■ #ယီမင် အယ်လ်ကိုင်းဒါးက မြန်မာကို တိုက်ခိုက်ရန် တောင်းဆို ■
မြန်မာကို တိုက်ခိုက်မှုများ ပြုလုပ်ရန် ယီမင်နိုင်ငံမှ အယ်လ်ကိုင်းဒါး ထိပ်တန်းခေါင်းဆောင်တဦးက တောင်းဆိုခဲ့ကြောင်း အမေရိကန်အခြေစိုက် လေ့လာစောင့်ကြည့်ရေးဌာနတခုဖြစ်သည့် SITE က ဖော်ပြမှုကို ရိုက်တာ သတင်းတပုဒ်တွင် ဖော်ပြထားသည်။
အယ်လ်ကိုင်းဒါး၏ al-Malahem မီဒီယာဖောင်ဒေးရှင်းမှ ထုတ်ပြန်လိုက်သည့် ဗီဒီယိုတခုတွင် ယီမင်နိုင်ငံမှ အယ်လ်ကိုင်းဒါး ခေါင်းဆောင်တဦး ဖြစ်သည့် Khaled Batarfi က မွတ်ဆလင် ညီနောင်များကို ကူညီရေး “အလ္လာ၏ ရန်သူများ”ကို တိုက်ခိုက်ကြရန် ဘင်္ဂလားဒေ့ရှ်၊ အိန္ဒိယ၊ အင်ဒိုနီးရှားနှင့် မလေးရှားနိုင်ငံမှ မွတ်ဆလင်များကို တောင်းဆိုခဲ့သည်ဟု သိရသည်။ Khaled Batarfi က အယ်လ်ကိုင်းဒါးအဖွဲ့၏ အိန္ဒိယတိုက်ငယ် အဖွဲ့ခွဲ(AQIS) ကိုလည်း တိုက်ခိုက်မှုများ ပြုလုပ်ရန် တောင်းဆိုခဲ့ကြောင်း သိရသည်။
တပြိုင်နက်တည်းတွင်ပင် စက်တင်ဘာလ ၃ ရက်နေ့ မနက်ပိုင်းကလည်း အင်ဒိုနီးရှားနိုင်ငံ ဂျကာတာမြို့တော်ရှိ မြန်မာသံရုံးကို ဓာတ်ဆီဗုံးတခုဖြင့် ပစ်ခတ်ခဲ့သည့်အတွက် မီးအနည်းငယ် လောင်ကျွမ်းခဲ့ရကြောင်း ဂျကာတာ ရဲတပ်ဖွဲ့က ပြောသည်။
သံရုံး၏ နောက်ဘက်မှ လမ်းထဲတွင် ကင်းလှည့်နေသော ရဲအရာရှိတဦးက ဂျကာတာ စံတော်ချိန် မနက် ၂ နာရီ ၃၅ မိနစ်ခန့်တွင် အဆောက်အဦး၏ ဒုတိယထပ်တွင် မီးလောင်ကျွမ်းနေသည်ကို စတင်တွေ့ရှိရပြီးနောက် သံရုံး၏ ရှေ့ဝင်ပေါက်တွင် စောင့်ကြပ်နေသော ရဲအဖွဲ့ဝင်များကို အသိပေးခဲ့ခြင်း ဖြစ်ကြောင်း ဂျကာတာရဲအဖွဲ့က စက်တင်ဘာလ ၃ ရက်နေ့တွင် ထုတ်ပြန်ထားသည်။
မီးငြိမ်းသတ်ပြီးနောက် မီးစာတပ်ထားသည့် ဘီယာပုလင်းတလုံး ကွဲကြေနေသည်ကို ရဲတပ်ဖွဲ့က ဖော်ပြထားသည်။ ကျူးလွန်သူများက အခင်းဖြစ်ပွားသည့် နေရာမှ ကားတစီးဖြင့် ထွက်ပြေးသွားခဲ့သည်ဟု ရဲအဖွဲ့က ယူဆထားကြောင်းလည်း ရိုက်တာ သတင်းက ဆိုသည်။
ဂျကာတာ ရဲအဖွဲ့က အဆိုပါ ကိစ္စနှင့် ပတ်သက်၍ စုံစမ်းစစ်ဆေးမှုများ ပြုလုပ်နေကြောင်း ရဲတပ်ဖွဲ့၏ ပြောရေးဆိုခွင့်ရှိသူ Argo Yuwono က ပြောသည်။ တိုက်ခိုက်မှု၏ နောက်ကွယ်မှ အကြောင်းရင်းကို ရဲအဖွဲ့က စုံစမ်းနေဆဲ ဖြစ်သည်ဟု သိရသည်။
စက်တင်ဘာလ ၂ ရက်နေ့တွင် တက်ကြွလှုပ်ရှားသူတစုက အင်ဒိုနီးရှားနိုင်ငံဆိုင်ရာ မြန်မာသံရုံးရှေ့တွင် မြန်မာခေါင်းဆောင် ဒေါ်အောင်ဆန်းစုကြည်၏ နိုဘယ်လ်ငြိမ်းချမ်းရေးဆုကို ပြန်လည်ရုပ်သိမ်းပေးရေးအတွက် တောင်းဆို ဆန္ဒပြမှု ပြုလုပ်ခဲ့ကြောင်း အင်ဒိုနီးရှားအစိုးရ သတင်းအေဂျင်စီ ဖြစ်သည့် Antara က ရေးသားခဲ့သည်။
လတ်တလော မြန်မာနိုင်ငံသို့ ရောက်ရှိနေသော အင်ဒိုနီးရှားနိုင်ငံခြားရေးဝန်ကြီး H.E Ms. Retno L.P Marsudi သည် ယနေ့ နံနက်ပိုင်းတွင် နေပြည်တော် ဇေယျာသီရိဗိမ္မန်တွင် ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင်နှင့် တွေ့ဆုံကာ ရခိုင်ပြည်နယ်မြောက်ပိုင်းအရေး ဆွေးနွေးခဲ့ကြသည်။
တွေ့ဆုံရာတွင် သြဂုတ်လ ၂၅ ရက်နေ့မှ စတင်ဖြစ်ပွားခဲ့သည့် အကြမ်းဖက်မှု ဖြစ်စဉ်များကို ဆွေးနွေးပြီးနောက် ရခိုင်ပြည်နယ်အရေးကိစ္စတွင် လူသားချင်းစာနာထောက်ထားမှု အကူအညီပေးရေး ကိစ္စရပ်များအား အပြန်အလှန် ဆွေးနွေးခဲ့ကြကြောင်းလည်း သိရသည်။
Source: Irrawaddy News
Via: Thandar Theint
[ယီမင်နိုင်ငံမှ အယ်လ်ကိုင်းဒါး ထိပ်တန်းခေါင်းဆောင် Khaled Batarfi]