක් ඇතට ඇවිත්..දැන් ඉතින් එයාව ආපහු දාන්න ඇල්පිටියට යන්න ද..බීච් එක ලගම ගලවල විසිකරා..මේ කරිජ්ජ හුළග එයාට හරියයිද මන්ද..මුහුදුකරේ ජීවිතේ හුඟක් රළුයි..අනේ අසරණ කූඩැල්ලා!

-ceylonese eye-