SEUNANG HATEE LAM PUASA

Bak ta wet-wet hana teurasa
Buleun mulia jinoe ka tiba
Buleun yang goet siumu masa
Iman lam dada tapeuseumpurna

Uroe puasa seupoet meubuka
Hate geumbira hana pat peusa
Lheuh nyan TEURAWEH loem takeurija
Peunyaket dausa teupiroe dumna

Lheuh nyan 'oh sawoe tabeudoeh sigra
Hate han saba keu uroe tiba
Pajoeh bu sawoe ngoen keuluarga
Rasa bahgia di dalam dada

Teuma alheuh bu taniet puasa
Mangat seumpurna tujuan yang na
Seumbahyang suboeh bek tuwoe teuma
Keupue puasa seumbahyang hana

Meupat keuh jiduek puasa yang na
Nyoe tiang agama geutanyoe hana
Adak bochoe pruet bak tapuasa
Nibak Rabbana hana sapuena

Yang brat ta rindu buleun puasa
Keu uroe raya rakan sidumna
Na chit yang ladoem peugoet pue yang na
Jame jiteuka na pue peutaba

Ladoem toet karah meubanja-banja
Kuweh meuntega pih hanjeut lupa
Keuripep boh pisang geucang geumbira
Seumangat raya keu uroe raya

Teuma aneuk miet pih leupah subra
Marcoen ceulana ngoen beude raya
Meunyoe han geubloe jiroe ie mata
Sayang teuh raya jikuw'a-kuw'a

Na chit yang lucu yang toem ta rasa
Makmeugang tiba sang uroe raya
Bajee ka jisoek marcoen meubla-bla
Nyan dum bahgia peunoeh ngoen warna

Tajak bak teungku ta meu'ah desya
Loem bak syedara takunjoeng teuma
Samboet-meunyamboet leupah that meusra
Beunci yang kana hana meuhoe ka

Meunan keuh kisah buleun puasa
Bacut loen rika keu tanyoe dumna
Loen lakee meu'ah nyoe salah kata
Salah ngoen dausa meusoe yang hana