Magtanim ay ‘di biro

Karaniwan na sa mga Pilipino ang pagiging mahilig sa pagkain ng gulay, lalo na sa mga nagsilaki sa probinsiya. Mas nasisiyahan tayo na ang ulam sa ating mga hapagkainan ay mga pagkaing masustansiya at sariwa. Kaya naman dito sa gitnang silangan, bagamat malayo sa ating bansa, ay sinisikap pa din ng karamihan sa mga OFW na maghanda ng mga pagkaing nakagisnan na, upang kahit papaano ay maibsan din ang nraramdamang pangungulila.

Sa pagpasok ng taong 2018 ay pinasimulan ng ipatupad ang 5% Value Added Tax o VAT dito sa U.A.E. Dahilan upang tumaas ang halaga ng mga produkto at iba’t ibang pangunahing serbisyo kabilang na ang pagkain gaya ng gulay. Sa isang bansang nasa desyerto, karamihan ng gulay na mabibili ay inangkat sa ibang bansang mas may kakayanang magpatubo nito.

Dahil dito, ilan sa ating mga kababayan dito sa Al Ain, Abu Dhabi ang nagtanim na at nagpalaki ng gulay sa kanilang sariling bakuran upang kahit paano ay makatipid at makakain pa din ng mga pagkain tiyak na sariwa.

Sa mga ilang buwan kung saan taglamig ang klima dito sa U.A.E. ay nagiging akma ang kondisyon upang makapagpatubo ng mga pananim kahit na sa iyong sariling bakuran.

Isa sa mga gulay na maari mong mapatubo dito ay ang talong:

Gayon din ang kalabasa, na hindi lang makakain ang bunga, kundi maging ang bulaklak na siyang itinatalbos at sinasahog sa mga lutuing gaya ng pakbet:

Bukod pa sa mga pangkaraniwang tanim gaya ng sili, kamatis at malunggay.

Hindi matatawaran ang abilidad ng mga Pilipino. Sa anomang kalagayan sa buhay at kondisyon ng lugar na tinitirhan, nagagawang kaayaaya at mas kahawig ng ating lupang sinilangan. Pang alis ng homesickness, ika nga. Nagagawa pa din nating makakakuha ng kasiyahan sa mga simpleng gawain gaya ng pagtatanim.