Salam alaikum wahee ee wareh
Nyoe saboh tambeh lon keuneuk rika
Soal teuraweh lon keuneuk tuleh
Meu padum bareh si alakada

Buleun puasa cukop that leubeh
So yang teuraweh jai that pahala
Oeh lheuh seumbahyang baca teusebeh
Bek dilei taweh nibak mushalla

Yang cukop gura wahee apasyeh
Jak bak teuraweh agam ngoen dara
Teubiet direumoeh baca sms
Yang agam ji preh bak jalan raya

Ijak bak jalan meucukeh-cukeh
Aleh pu teupeh jikhem meu ha ha
Agam ngoen dara cukop that bereh
Oeh woe teuraweh meuraba-raba

Yang ladom macam teungoeh teuraweh
Roet likoet ji eh ateuh mushalla
Igop yang laen laloe teuraweh
Di jih SMS laloe meucinta

Pubuet teuraweh bek keupiasan
Mita amalan nibak rabbana
Pubuet beu yakin wahee ee rakan
Fahla bak tuhan meulipat ganda

Fahla teuraweh hai tgk ampon
Kalheuh geu suson uleh ulama
Kalheuh geu tuleh mulai malam phoen
Ubena kandong ka geupeunyata

Pulom meurumpok lailatul qadar
Nibak malam nyan luar biasa
Soe pubut amai yang kebajikan
Imbalan tuhan meuribei fahla

Lailatul qadar hana soe tukri
Imum Syafi'ie na neu peunyata
Bak malam ganjei wahee ee akhi
Jeut neu peurati troek dua ploh sa

Nibak malam nyan sunyi han sakri
Dum roh yang suci geutroen u donya
Dan malaikat geutroen u bumi
Geudoeng meureuti bareh meubanja

Oeh watee shuboh baroe kembali
Keudeh bak rabbi laju neu gisa
Cukop bahgia dum ummat nabi
Yang pujoe rabbi Allah yang esa.

Aceh utara, 19 Mei 2018