Literaturang-Filipino: Sa C.R. --- Maikling Kuwento

Nagbibigay ng pagsusulit si G. Bert sa kanyang mga mag-aaral na kumukuha ng kursong Medical Technology sa isang paaralan sa Davao. Tahimik ang buong silid dahil abala sila sa pagsagot ng mga tanong. Pero si Mika ay hindi mapakali dahil naiihi na siya kaya kinuha niya ang atensyon ni G. Bert.

Pinagkunan ng Larawan

"Sir pwede ho bang lumabas? Mag C-CR lang ho ako." wika ni Mika.

"O sige pero bumalik ka kaagad. Kung kailan ba naman kasi nagsisimula na ang pagsusulit tyaka ka pa maiihi."

"Sir pasensya na ho talaga. Babalik ho ako agad."

"O siya sige umalis ka na."

Matapos pinayagan ng guro ay dali-dali niyang tinahak ang daan papunta sa palikuran ng kanilang unibersidad. Nang nakarating sa paroroonan, naghintay pa si Mika dahil may naunang babae sa kanya. Lumipas ang sampung minuto ngunit hindi pa rin lumalabas ang babae kaya naisipan ni Mika na katukin na lang ang pinto. Hindi pa man niya tuluyang nailapat ang kanyang mga kamay sa pinto ay napansin niyang hindi naman pala ito nakasara kaya tinulak nya pero laking pagtataka nya ng mapansing wala naman talagang tao sa loob. May halong pagtataka man ay ipinagsawalang bahala na lamang nya yon dahil parang puputok na ang kanyang pantog dahil ihing-ihi na siya.

Nasa kalagitnaan pa lamang siya ng kanyang pag-ihi nang may narinig siyang nagsasalita.

Pinagkunan ng Larawan

"Miageru! Miageru!" boses ng isang babae ang kanyang naririnig na paulit-ulit lang ang sinasabi. Nang lumabas na siya ay napansin nyang wala namang tao pero may nagsasalita pa ring babae. Tumakbo na lang si Mika dahil may mga kailangan pa pala siyang sagutan at higit na mas takot siya sa kanilang guro.

Malayo pa lang ay kitang-kita niya na ang guro niyang nakatayo sa may pintuan na inip na inip at nang makalapit na siya,

"Miss Mika, ilang dram ba ng tubig ang inihi mo at inabot ka nang halos labimpitong minuto?"

"Sir ganito po kasi yung nangyari ......" Ikinwento niya sa guro ang mga pangyayari kaya siya natagalan.

"Mika, hindi ka ba nakakaintindi ng Nihonggo?" tanong ni G. Bert.

"Hindi po sir."

"Buti na lang pala. Ang miageru kasi ay salitang hapon na ang ibig sabihin ay tumingin ka sa taas."

Parang nanlamig ang buong katawan ni Mika matapos marinig yon. Hindi nya alam kung ano ang maaaring makita nya sa taas ng CR.

Pinagkunan ng Larawan

"Mika, pumasok ka na. Bukas ka na lang mag-exam dahil patapos na rin naman ang oras."

Pumasok na siya sa kanilang silid-aralan pero bakas pa rin sa kanyang mukha ang naghalo-halong emosyon. Parang lutang at nakatitig lang sa kawalan.

Dati palang paaralan ng mga haponesa ang kinatitirikan ng kanilang unibersidad noong kasagsagan nang pamumuno ng mga dayuhang hapon at hindi lang si Mika ang nakaranas nang ganitong mga pangyayari kundi maging ang kanilang guro rin. Magbuhat noon hindi na pumupunta si Mika sa palikuran ng walang kasama.

---

---

Ang istoryang ito ay hango sa totoong pangyayari ngunit naisipan kong ibahin ang mga pangalan ng karakter sa kwento dahil trip ko lang hehe.

---

---

Maraming Salamat sa Pagbisita!