බිඳ වැටුණු ආදර සම්බන්ධතාවය - 5% for SL - Charity

ආයුබෝවන් යාලුවනේ,

කොහොමද ඔයාලට. සතුටින් ඉන්න. පරිස්සමෙන් ඉන්න. මේ දවස්වල නම් පැය විසිහතරත් මදි වගේ. ඇත්තටම වර්ෂය අවසානයේදීත් අපි සිංහල හින්දු අලුත් අවුරුදු ලංවෙනකොට වගේම ගෙදරදොර අස්කරනවා, වත්ත පිටිය ශුද්ධ පවිත්‍ර කරනවා. බිරිඳක් විදියට මේ හැමදේම වගකීම් සහිතව මට දරන්න වෙලා. ඒ නිසා මේ දවස්වල ලිපියක් ලියන්න තරම් තියෙන විවේකය අඩුයි.

යාලුවනේ, ඔයාට මට වගේම අපි හැමදෙනාටම ආදර සම්බන්ධතා අත්දැකීම් තියෙනවා. සමහර විට මේ ඔබේ පළවෙනි ආදර සම්බන්ධතාවය වෙන්නත් පුළුවන්. නොවෙන්නත් පුළුවන්. පලවෙනි ආදර සම්බන්ධතාවය නොවේ නම් ඇයි ඒ සම්බන්ධතාවය බිඳ වැටුණේ?. ඔයා නොවෙයි නං ඇයගෙන් /ඔහුගෙන් ඈත් වුණේ, ඇයි එහෙම වුණේ. එයා ඔයාව දාල ගිය වෙලාව එයාට මොනවද හිතුනේ. 'මම එයා වෙනුවෙන් කොයිතරම් නම් කැප උනාද. කොයිතරම් නම් දේවල් අරන් දුන්නා ද.කොයිතරම් නම් ගෙදරට බොරු කියලා ද එයා වෙනුවෙන් මේ තරම් දේවල් කලේ.මම මහන්සියෙන් හම්බ කරපු සල්ලි පවා එයාට දුන්නා.මගේ ඕනෑ එපා කම් වලට වඩා එයාගේ ඕනෑ එපාකම් ගැන මම බැලුවේ'........තව කොයිතරම් නම් දේවල් කියන්න පුළුවන්ද. ඒත් වැඩක් නැහැ.

ඔය කියන තරම් උතුරා යන ශක්තිමත් ආදර බැඳීමක් තිබුණනම් ඇයි දාලා ගියේ. ඔයා හොයා ගන්න ඕනේ ඔයාගේ අදහස් වලට ගැලපෙන කෙනෙක්. ඔයාට ගලපගන්න පුළුවන් කෙනෙක්. බිඳ වැටුණු ආදර සම්බන්ධතාවයකදී හැම විටම අපට හිතෙන්නෙ තමන් නිවැරදි, අනිත් කෙනා තමයි වැරදි කියලා.100% තමන් නිවැරදියි කියලා හිතුවොත් කවදාවත් තමන්ගෙ වරදක්, අඩුපාඩුවක් හදා ගන්න බැහැ. තමන් තුළ තියෙන වේදනාව/ තරහව නැති කරගන්න පුළුවන් හොඳම දේ වෙන්නේ, හිතන්න ඕන තමන්ව දාල ගිය අනිත් පාර්ශවය පැත්තෙන් හිතලා. ඔබ තුළ පවතින සෘණාත්මක ආකල්පයක් කාලයක් තිස්සේ වර්ධනය වෙලා සම්බන්ධතාවය බිඳ වැටුන වෙන්න පුළුවන්. ඔබ තුළ පවතින යම් කිසි හැඟීමක් අනෙක් පාර්ශවයේ මානසික පීඩනයට ලක්වී තිබීම වෙන්නත් පුළුවන්. කෙනෙක් ඔයා ගාව රැඳෙනවනම් රැඳෙන්නේ ආත්මීය හෝ භෞතික සම්බන්දතාවය නිසා. ඇයට/ ඔහුට අවශ්‍ය වන ආත්මීය හෝ භෞතික සම්බන්දතාවය නොමැති නම් ඔහු අපෙන් ඈත් වෙනවාමයි. කෙනෙක් අපි ගාවට එන්නේ ඔහු/ ඇය සතුටින් ඉන්නයි. ඔබට ඔහුව හෝ ඇයව සතුටින්, සැහැල්ලුවෙන් තියන්න පුළුවන් වගේම ඔහුගේ/ ඇයගේ භෞතික අවශ්‍යතාවයන් සපුරාලන්නට හැකි වන තාක්කල් ඔහු ඇය ඔබ ළඟමයි.

ස්තුතියි හැමදෙනාටම