သူစိမ်းဆန်သောရနံ့ကို ရှူရှိုက်လိုက်ရသည် ။
ပထမရနံ့က စူးရှပြင်းထန်သော ပန်းကြွေရနံ့ ။ သွေးစုပ်ဖုတ်ကောင်က နမ်းသောပန်းမျိုး ဖြစ်လိမ့်မည် ။ စိတ်ထဲမှ စူးစမ်းရင်းဖြင့် အဖြေမှန်ကို သိလာသည် ။ အသုဘပန်းခွေ၏ ရနံ့ဖြစ်သည် ။
ဒုတိယရနံ့က ညှီစို့စို့ရနံ့ ... ။ လင်းတတို့၏ ကိုယ်သင်းရနံ့နှင့်ဆင်သည် ။ တစ်ချက် နှစ်ချက် အသက်အောင့်ပြီးမှ ခပ်ပြင်းပြင်းပြန်ရှူကြည့်သည် ။ ထိုအခါကျတော့လည်း ဝေခွဲ၍ ရသွားသည် ။ shroud ဟု ခေါ်သော လူသေပတ်သည့် အဝတ်မှ လာသောရနံ့ဖြစ်သည် ။
တတိယရနံ့ကတော့ အဆိုးဆုံးဖြစ်လေ၏ ။ ဘီလူးတစ်ကောင်၏ အာပုတ်နံ့နှင့်တူသည် ။ သရဲများသောက်သော ဝိုင်အရက်နံ့နှင့်လည်း တူသည် ။ နောက်ဆုံးမှာ လုံးလုံးလျားလျား ခွဲခြားလိုက်နိုင်သည် ။ လူသေရနံ့ဖြစ်လေသည် ။
ထိုရနံ့များက မည်သည့်အရပ်ဆီမှ လွင့်ရှားလာပါသနည်း ။ အနီးအရပ်ကိုကော အဝေးအရပ်ကိုပါ ယောင်ယောင်ရမ်းရမ်း လှည့်ပတ်ကြည့်မိ၏ ။ အဘယ်သို့သော အနိဠာရုံတောအုပ်မှာ အဘယ်သို့သော ကျိန်စာလေပြည်တွေက အဆုပ်လိုက်အခဲလိုက် တိုက်ခတ်နေသနည်း ။ ဘယ်လိုမီးတောက်တွေက အရိုးကောက်ထွက်လာကြသနည်း ။ အိုး .. အဖြေကို သိပြီးနောက်မှာ သူ ချောက်ချားသွားသည် ။ သူသိလိုက်ပြီ ။
ထိုရနံ့သုံးမျိုးလုံးသည် သူ့ထံမှပဲ ထွက်ပေါ်နေခြင်းဖြစ်သည် ။ သေခြင်းတရား၏ အဆင့်အတန်း မခွဲခြားမှုကို သူနားလည်ပါသည် ။ တရားဓမ္မအရ မဟုတ်သည့်တိုင် လောကဖြစ်စဉ်အရ သူနားလည်ပါသည် ။ မည်သို့ပင်ဖြစ်စေ သူ့အတွက်ကတော့ မောလွန်းလှသည်ဟု ထင်သည် ။
ထိုသို့ဖြင့် ...
သင်္ချိုင်းဆီ ...
သူထွက်လာခဲ့တော့သည် ။
သင်္ချိုင်းက အရိုင်းဆန်ဆန်လှပနေသည် ။ (အေးစက်သောမျက်လုံးများဖြင့် အဘိုးအိုတစ်ယောက်က ခါးကုန်းပြီး နှုတ်ဆက်သလို) " အမင်္ဂလာပါ "ဟု ဆီးကြိုနှုတ်ဆက်၏ ။ သူလည်း လက်နှစ်ဖက် နောက်ပစ်ပြီး သေမင်း၏ သွားစွယ်များလို ထိုးထိုးထောင်ထောင်ဖြစ်နေသော အုတ်ဂူဖြူဖြူများရှိရာသို့ ထွက်လာခဲ့တော့၏ ။
အုတ်ဂူများကို လိုက်လံလေ့လာနေမိသည် ။ အုတ်ဂူနံရံမှာ သေဆုံးသူ၏ အမည်နာမနှင့်အတူ သူတို့၏ အယူအဆများကို ရေးထိုးထားသည် ။ လေ့လာရတာ စိတ်ဝင်စားစရာကောင်းပါသည် ။
