අසාර්ථක සම්බන්ධතා - 5% for SL - Charity

ආයුබෝවන් යාලුවනේ,

කොහොමද ඔයාලට, හැමදෙනාම හොඳින් සුවෙන් නේද. ඊයෙ අම්මා කඩේ ගිහින් ඇවිත් මට කියනවා ''රංජනී ඇන්ටිගෙ දුව පැනඩෝල් බීලා'' කියලා. මම හිටියේ වෙන කල්පනාවක නිසා ගත්කටටම මම ඇහුවේ ''ඇයි ඔළුවේ කැක්කුමකට ද''කියලා. අම්මා ටිකක් විතර ඇස් පුංචි කරලා කිව්වේ ''නෑ දුවේ එයා මැරෙන්න හිතලා බීල'' කියලා. මට නම් බයත් එක්ක පුදුමයක් ආවා. ඒ ළමයා එහෙම කරන්න හේතුව වෙලා තියෙන්නේ ආදර සම්බන්ධතාවය බිඳ වැටීම නිසා ලු.

යාලුවනේ, ඒ සිය දිවි හානි කර ගන්න තැත් කරපු නංගිට අවුරුදු දාසයයි. නිකමට හිතුවොත් මේ සම්බන්ධතාවයට අවුරුදු තුනක් හෝ ඊට වැඩි වෙන්නත් පුළුවන්. අඩු වෙන්නත් පුළුවන්.මොකද අද කාලේ ළමයි බොහෝ අඩු වයසින් මෙවැනි බොළඳ සම්බන්ධතා පටන් ගන්නවනේ. ඇත්තමයි අපිට ඔය කාලේ ඔය වගේ මානසිකත්වයක් තිබුණේ නැහැ. ළමා කාලය, නව යොවුන් අවදිය උපරිම සතුටින් ගෙවපු අය තමයි අපි. දැන් ඉතින් පැනඩෝල් බිවුවා කියලා මැරුණද ,තාම නෑ. වෙන්නත් එපා. මෙවැනි සිය දිවි හානි කර ගැනීමට තැත් කරන අයට සිදුවන අනතුරුවලදී රෝහල් ගත කිරීමක් සිදු කරනවා. රෝහලේ මෙවැනි අයට ඉතා සුහද පිළිගැනීමක් ද තියෙන්නේ. ආමන්ත්‍රණය ආදරණීය ද. කවදාවත් නැහැනේ. මොකද ඒ ඉන්නේත් අම්මා,තාත්තා වැනි වැඩිහිටියෝ. ඒ හැම දෙනාටම සාධාරණ කේන්තියක් එනවනේ. මොකද තරුණ කෙනෙකුගේ ජීවිතයේ වටිනාකම තරුණයෙකුට වඩා ජීවිතේ පරිණත වෙච්ච වැඩිහිටියෙකුට තේරෙනවා. දැන් ඉතින් පැනඩෝල් බිවුවා කියලා සම්බන්ධතාවය පවත්වාගෙන ගිය ඒ පිරිමි ළමයා මේ නංගි ගාවට ඇවිත් හිත සනසයි ද. බුද්ධිමත් දෙමව්පියෝ, සහෝදර සහෝදරියො හිටියොත් මේ ප්‍රශ්නය වැදගත් විදිහට විසඳාවි. එහෙම නැති වුණොත් ප්‍රශ්නය විසඳනවා වෙනුවට කැති පොලු අරගෙන තවත් ප්‍රශ්නයක් ඇති වේවි.

ඉතින් මේ සම්බන්ධතා බිඳ වැටීම් වලට වයසක් අදාළ නොවෙන්නත් පුළුවන්.ශිෂ්‍යයෝ වගේම වෘත්තියක නියැළෙන්නෝ ද වෙන්න පුළුවන්. ඉතින් මෙවැනි සම්බන්ධතාවයක් බිඳ වැටීම හේතු කොටගෙන ඔබේ සාර්ථක ගමනට යන්න තියෙන කාලය නැති කර ගන්නේ ඇයි.

හැර ගිය කෙනා කිසියම් දවසක ඔබ ළඟට එන්නත් පුළුවන්. නොවෙන්නත් පුළුවන්. දුකක්, කනගාටුවක් තිබෙනවා තමයි. නමුත් හිත හදා ගැනීමයි වැදගත්. එසේ නොමැතිව අනාගතයම අවුල් ජාලයක් කර ගත්තොත්, එන්න හිතන කෙනෙක් වත් එන්නේ නැහැ. ඉතිං මේ බිඳවැටුණු සම්බන්ධතාවය නිසා අදාළ පුද්ගලයා පිස්සු නටලා එනකන් කාලයත් නැවතී බලන් ඉන්නවද,නෑනෙ. පෙරට වඩාත් ධෛර්යමත්ව ජීවිතේට මුහුණ දෙන්න. ඔය කියන සම්බන්ධතාවය පටන් ගන්නකම් ඔබත් එක්ක සිටි අය කවුද. ඔබේ ආදරණීයන්. දෙමව්පියන්, සහෝදර සහෝදරියො, යාළුවො වෙන්න පුළුවන්. හිතන්න ඔබේ අඩුපාඩු හදාගන්න. ඔබේ දුර්වලතාවයන් නිවැරදි කරගන්න. අවසානයේ ඔබ සාර්ථක වූ පසු ඔබව ප්‍රතික්ෂේප කරපු අය, ඔබත් සමග අමනාප වූ අය නැවත එන්න පුළුවන්. ඒ නිසා හොඳම දේ වන්නේ නොනවතින කාලය උපරිම ප්‍රයෝජනයට
අරගෙන, ඔබ ඔබ ගැන සිතමින් නිවැරදි වන්න. සාර්ථක වන්න. ජයගන්න ජීවිතය. ඔබට හොඳම කෙනා ලැබේවි.

ස්තුතියි හැමදෙනාටම.