Para kang Jun (A Cebuano letter to my Father)

Para kang Jun,

Nakahinumdom ka atong Grade 2 pako? Katong gihawiran nimu akoang kamot dayon mura nakog nabitay, imuha dayun kong gibunal-bunalan ug bakos. Pagkahuman ato nasamad akoang paa dayun hangtud karun naa pa gihapon ang piklat apan dugay rang nangwala ang mga labhag nga nagpatilaw sa akoa sa kahapdos sa imung disiplina. Sa kadugay sa panahon wala nako to nalimtan ug sa pag-abot nako sa kahamtong nakasabot nako nganong nabuhat kay lage grabi kakalasan nako ug papel ug lapis atong mga tuiga. Ug karun nakabalo ko nga di pud lalim mangitag kwarta.

Pa, karun nga ang imung ulit nga tawo ulitawo na medyo nakabalo na pud ko sa mga gamay o bisan pa gani sa dagkong butang dinhi sa kalibutan. Katong imuhang kapildihon sauna nga hinungdan kung asa ta karun, ang imung mga baroganan sa kinabuhi aduna ko'y gisundan, aduna pud ko'y wala giuyonan. Wala ko nawad-an ug amahan apan si Mama nagsugod nag nabanhod ang iyang gugma. Kabalo man ko nga ang sakit sa iro di malikayan apan paningkamoti nga mabalikan tawon nimu si Mama kay sa ultimaora ug sa katiguwangon sangkoan raman gihapon nimo siya.

Ingrato ra pud ko kung muingon ko'g wala kay natabang sa amoa. Pero bitaw ang imuhang mga gipangtudlo sauna ang uban wala ra namo nalimtan ug naa pa gihapon sa amoang dughan. Naa mi o ako madunggan nga bati kabahin sa imuhang mga binuhatan karun pero kinsa man sila nga mo estorya'g nga halos man gani wala sila kaila sa imuha. Bisan man naa ko'y pagsalig sa imo ayaw tawon pakyasa ang amoang pagsalig ug himoon ming kiko sa umaabot nga panahon. Salig lang sa akoa nga nakasabot nako nimu o maskin lang nga musalig ka sakoa isip usa nimu ka anak.

Salamat sa tanan ug sama sa giistorya ni Laurencio Canlom Sr. "Magpabilin tang yano ug ligdong"

_{Image Source}

Imuhang anak,
Louie

---