Moroccan travelers : شمهروش

🚫🏴🚫 شمهروش 🚫🏴🚫

فطريقنا لتوبقال وقعات لينا واحد الواقعة لي مبغاتش تنسا ليا وطيراتها منّي 😄.
المهم ضربناها من امليل متجي فين تطيح علينا الظلمة غير فشمهروش اضطرّينا نطونطيو تمّا مع سوّلنا واحد گالينا غتوصلو للروفيج تال العشرة ولا الحضاش دْلّيل يعني اللهُمّ نباتو فشمهروش والغذ ليه نتحركو ، ماعلينا قطعنا الواد ومشينا للجهة لخرى كاين تمّا غير الصخر مشينا تحت واحد الصخرة بان لينا بلّي فايت مطونطي فيها شي حد قبل منّا حيت لقينا فيها الفرْنة ديال العافية وبلاصة لاطونت والأهم من هادشي لقينا واحد الموس 🔪 هزيناه خدمنا بيه طيبنا تعشينا حطينا المقلة والبراد والعواشق والموس وداكشي ورا لاطونت تال غذا ونغسلوهم ، دخلنا لاطونت نعسنا ، ديك الوحدة ديال الليل انا مرّة مرّة تضربني الفيقة مع الغربان كانو تمّا علجّهد ،شوية تنسمع شي حجر بدا تيطيح من بلاصتو بحال الا شي واحد نازل منهم ، گلت "غيكون غا البرد نعس نعس " بدات كتدّيني الغمضة شوية ونا نسمع شي حد تيبقشش فالمّاعن لي على برّا (حدا راسي ) ، صافي جمدت بدا داكشي بحال اِلا هز موس وبدا تيمضّي فيه مع المقلة ، بديت تنغز فالدّري باش انوض تاهو عل القرص جمد فبلاصتو ملي سمع تاهو الصوت ، القفقافة شادّانا كنتسنّاو غير دوك المّاس اتخشاو فينا هههه ، بقينا شوية وهو اتقطع الحس بقينا طالقين وذنينا تا دّانا النعاس فقنا الصباح خرجنا نتفقدو المّاعن ياكما طرگوهم 😅 ، وتصدمنا ملّي لقينا كلشي فبلاصتو إلاّ دااااك الموس لي لقينا البارح فداك القنت 😨 ، مع العلم انه كان موس ديالي وديال الدري تاهما مع المّاعن !!!!!! بقينا غااا تنشوفو 😳
حيّدنا حوايجنا مشينا تلاحينا فداك الما ديال الثلج وگلاااااااص حيدنا بيه الخلعة 😂😂😅