Ksiōnżki ô Ślōnsku, niy dycki po Ślōnsku

Jadymy durś z tom tymom, trzymejcie sie zicy, uwarzcie sie jakiego tyju abo kafyju, bo dzisiej bydzie ô ksiōnżkach.

Dlŏ mocki ludzi literatura ô Ślunsku to ino Gustaw Morcinek i ônego "Łysek z pokładu Idy", a dalyj niy ma nic.
Dzisiej tyż, chcã wŏm pokŏzać pora tytułōw kere niy ino som o tym moim heimacie, ale i lekko sie je czytŏ, i co jeszcze ważne niy sōm ône wszystke po ślōnsku. Niy chcã tyż Wŏs nudzić, jakimi Berami czy Bajkami, z kerymi ciynżko bydzie Wŏm poradzić.

Chyntnie tyż dowiem sie, czy Wy znŏcie jakieś gryfne ksiōnżki o Ślōnsku?

Piyrszo pozycjõ - Drach, Szczepan Twardoch

Tego karlusa niy trza prezentować - Szczepan Twardoch, synek z Żernicy/Pilchowic kole Gliwic, kery ze szwōngiym trefił na salony. Jedna z jego ksiōnżek Drach dzieje sie tukej, u nos.
Co tam sie wyrabiŏ? To jest historyjõ człowiyka, na Ślōnsku, jego wyborach, jego korzyniach/familje, jest tyż trochã o przajaniu i ô grubach.

Czytŏ sie ciyngiem, jeszcze i jeszcze.

Janosch - Cholonek

Janosch, tak po prŏwdzie jemu jest Horst Ecker, rodzioł sie w Zŏbrzu, a potym jak wyjechoł ze familjōm do Reichu chytoł sie roztomajtych fachōw, ale to pisanie dŏwało mu nŏjwiyncyj zocy. Pisoł po niymiecku, albo raczyj w niymieckiym zapisie, dyć jego prace sōm przeônaczone na polski.
Cholonek, czyli dobry Pan Bóg z gliny, to tyż ksiōnżka o ludziach z jednego familoka, do keryj prziszła wojnõ, dyć sami sie do niyj nie ciśli, to ôna do niych przilazła i narobiła larma w ich życiach. Prziszła i trzy było ôroz wybiyrać tyś jest Polŏk, Niymiec, czy fto. A potym te wybory mioły swoje skutki, czynsto tragiczne.

Zdŏwo mje sie co tyż boł z Cholonka zrobiony Tyjater Telewizje TVP, ale jakbyście kiejś mieli okazjõ być w Katowicach, to ôbejrzcie repertuar tyjatru Korez, kaj ôd czasu do czasu dŏwajōm Cholonka. Polecŏm, JoCieProszã.

Ślōnski kryminał?

Dyć sōm i takie! Siedzioł sie taki Marcin Belon na banhofie, czekoł na cugi czy bany, nie strzimoł i napisoł cało seryjõ ksiōnżek o kōmisorzu Hanusiku (Janek). Połna humoru i suspensu ôpowiyść ô Ślōnsku, na kerym beboki, strzigi, utopce, czy inne połednice sōm miyndzy nami, tak jak zwykłe mordyrze.

Przy ôkazji, werci sie pedzieć, co piyrwszo czynść mo tyż audiobooka, sōm tyż ebooki w normalnych formatach, eliby komuś naszła ochota to idzie te ksiōnżki kupić bez neca na stronie wydawnictwa Silesia Progress

Liryka, Epika i Dramat

Pamiyntŏcie ze szule, pra? Ślōnsko literatura, to niy ino sztuka dlŏ sztuki, to tyż żywy materiał, kery idzie do czytelnika. Tyjater Korez, ô kerym boło wyży pomogajōm w takim konkursie Jednoaktōwek po ślōnsku i po kŏżdym takim konkursie wydowajōm ksiōnżka z tymi jednoaktōwkami. Ciynżko te dzieła wciepnońć do jednego neca, bo sōm cołkiym rōżne, ale sam mocie prōbka:

Z 2016 r. ### <=== Naciś sam!!!

Tak po prŏwdzie, to niy wiym kaj byście mogli sie ja kupić, ale widzã, co na allegro sōm, ceny tyż dŏ sie przeżyć.
To je richtig konsek dobryj literatury, przi tym do tych ksiōnżek dowajōm płyty CD z audiobookiym.
Ale co je nŏjważniyjsze, to co to jest szrajbōnek amatorōw, ludzi autentycznych, bezto te historyje sōm tak bliskie sercu.