උත්තරීතර සෙනෙහසයි තාත්තා - 5% for SL - Charity

ආයුබෝවන් යාලුවනේ,

කොහොමද ඔයාලට. හැමදෙනාම හොඳින් සුවෙන් ඇති කියලා විශ්වාස කරනවා. මම මේ දවස් ටිකේ හිතාගන්නවත් බැරි තරම් කාර්යබහුලයි. මගේ මහත්තයාගේ බාප්පා මියගියා පෙරේදා. අප ජීවත් වන නිවස ආසන්නයේ ම තමයි මියගිය බාප්පාගෙ නිවසත් පිහිටලා තියෙන්නේ. ඒ නිසාම නිතරම අපි එහේ යනවා උදව් කරන්න. මොකද මේ වෙලාවේ ඒ ගෙදර අයට හිත හදාගෙන, එන මිනිස්සුන්ට සංග්‍රහ කරන්න, ගෙදර අඩුපාඩුවක් හොයලා බලන්න විදියක් නැහැනේ. මීට අමතරව මේ බාප්පා මිය ගිය දවසට හරියටම මාස තුනකට කලින් මගේ මහත්තයගේ තවත් බාප්පා කෙනෙක් මිය ගියා. ඔහු මියගියේ කොරොනා වසංගතය ආසාදනය වීමෙන්. ඒ නිසා පවුලේ කාටවත් ඔහුගේ අවමංගලය උත්සවයට සහභාගි වෙන්න අවස්ථාවක් ලැබුණේ නැහැ. මේ නිසා අප පවුලේ හැම දෙනාම කතිකා කරගෙන තිබුණේ එම බාප්පට පින් අනුමෝදන් වශයෙන් සිදුකරන තුන් මාසේ දානෙට සහභාගි වීමටයි. නමුත් දෛවයේ අවස්ථාවකට අනුව එම දානමය පිංකමට පවුලේ හැම දෙනාටම සමූහයක් වශයෙන් සහභාගි වෙන්න හැකියාව ලැබුණේ නැහැ. පවුලේ අය තනි තනි වශයෙන් තමන්ට හැකි පහසු වෙලාවන්වලදී දානමය පින්කමට සහභාගි වුනා.

යාලුවනේ, පෙරේදා මියගිය බාප්පට දරුවන් තිදෙනෙකු සිටිනවා. එම දරුවන් සමාජයේ ඉහළ තනතුරු නොදැරුවත්,ධනය අතින් බොහොම ඉහළින් සිටිනවා. ඒ නිසාම ඒ බාප්පාට කිසිම දේකින් අඩුවක්, පාඩුවක් වුනේ නැහැ. දරු තුන්දෙනාගේ සෙනෙහස කිසි අඩුවක් නැතුව විඳින්න පින් කරපු තාත්තා කෙනෙක් තමයි ඔහු. ඔහුගේ මරණය කාටවත්ම වදයක් නොවී ඔහු බොහෝ වේලාවක් විඳවපු නැති ජීවිතයක් තමයි. එම දරුවන් තම තාත්තාගේ ගුණ කියනවා. ''තාත්තා අපිට කරපු දේවල්වලින්, අපිට තාත්තට කරන්න පුළුවන් වුනේ බොහොම ටිකක් විතරයි.අපේ තාත්තා අපි වෙනුවෙන් මොනතරම් දේවල් කලාද''. මෙලෙස නොයෙක් ආකාරයෙන් දේවල් කියනවා. මේවා ඇහෙනකොට හැම දෙනාගෙම ඇස් වලට නොදැනීම කඳුළු උනනවා.
තාත්තා කියන්නේ තාත්තට. ඒ උත්තරීතර පදවිය ලබපු කෙනෙක් දන්නවා එහි තියෙන අමිල සෙනෙහස වගේම වටිනාකම. අපි අපිට පුළුවන් හැම විදිහට වගේම හැකි උපරිමයෙන් අපි තාත්තට සලකනවා.
ඒත් තාත්තා අපි වෙනුවෙන් බොහෝ කැපකිරීම් කළා නේද. ඒ වගේ ඒ දරු තිදෙනාටත් දැනෙනවා ඇති නේද.

තව කියනවා ඇහුණා ''තාත්තට අපි මොන දේ කන්න ගෙනත් දුන්නත් තාත්තා ඒවායින් කෑල්ලක් අපිටත් කවනවා'' කියලා.තාත්තලගෙ කුස පිරුණේ තනියම කාල නොවෙයි. තම දරුවන්ගේ කුස පුරවලයි. හිත පුරවලයි.. තාත්තා කොහේ ගියත් ගෙදර එනකොට තම දරුවන්ට කන්න මොනවම හරි අරගෙන එනවා.
ඒවා දරුවන්ට දීලා,, තම දරුවෝ සතුටින් කනවා දැකලා තම කුස සතුටින් පුරව ගත්ත කෙනා තමයි තාත්තා.
මට මේ දැනෙන දුක වගේ සිය දහස් ගුණයක් තම තාත්තා අහිමි වුණු ඒ දරුවන්ට දැනෙනවා ඇති. මොකද ඒ තාත්තා ආයෙ කවදාවත් ඒ දරුවන් ගාවට එන්නේ නැහැ. තම දරුවන්ගේ දුකේදී හිත සනසන්න එන්නේ නැහැ. කරදරයකදී හිත ශක්තිමත් කරන්න එන්නේ නැහැ. සතුට බෙදා ගන්න එන්නේ නැහැ.
කොහොම නමුත් ජීවිතේ අපි කාටත් හමුවෙන උත්තරීතර සෙනෙහසේ එක ප්‍රතිමූර්තියක් තමයි තාත්තා.

යාලුවනේ මේ තියෙන්නේ මම ගිය සතියේ හදපු කෑම වර්ගවලින් ටිකක්

ස්තුතියි හැමදෙනාටම