Zia ul Qur'anدرسِ ضیاء القرآن

سلسلہ درسِ ضیاءالقران
از حضرت جسٹس پیر محمد کرم شاہ الازہری علیہ الرحمۃ سورہ البقرة آیات نمبر145،146
بسم اللہ الرحمن الرحیم

وَلَئِنْ أَتَيْتَ الَّذِينَ أُوتُوا الْكِتَابَ بِكُلِّ آيَةٍ مَّا تَبِعُوا قِبْلَتَكَ ۚ وَمَا أَنتَ بِتَابِعٍ قِبْلَتَهُمْ ۚ وَمَا بَعْضُهُم بِتَابِعٍ قِبْلَةَ بَعْضٍ ۚ وَلَئِنِ اتَّبَعْتَ أَهْوَاءَهُم مِّن بَعْدِ مَا جَاءَكَ مِنَ الْعِلْمِ ۙ إِنَّكَ إِذًا لَّمِنَ الظَّالِمِينَ (145)
ترجمہ:
اور اگر آپ لے آئیں اہل کتاب کے پاس ہر ایک دلیل (پھر بھی) نہیں پیروی کریں گے آپ کے قبلہ کی اور نہ آپ پیروی کرنے والے ہیں ان کے قبلہ کی اور نہ وہ ایک دوسرے کے قبلہ کو ماننے والے ہیں اور اگر (بفرض محال) آپ پیروی کریں ان کی خواہشوں کی اس کے بعد کہ آچکا آپ کے پاس علم تو یقیناً آپ اس وقت ظالموں میں (شمار) ہوں گے
تفسیر: اس آیت میں بظاہر خطاب حضور کریم (صلی اللہ علیہ وسلم) کو ہے لیکن مراد امت ہے۔ کیونکہ امت سے تو اپنے نفس کی خواہشات کی تابعداری ممکن ہے ۔ لیکن نبی کی ذات جو صغائر سے بھی معصوم ہوتی ہے اس سے تو ناممکن ہے کہ ایسا جرم سرزد ہو۔ مضمون کی اہمیت کے باعث حضور (صلی اللہ علیہ وسلم) کی طرف نسبت کی گئی۔ فھو محمول علی ارادۃ امتہ لعصمۃ النبی (صلی اللہ علیہ وسلم) وخوطب علیہ السلام تعظیما للامر (قرطبی) ۔

الَّذِينَ آتَيْنَاهُمُ الْكِتَابَ يَعْرِفُونَهُ كَمَا يَعْرِفُونَ أَبْنَاءَهُمْ ۖ وَإِنَّ فَرِيقًا مِّنْهُمْ لَيَكْتُمُونَ الْحَقَّ وَهُمْ يَعْلَمُونَ (146)
ترجمہ:
جن لوگوں کو ہم نے کتاب دی ہے وہ پہچانتے ہیں انہیں جیسے وہ پہچانتے ہیں اپنے بیٹوں کو اور بےشک ایک گروہ ان میں سے چھپاتا ہے حق کو جان بوجھ کر
تفسیر:یعنی اہل کتاب اپنے بیٹوں کی طرح حضور نبی کریم (صلی اللہ علیہ وسلم) کو خوب پہچانتے ہیں۔ ان کی آسمانی کتابوں حضور (صلی اللہ علیہ وسلم) کا حلیہ، اوصاف اور معجزات یوں صاف صاف لکھے ہیں کہ شک کی گنجائش ہی نہیں رہتی۔

والسلام