加密幣，股票 與Steemit

響香港，炒股是常識吧？加密幣？食唔食得㗎？Steemit？我淨係用Facebook㗎咋...... 炒賣、還是投資？加密幣？股票？等我講講我嘅嘅觀察同觀點。

實況

由你做野開始，銀行就會免費提供一個戶口比你，未飲得酒就已經可以炒股票，炒股票變成與生驅來嘅基因。虛擬幣，經過20年嘅發展，由網上嘅 點數幣 到家下嘅 加密幣，例如Bitcoin，好多人都未習慣得到，覺得好冇安全感。梗係啦，銀行冇教你玩，你去同朋友講人地當你撞邪，同屋企人講？比多幾百蚊家用，甚至乎去澳門賭左佢好過啦（如果你今時今日仲入到澳門）。

點解我地會咁鍾意炒股？

香港嘅情況同外國好唔同，冇乜社會保障制度，市民唔需要唔投資黎攞褔利；又冇乜投資增值稅嘅傳統 - 近年炒樓要比，不過大慨你同我都冇咁嘅褔份去比。美國印銀紙令香港通脹，香港人只好買少啲外國野，或者焗住去炒股 – 冇錯，係焗炒的，冇方法去令自己嘅銀紙對抗通脹。投資門檻亦都好低，所有稅都係簡單咁賣時已扣數，一般市民係唔需要專門搵會計師去做數黎減稅。外國就好唔同了，你買股票唔單單要睇你有冇錢，亦都要諗定長揸定短炒，因為長揸稅係基本上唔收的，短炒就要比capital gain了(即你要比一定比率嘅利潤做稅項)，而且你係要自己計好呢啲數，年尾時要打入你嘅報稅表，對冇乜學識嘅人黎講係一種負擔黎。

炒加密幣又如何？

難，真係好難。難係難在太複雜了。

一般人如果要自學，首先係好難睇得明白真正嘅運作。香港人中過太多伏，變得買賣新野都好小心好小心，唔睇資料睇番3x5x7個星期都唔敢入市。再加上傳媒並唔中肯地報導，要正確掌握有關知識就唯有睇英文或中國嘅文章，當中要搵到合適嘅文章需要好多時間，間唔中有好嘅報導都過左氣，時間一耐市場就轉變了 – 7x24 冇假期冇休市，經常有技術轉變等等。

加密幣需要嘅智識包括 經濟、財經、資訊科技及對風險真正意義嘅認知，詳細咁講，經濟幫助你明白點解加密幣會有價值，財經令你明白市場資信對你投資嘅影響，資訊科技幫助你明白加密幣嘅運作方式及點樣將加密幣送出送入、使用加密幣交易所等等，而對風險嘅認知，就係明白自己抵唔抵受得住大上大落嘅環境，令你入左市都仍然每日可以快樂生活。

其實加密幣都可以好簡單

一般人要知道嘅只係點樣買，點樣收藏，點樣轉送就得。以香港人對股票號碼嘅興趣，簡直係小兒科啦。 要炒就揀啱交易所就可以了，怕交易所比人hack?交易完換好加密幣就送番去自己錢包就得啦，最緊要你抄低左backup code,咁就算壞左電腦/電話都可以響新機度還原番。放得多錢入去就買個硬體錢包就搞掂，簡單過去匯豐整嗰個PayMe 咁麻煩嘅服務啦。

世代之爭

後生世代嘅朋友好快就掌握到當中嘅秘訣，而手上最多錢嘅中年中產就極難投入。我嘅朋友及同學之中，好多都對科技或財經有好深入嘅研究，但大多數人都係因為慨念複雜而腳步，就算係手中嘅「散紙」都唔想投入，我面對佢地其實都十分之冇癮。

響我嘅觀察當中，20歲左近嘅人十分習慣加密幣嘅投資。佢地讀書嘅時候已經完全掌握近年嘅網上知識，讀大專嘅時候就已經炒過股票，而當加密幣出現響佢地眼前嘅時候，特別係ICO, 簡直係為佢地度身訂造嘅投資機會（發達機會貼切啲？）。30歲以上嘅人就可能連可以經Facebook send錢都未聽過，中伏中得多唔敢亂投資，家庭有負擔嘅人都好多，有錢都情願「放監」出埠抖下氣，你話佢地又點會肯投資入呢啲咁「虛無飄渺」嘅野？

