Ladies and Gentle Men,i bring una Peace from Almighty God Himself.
We don come again with our Tori for this week as e dey end today,we no come write some things this week via say school don come again with hin Wahala,but never the less we go Summarise all wetin happen wey consign football and premier league.As E be so we all know wetin happen through out this week like transfer,world cup warm up and the rest.
SUPER EAGLES [NAIJA] AND THEIR WAHALA FOR WC WARM UP
Few days back,Naija bin travel to play ball via world cup warm up with Czech Republic,all of us dey Vex,e no dey easy to dey support team and dem go dey mumu for pitch,sometimes we come dey wonder which kyn squad wey we get sef,to be honest with you people,our squad no get quality at all,the only thing wey just dey sweet me now be say our jersey na number 1 for the whole of africa and e dey for top 10 in the world..The question be say how we think say Naija go do for FIFA World Cup as we go jam Argentina Iceland and Croatia? for me wey dey write this thing now,i no go lie una i dey fear oo,if we go play Argentina and Croatia with this leg, omo we no go make am at all,but we get hope because we know as football dey be.So to summarize this one now on my own view,as we lose for England with England themself 2-1,we come lose again with Czech Republic 1-0 if you ask me i go say Naija no too dey ready,i go like want make dem shift the world cup sef.
MANCHESTER UNITED WITH THE FRED AND DIOGO DALOT!!!
Few days back,Manchester United don Announce Two signings,''Fred'' and ''Diogo Dalot''[DD],Fred na Brazilian and Diogo na Portuguese.The Transfer Money for Fred na £55m with extra £5m add on so the total money na £60m,Meanwhile,Diogo Dalot money na £19m.
As dem take talk am,dem say Dalot na the best young full back wey dey for Europe,you dey wonder how E take be true? no worry we go find out this coming season whether E good or not.
And information wey reach us recently be say Casemiro wey dey play for Real Madrid as defensive midfielder,give Manchester United new signing Fred better injury.As E dey be so,Manutd fans dey veeeeeeex unto say na their new signing,dem no want make anything do am at all,but no be serious one sha as the guy still dey for brazil world cup squad.
And another sweet news wey dey sweet ManU fans be say Manchester United don announce say dem go get women team but dem go start from lower division.On june 8,dem don announce the head coach wey go coach the women team,her name na ''CASEY STONEY.'' na she go dey incharge of the women team.
LEICESTER CITY JUST DEY SAMPLE THEIR NUNU [THEY DON JOIN THE NUNU GANG]
Just few days back,Leicester City don sign former Manchester united and Westbrom central defender,''Jonny Evans''.Evans wey captain westbrom last season no fit lead dem comot for relegation zone as no be hin fault,like i remember,Mancity,Arsenal and Manutd bin dey eye am but E come be say the transfer money too much[£30m]....To our greatest surprise,Leicester sign am for £3.5m to make matter worse dem go pay the Money small small as dem no fit pay am at once for now.
And last month,dem bin announce Adidas as their new kit sponsor [no wonder their money go down,dem no fit pay 3.5m pounds complete]
ARSENAL DON SIGN JUVENTUS RIGHT BACK FOR FREE TRANSFER
As we take know Arsene Wenger don comot Arsenal and Arsenal don appoint new coach,UNAI EMERY.As E take be,Arsenal new coach ''Unai Emery'' no dey waste time as E don land Juventus right back ''Stephan Lichtsteiner'' for free,as hin contract bin finish for juventus.
So many people believe say the Switzerland captain na better signing for Arsenal but how E go be sef? Bellerin go dey for bench? i no know oo because competition go dey for that position.
And another one wey consign Arsenal be say Arsenal don reach agreement with Adidas for kit,wetin I mean be say Adidas don become Arsenal new kit Sponsors,so as Arsenal take announce am,Adidas go begin dey produce for Arsenal Jersey from next season.
PREMIER LEAGUE FA,DON YARN SAY DEM GO DECLARE TWO WEEKS BREAK FOR FEBRUARY BUT E GO START FOR 2019/2020 SEASON.
As we take head am above,the FA,Premier league and EFL don come out with plan and new rule say dem go begin dey get their own break as other leagues get,but English football own wan turn another thing,because as others dey go for Christmas and New year break,Premier league still dey play as others dey resume from Christmas break,premier league dey go their own but if una ask me ehh,i go tell una say as others dey go the Christmas break,make English league follow them,ABI WETIN UNA THINK?
NOTE: All contents are Written and Analysed in Pidgin English [Nigerian street language]
FOLLOW ME AND HELP UPVOTE!!!!
thanks for vote me
Downvoting a post can decrease pending rewards and make it less visible. Common reasons:
Submit