ပထမဆုံး စတင်လေ့လာမိသည့် အုတ်ဂူက “ ဝီလျှံအီးဝါ့တ်ဂလတ်စတုံး ” ၏ အုတ်ဂူ ဖြစ်သည် ။ အင်္ဂလန်ဝန်ကြီးချုပ်ဟောင်း တစ်ယောက်ဖြစ်ကြောင်း သူသိပါသည် ။ သူ့ အုတ်ဂူမှာ သူ့အယူအဆကို ရေးထိုးထားသည် ။
သူမျက်မှောင်ကြုတ်ပြီး စဉ်းစားမိသည် ။ “ လူတော်တွေ လူကြီးလူကောင်းတွေ မဖြစ်ချင်နေပါ ..... အမှားတွေကိုတော့ မကျူးလွန်ချင်ပါ ”
နောက်အုတ်ဂူကတော့ သူ အင်မတန်လေးစားသော အိန္ဒိယ အမျိုးသားခေါင်းဆောင်ကြီး “ မဟတ္တမဂန္ဒီ ” ၏ အုတ်ဂူ ဖြစ်သည် ။ ၂၀ရာစု၏ ဒုတိယအကြီးမြတ်ဆုံး ပုဂ္ဂိုလ်အဖြစ် သတ်မှတ်ခံထားရသူလည်းဖြစ်သည် ။ သူ့ အုတ်ဂူမှာ ရေးထိုးထားသော စာသားကလည်း အေးချမ်းမွန်မြတ်လှ၏ ။
“ ဘုရားကို တို့ကြောက်ကြစို့ ဒါဆို လူတွေကို တို့ကြောက်စရာ မလိုဘူး ”
သူ ခေါင်းတညိတ်ညိတ် တွေဝေနေမိ၏ ။ ခေါင်းတခါခါလည်း တွေဝေမိပြန်သည် ။ သူက ဘုရားကို ကြောက်ပါသည် ။ သို့သော် လူတွေကိုလည်း ကြောက်ဆဲဖြစ်၏ ။ နည်းနည်းတော့ ခက်နေသည် ။
အုတ်ဂူတွေက အများကြီးဖြစ်နေသည် ။ အကုန်လုံးကို သူလိုက်မကြည့်နိုင် ။ ဂူကြိုဂူကြားမှာ လျှောက်သွားရင်း လမ်းကြုံသလောက် ထိုအထဲကမှ သူ့ကို ဆွဲဆောင်မှုရှိသလောက် အုတ်ဂူများကိုသာ လိုက်လေ့လာမိသည် ။ သူ့ အနေအထားက သင်္ချိုင်းစာဖတ်သူ တစ်ယောက်နှင့်ပင် တူနေသည် ။ သို့သော် သူသည် သုတေသီမဟုတ် ။ အသက်ရှူခွင့်ရနေသေးသော သေလူသာ ဖြစ်သည် ။
အချို့စာသားတွေက လှပသလို ပြုံးစရာကောင်းသည် ။ ဥပမာ ဆိုကြပါစို့ ... ။ “ ဘာသာအာဒမ်ဘတ်ကပ်စ် ” ဆိုသူက ရေးထိုးထားသည် ။ “ သောကတွေကို သေတ္တာထဲ ထည့်ပိတ်ပါ ။ ပြီး ထိုသေတ္တာပေါ်မှာ ထိုင်ပြီး ရယ်နေလိုက်ပါ ” တဲ့ ... ။ အဲဒါကတော့ ထားပါတော့ ... ။ သူလည်း ရယ်ပြီးရော သေတ္တာကြီးကပါ ထ,ရယ်လျှင် မည်သို့ လုပ်မည်နည်း ။ ထိုသို့ တွေးပြီး သူ့မှာ ရယ်ရခက် ငိုရခက် ဖြစ်ရသေးသည် ။
အမေရိကန်သမ္မတ ရုစဗဲ့၏ သင်္ချိုင်းစာကျတော့ တစ်မျိုး ။ အမေရိကန်နိုင်ငံ၏ ၃၂ ဦးမြောက် သမ္မတဖြစ်၏ ။ အုတ်ဂူမှာ သူ့နာမည် အပြည့်အစုံအဖြစ် “ ဖရန်ဘလ်ဒီလာနိုရုစဗဲ့ ”ဟု ရေးထိုးထားသည် ။ ထိုအမည်၏ အောက်မှာ“ လူတွေဟာ ကံရဲ့အကျဉ်းသား မဟုတ်ဘူး ။ စိတ်ရဲ့အကျဉ်းသားဖြစ်တယ် ” ဟူသော စာသားကို ထွင်းထား၏ ။ ထောင်ဝင်စာကို ဘယ်သူက လာပေးသလဲ .... ဟု သူ တွေးမိပြန်သည် ။