你點可以用股票黎比？

呢句話有雙重意義。用深信股票優越嘅角度黎講，股票有間公司響度，又有証監同你睇住啲公司，仲有咁多人響個市場度買買賣賣，點可以用股票同你啲冇內在價值嘅數字去比？深信加密幣嘅我就會覺得股票點比得上加密幣 — 你響香港買到嘅股票最多係乜人買？咪就係大行衍生工具嘅買賣盤，同紅色資金囉。炒股炒得耐嘅人未必搵到錢，但都領教過佢地有幾恐怖，風險都幾高。

加密幣例如Bitcoin已經係全世界都可以加入嘅市場，家下甚至乎有個人造衛星去做交易，就算全球斷網都仲可以用到，港股同A股點比？

轉捩點

以我自己嘅計算黎講，今個經濟週期已經走到最高潮，好快就會重覆十年一次嘅大跌同低潮，講梗嘅係2018年。當一般香港人、甚至全世界嘅人到其時都發現只有加密幣可以為佢地保持住購買力嘅時候，一啲預早盡沽資產現金在手嘅人就會將佢地嘅現錢推晒入加密幣市場。

唔信？最簡單黎講，誠哥李嘉誠響2013年時已經投資左入bitcoin 交易服務商Bitpay，呢個係第一指標。而如果你有留意中國嘅政情，近一年中國已不停咁壓止加密幣嘅發展，用番民間智慧黎講，呢個係一盞明燈黎。再加上世界其他地方嘅國家紛紛加入Bitcoin 作為佢地嘅其中一種貨幣，呢個大趨勢係唔可以逆轉。要擔心嘅事唔應該再係應唔應該投入呢個市場，而係你到底可唔可以學識保護你自己嘅加密幣。

而Bitcoin 嘅設計係不停咁會升值，個關鍵係有幾多人去用佢做交易。香港人最常去嘅日本已經合法化左Bitcoin,已經有金融產品以Bitcoin做發行單位，你去Bic Camera買電器可以用，去OIOI買衫可以用，甚至連買高清歌mora.jp同睇AV dmm.jp都可以用。未計買Dell電腦同打Xbox可以用添，你唔識用就真係落後了。而Bitcoin其實係加密幣嘅旗艦，市場上全部加密幣都可以用Bitcoin黎計價結算，Bitcoin嘅成功係對整個加密幣市場嘅催化劑。

Steemit

要認識加密幣，呢度係一個不二之選。唔需要比錢就可以使用呢個服務，文章有人認同就可以得到加密幣。試問有乜野係可以咁著數？係呀，外國有一句野叫Too Good To Be True，我地叫「邊有咁大隻蛤乸隨街跳？」我同啲朋友講佢地嘅態度都係如此，我只可以感慨佢地走雞喇。唔駛比錢有錢搵都咁難投入，比錢買加密幣咪仲難？

後記

呢一篇文章由起草到完成用左2個月，係我8月時再重新學習Bitcoin時所記低嘅筆記為主軸，向親友簡介Bitcoin嘅材料黎。經過左2個月嘅精鍊，今日終於完成。好可惜到家下都未有人走番黎問我有關嘅資訊，所以我就完善左文句，等各位香港Steemit用家參考用黎「傳教」。

另我今日打文嘅時候用左最新版嘅macOS黎打，好方便。有晒香港人用嘅關連詞，甚至乎我唔記得左點寫嘅字都可以用口講去等佢完成，可以講Apple係幫我地保留左我地一部份嘅文化。

關於錢包嘅文 https://steemit.com/@ryoplasmic/bitcoin-ios

Copyright © RyoPlasmic 2017. All rights reserved.
本文可供傳閱及引用，唯必須提及出處（本頁）。禁止未經授權出版複制至任何牟利刊物及網站。