Friends come with other blessing of Allah and remain with you till Allah is blessing upon you

ڈاکٹر نے جب میرے والد کے حقے پر پابندی لگائی تو والد نے حقہ گودام میں رکھوا دیا یوں دکان کی بڑی اٹریکشن اچانک ختم ہو گئی.
‘ انھیں دنوں ’’ایکس چینج‘‘ کی ’’اپ گریڈیشن‘‘
بھی شروع ہو گئی اور ہمارا فون بھی عارضی طور پر کٹ گیا یوں دکان کی دوسری اٹریکشن بھی ختم ہو گئی.
وہ لوگ جو روز صبح سویرے ہماری دکان پر آ کر بیٹھ جاتے تھے اور ان کی شام بھی اسی دکان پر ہوتی تھی وہ بھی اچانک غائب ہو گئے.

ہم جن کو والد کا انتہائی قریبی دوست سمجھتے تھے‘ جو لوگ ہمارے چاچا جی ہوتے تھے‘ جو گلی میں داخل ہو کر اونچی آواز میں چوہدری صاحب کا نعرہ لگاتے تھے اور جو گھنٹوں ہمارے والد کی تعریفیں کرتے تھے‘ وہ سب بھی غائب ہو گئے‘ ہم ان کی شکلیں تک بھول گئے‘ میرے والد سارا دن دکان پر اکیلے بیٹھے رہتے.

میں اس وقت پرائمری اسکول میں پڑھتا تھا‘ میرے کچے ذہن کے لیے یہ صورتحال ہضم کرنا مشکل تھا .
میں ایک دن والد کے پاس بیٹھا اور میں نے ان سے پوچھا.
’’ابا جی آپ کے سارے دوست کہاں چلے گئے ہیں؟‘‘
میرے والد نے غور سے میری طرف دیکھا، میری آنکھوں میں اس وقت آنسو تھے.
میرے والد نے رومال سے میری آنکھیں صاف کیں، سر پر ہاتھ پھیرا اور بڑے پیار سے کہا...

’’بیٹا یہ لوگ میرے دوست نہیں تھے. یہ حقے اور ٹیلی فون کے دوست تھے. حقہ بند ہو گیا ‘ ٹیلی فون کٹ گیا ‘ یہ لوگ بھی کٹ گئے. جس دن ٹیلی فون اور حقہ واپس آ جائے گا ‘ یہ لوگ بھی اس دن واپس آ جائیں گے‘‘
میرے کچے ذہن نے یہ فلسفہ سمجھنے سے انکار کر دیا. میرے والد نے میرے چہرے کی گومگو کیفیت پڑھ لی.
وہ بولے " بیٹا یاد رکھو ! اللہ تعالیٰ جب آپ کو کوئی نعمت دیتا ہے تو یہ نعمت اپنے ساتھ نئے دوست لے کر آتی ہے لیکن ہم نعمت کے ان دوستوں کو اپنا دوست سمجھ بیٹھتے ہیں. یہ ہماری بے وقوفی ہوتی ہے. یہ نعمت جس دن چلی جاتی ہے‘ یہ سارے دوست بھی رخصت ہو جاتے ہیں. "

میرے والد نے اس کے بعد شاندار نصیحت کی‘ انھوں نے فرمایا ....
’’بیٹا آپ کا اصل کمال یہ ہو گا آپ نعمتوں کے دوستوں کو نعمتوں کا دوست رہنے دو‘ آپ ان لوگوں کو کبھی اپنا دوست نہ بننے دو‘ تم زندگی میں کبھی مایوس نہیں ہو گے‘‘
میرے والد نے فرمایا ....

’’بیٹا آپ کار کے دوستوں کو کار کا دوست سمجھو. کاروبار کے دوستوں کو کاروبار کا دوست سمجھو اور اپنے عہدے کے دوستوں کو عہدے کا دوست سمجھو‘ ان لوگوں کو کبھی اپنے دل تک نہ پہنچنے دو‘تمہارا دل کبھی زخمی نہیں ہو گا‘ تم کبھی خون کے آنسو نہیں روؤ گے‘‘.