Ang Huling Awooo

larawan mula sa

Tulog na! 'Nay! 'Tay!
Ako na ang magsisilbing ilaw na gabay
Sa kadiliman ng gabi, sa pagpupuyat ako'y sanay
Handang magmatyag, masigasig na magbantay
Masiguro lamang ang himbing sa inyong pagkakahimlay

Tulog na! Tsong! Tsang!
Mga alaga n'yong hayop na nagkakanda-ubusan
Na sa umaga'y masusumpungang nabawasan ang bilang
Nakawala sa kulungan, pugot ang ulo, wakwak ang tiyan
Mas masahol pa sa hayop pumaslang ang may kagagawan

Tulog na! Ate! Kuya!
Matikas pa sa sundalo, ako'y magsisilbing gwardya
Upang ang bayan nating muli'y maging payapa
Sa mga mapagsamantala ako'y 'di palulupig, 'di pasisila
Kasamaang kanilang tinataglay, buong pwersa kong pinupuksa

Ang aming munting nayon, noo'y tahimik at payapa
Biglang nabulabog ng iyakan, sigawan at mga haka-haka
Sa kalaliman ng gabi ay may gumagala
Isang kakaibang nilalang na sa kadilima'y namamalakaya

Kabilugan ng buwan kung ito'y mambiktima
Kasabay ng alulong ng aso, kaluskos ng dahon at tunog na kakaiba
Nakakakilabot, nakakapanindig-balahibo ang kanyang hitsura
Sabi-sabi ng mga matatanda na sa kanya'y nakakita

Sa porma ng aso, pusa, malaking ibon at baboy ramo
Matatalas ang pangil, mahahaba ang kuko
Mabilis kung kumilos, matulin kung tumakbo
Sa isang kisapmata'y mapupunta agad sa likuran mo

Isang Biyernes Santo nang siya'y aking makasagupa
Tangan ko ang sibat at itak na bagong hasa
Nagtamo ako ng mga kalmot, sugat at mga pasa
Pero siya'y aking napuruhan, tagos ang sibat na sa dibdib ay tumama

Umuwi ako ng bahay upang salubungin ang asawa
Bakas sa aking mukha ang pagod ngunit hatid ang magandang balita
Nagapi ko ang kampon ng kadiliman sa aming pagdidigma
Ngunit ano itong bumungad sa akin? Sadyang 'di ako makapaniwala

Aking asawa'y nasaksak, duguan sa bandang puso
Sino ang may gawa? Hindi ko matanto
Ito ba ang magiging kapalit ng aking sakripisyo?
Sino ang may sala? Maghihiganti ako!

Nakayapos ako sa kanya nang bawian siya ng buhay
Aking kinarga sa mga bisig katawan ng mahal kong nakahandusay
Isang garapon ng langis, sa aking pagtayo ay napalaylay
Nahulog mula sa bulsa ng bestidang aking ibinigay

Sa pagkawala ng aking irog, nanumbalik ang katahimikan
Ang dating lagaslas ng mga bagwis na naghahatid ng katatakutan
Wala ng magiging biktima ng patayan at karahasan
Nagkukubli na muli ang munting nayon sa dating nakagawian

Paalam aking mahal, isa ka palang aswang!

larawan mula sa

---

_{Lubos kong naibigan ang tula ni kuyog hangin na pinamagatang Awooo kaya naman gumawa ako ng isang tula upang sagutin o dugtungan at bigyan ng kakaibang kwento ang pagsalakay ng Aswang na nambibiktima. Salamat din kay @torania sa paglalathala ng mga sulatin ni kuyog hangin dito sa Steemit.}