Assamualaikum warahmatullah
Jaroe dua blah ateuh jeumala
Jaroe lon siploeh di ateuh ulee
Meuah lon lakee bak kawoem dum na
Peu izin keu lon wahee dum rakan
Lon keumeung peutrang na bacut haba
Syarat puasa ulon seubot wahe rakan
Nyan phoen Iseulam nyan bek sagai lupa
Tatoep teupong gulong keu timphan
Baloet oen pisang lheuh taboeh saka
Teuma keudua ulon seubot wahee rakan
Baleg lheuh nyan syarat geutayoe puasa
Boeh timon bruek boeh timon phang
Timon panyang di dalam raga
Nyan keu lhee ulon seubot wahee cut bang
Beu meuakai geutayoe syarat ta puasa
Watee ie paseung udeung meukawan
Dijak meureuntang di meingkuala
Nyan keu peut ulon seubot wahee rakan
Beu mampun badan wahee rakan syarat ta puasa
Sayang that Tangse lam glee ka sunyi
Bawang ngen campli hansoe le pula
Meumada oeh noe haba ulon rawi
Meuah e akhhi nye na salah haba
Tangse, 30 Mei 2018