“ ဝီလ်ဆင်ဗစ်နာ ” ဆိုသူ၏ အုတ်ဂူကိုလည်း တွေ့သည် ။ ထိုပုဂ္ဂိုလ်ကိုတော့ သူမသိချေ ။ ရိုးရိုးသားသား ဝန်ခံရလျှင် တစ်ခါမှပင် မကြားဖူးဘူး ။ သူ့ သင်္ချိုင်းစာက အသွားအလာ ကောင်းပါသည် ။
“ မင်း .... အမြင့်သို့ တက်ချိန်မှာ လူတွေကို ကောင်းကောင်းမွန်မွန် ဆက်ဆံပါ ။ ဘာကြောင့်လဲဆိုတော့ မင်းပြန်အကျမှာ သူတို့နဲ့ တွေ့ရဦးမှာပဲ ”
လောကဓံ၏အနိမ့်အမြင့် အတက်အကျကို တရားသဘောမျှတစွာဖြင့် ရင်ဆိုင်စေခြင်းဟု သူ နားလည်သဘောပေါက်ပါသည် ။ သို့သော် သူကပဲ ထော်လော်ကန့်လန့်နိုင်သည်လား မသိ ။ အတက်မှာ လူတစ်ချို့နှင့်တွေ့ပြီး အကျမှာတော့ အခြားလူများနှင်တွေ့ရတတ်သည့် မီးပုံးပျံဦးကျော်ရင်ကို ပြေးမြင်မိသည် ။
“ အမ်အက်ဖ်ကေဖစ်ရှာ ” ဆ်ုသူ၏ အုတ်ဂူမှာလည်း ရေးထားသေးသည် ။ ထိုစာသားကတော့ တစ်မျိုးကြီးဖြစ်၏ ။ “ ကမ္ဘာပေါ်မှာ သိနိုင်အခက်ခဲဆုံးအရာဟာ မခွဲရသေးတဲ့ ကြက်ဥပဲ ” တဲ့ ... ။ ဘာလဲဟ ... ။ ထိုစကားအရဆိုလျှင် ကြက်ဥမဟုတ်ပဲ တခြားဥဆိုရင်တော့ မရဘူးလား ။ ပြန်လှန်ပြောစရာကြီး ။
“ အော့စ်ဝေါလ်အေဗာရီ ” ဆိုသော ပုဂ္ဂိုလ်၏ အုတ်ဂူကတော့ မှောက်ရက်ကြီးဖြစ်သည် ။ အုတ်ဂူချင်းအတူတူ မြေကြီးကို ကုန်းနမ်းနေသည် ။သူ့ အုတ်ဂူနံရံမှ စာသားများနှင့်တော့ ကိုက်ညီပါသည် ။ “ မင်း ဘယ်အချိန် လဲကျ လဲကျ တစ်ခုခုကိုတော့ ကောက်ယူလိုက် ” တဲ့ ။ လဲကျပြီး သတိလစ်သွားလျှင် ကောက်ယူဖို့ မေ့သွားနိုင်ပါသည် ။ သတိရသည် ဆိုပါဦးဆို့ ။ စိန်ခဲ မြခဲကို မကောက်မိဘဲ ဟိုဒင်းအခြောက်ကြီးကို ကောက်မိလျှင် မည်သို့လုပ်မည်နည်း ။
မမျှော်လင့်ဘဲ “ ဒန်နီယယ်လ်ဒီဖိုး ”၏ အုတ်ဂူကို သွားတွေ့သည် ။ ကမ္ဘာကျော် အင်္ဂလိပ်စာရေးဆရာဖြစ်၏ ။ သူလည်း လေးစားစရာကောင်းသော စာရေးဆရာဖြစ်သည် ။ သူ့အုတ်ဂူပေါ်မှ စာသားကို မျက်လုံးစူးစူးနှင့် ဖတ်ကြည့်မိသည် ။ စာသားက ကောင်းသည် ။
“ အောင်နိုင်မှုကို ရသေတာဟာ အရှည်ဆုံးဓား မဟုတ်ဘူး ၊ အနက်ရှိုင်းဆုံးပိုက်ဆံအိတ် ” ထိုစကားအတိုင်း သူ့မှာ နက်ရှိုင်းသော ပိုက်ဆံအိတ် ရှိပါသည် ။ တစ်ခုတော့ရှိသည် ။ အထဲမှာ ပိုက်ဆံမရှိတာပဲ ခက်သည် ။
