SÖZÜ

Nə qədər ki hələ söyləməmisən,
Keçir yaxşı-yaxşı nəzərdən sözü.
Sözə hörmət elə o kütləşməsin,
Çalış salmayasan kəsərdən sözü.

Kimi nə ağlına gəldi, danışdı,
Mənasın bilmədi-bildi, danışdı.
Danışdıqca elə güldü danışdı,
Saldı zalım oğlu dəyərdən sözü.

Olsa da mücərrəd, sözü dəqiq ver,
Ona uyğun sənə veriləcək yer.
Ölç-biç, götür-qoy, bir də çək-çevir,
Hazırla axşama səhərdən sözü.

Sözü söyləməmiş sahibkarısan,
Söylədinsə getdi, əsirgarısan.
Mirfayaz sən də söz xiridarısan,
Cilala şeirlə de hərdən sözü.

Mirfayaz Likməkani
15.12.2021