Lubos ang aking pagpapasalamat kay kabayang @jassennessaj para sa kanyang patimpalak na naging daan upang makagawa ako ng isang tula na buong puso kong inaalay para sa aking ina. Kailanman ay hinding hindi matumtumbasan ng anumang salita o anumang tula kung anong pasasalamat ko sa aking minamahal na ina. Pero kahit man lang sa tulang ito na aking nagawa ay maipahayag ko sa iba kung gaano ako kaswerte sa aking ina na kailanman ay hindi sumuko sa akin. Sapagkat ang kanyang mithiin ay ang makita akong masaya at ang aming pamilya. At alam ko na darating din ang araw na masusuklian ko lahat ng sakripisyo na ginawa niya para sa akin. Mabuhay lahat ng mga dakilang ina!
(Larawan ng Aking Minamahal na Ina)
Makalipas ang siyam na buwan sa kanyang sinapupunan
Ako ay kanyang iniluwal at tuluyang nasulyapan
Kasiyahan sa kanyang mukha ay hindi matutumbasan
Ngiti sa kanyang mga labi abot hanggang kalangitan
Walang humpay niya akong inaruga at inalagaan
Sapagkat kanyang pagmamahal sa akin ay ilalaan
Pangangailan ko’y kanyang parating inuuna
Hindi iniinda kahit wala ng matira para sa kanya
Mabuting asal ang sa akin ay kanyang ipinamalas
Upang ako ay hindi maligaw ng landas
Siya ang nagsilbi kong ilaw at gabay
Sa ‘king patuloy na paglalakbay sa buhay
Kailanman ay hindi siya nawala sa aking likuran
Dahil tanging hangad niya ay ang maganda kong kinabukasan
Ako’y isa sa kanyang pinakamahalagang kayamanan
At hindi niya magagawang iwanan
Buong buhay ako ay di magsasawang magbigay pugay
Para sa taong sa akin ay nagbigay buhay
Salitang salamat ay kailanman ay hindi magiging sapat
Para ako sa kanya ay magpasalamat
Ipagsisigawan at ipagmamalaki ko sa buong mundo
Ang walang pagsubli kong pagmamahal sa isang tao
Hinding-hindi kailanman ipagpapalit sa iba
Natatangi at minamahal kong ina