“ ပီတာယူစတီနော့ဗ် ” ဆိုသူကျတော့ တစ်မျိုး ၊ ကြံကြံဖန်ဖန် သူ့အုတ်ဂူကို အသည်းပုံ ဆောက်လုပ်ထားသည် ။ လူပျိုကြီးလား ၊ ဂေါ်မစွံကြီးလားတော့မသိ ။ သူ့ ဂူမှာရေးထွင်းသွားသည်က “ တစ်ခါ တစ်ခါကျတော့လည်း ရည်းစားထားချင်တယ် ။ ဒါမှလည်း ဘယ်သူဟာ ကိုယ့်ပြိုင်ဘက်ဆိုတာကို သိရမှာပေါ့ ” တဲ့ ... ။ သူ သတိလစ်ဟင်းသွား၍ ဖြစ်ပါလိမ့်မည် ။ အမှန်တော့ ကိုယ့်ပြိုင်ဘက်ဆိုတာ ကိုယ်ပဲ မဟုတ်ပါလား ။
“ စတီဗင်ရိုက် ” ၏ အုတ်ဂူမှာတော့ ရှေ့နောက်မညီသော စာသားကို ရေးထွင်းထားသည် ။ “ အရာရာတိုင်းကို မင်းမရနိုင်ဘူး ။ ရရင်ကော ဘယ်မှာ ထားနိုင်မှာ မို့လို့လဲ ” တဲ့ ... ။ အကြမ်းဖျဉ်း တွေးကြည့်လျှင်တော့ ဟုတ်သလိုလိုရှိသည် ။ စေ့စေ့တွေးလျှင်တော့ အမှန်နှင့် ဝေးလေသည် ။ အရာရာကို ရမှတော့ ( ထိုအရာရာထဲမှာ ) ထားစရာ နေရာကိုပါ ရပြီ မဟုတ်ပါလား ။
ထိုသို့ပင် သင်္ချိုင်းမြေ၏ လမ်းကွေ့ကောက်များမှာ သူလျှောက်သွားရင်းသင်္ချိုင်းစာများကို ဖတ်မှတ် စဉ်းစားသွား၏ ။ “ ဆိုင်ရီကွန်နော်လီ ” ၏ စာတမ်းကို သူ အတော်စိတ်ဖြာခွဲခြမ်းမိသည် ။ “ လမ်းလျှောက်သင်ခါစမှာတော့ ဘဝဆိုတာ ဝင်္ကပါကြီးပါပဲ ” တဲ့ ။ သူက ဖြည့်စွတ်စဉ်းစားမိ၏ ။ “ လမ်းလျှောက်တတ်ချိန်ကျတော့ ဘဝဆိုတာ ချောက်ကမ်းပါးကြီးပါပဲ ” ဟု ။ ( ဝင်္ကပါနှင့် ချောက်ကမ်းပါးသည် စာလုံးပေါင်းသာမက ဖြစ်တည်မှုတို့လည်း ခြားနားလေသည် ။)
အုတ်ဂူတွေ .... အုတ်ဂူတွေ .... သင်္ချိုင်းစာတွေ....သင်္ချိုင်းစာတွေ နောက်ဆုံးထွက်သက်တို့ ဝေ့ပတ်တိမ်းပွေသည်အထိ အမြောက်အမြား သူ ဖတ်ခဲ့ရ၏ ။
နောက်ဆုံးမှာ.....
သူချုပ်ငြိမ်းရမည့် အုတ်ဂူဆီသို့ .... သူရောက်လာသည် ။
သူ့ အုတ်ဂူကို ကြည့်ငေးရင်း မှောင်ညို့ညို့တွင် သက်ပြင်းကို သူချဖြစ်သည် ။ သူ့ အုတ်ဂူနံရံမှာ ဘာကိုမျှ သူမရေးပါ ။ ဗလာ ... ။ ထိုသို့ ဘာမှ မရေးခြင်းကပင် အပြည့်အစုံ ရေးခဲ့ခြင်းဟု သူခံယူသည် ။ ထိုသို့ဖြင့် သူ့ အုတ်ဂူကို သူဖွင့်ဝင်လိုက်သည် ။ နောက်ဆုံးဝင်သက်ကိုအပြင်းထန်ဆုံးရှိုက်သွင်းလိုက်သည် ။ ထွက်သက်ကလည်း ( သူ့ကို နှုတ်ဆက်လျှက် ) ထာဝရ ထွက်ခွာလေတော့သည် ။
လောကကြီးထဲမှာ သူ မရှိတော့ပါ ... ။ ဗလာ ... ။
ဂူသင်္ချိုင်းသည်လည်း မရှိတော့ပါ ... ။ ဗလာ ... ။
ထို့အတူ လောကကြီးသည်လည်း မရှိတော့ပါ ... ။ ဗလာ ... ။
တာရာမင်းဝေ
ဆရာတာရာမင်းဝေ၏ အလံမထူခဲ့သော လက်များ စာအုပ် စာနှာ ၅၉-၆၈ဆင့်ကူးယူ ရေးသားပြန်လည်မျှဝေပါသည်
