කාසි කතා | 10% for SL-Charity

බස් ගාස්තු වැඩි වුණත් හරි මගේ බෑග් එකේ පොකට් කාසි වලින් පිරෙන්න ගත්තා. පුංචිට දීලා මාරු කර ගන්න පුළුවන් කම තිබුණත් මම ඒවා එකතු වෙන්න ඉඩ ඇරියේ ගෙදර තියෙන මගේ සල්ලි කැටේ මතක් වුණ නිසා. ඉතින් ලැබුවා වූ මේ නිවාඩුවේ (🤭) කාලෙකට පස්සේ ගෙදර එන්න අවස්තාවක් මටත් ලැබුණා.

ඉතින් එකතු කරන් හිටිය ඉතුරු කාසි ඔක්කොම මගේ සල්ලි කැටේට දාපු එක තමා මගේ ප්‍රථම රාජකාරිය වුණේ. "තමුසේ පොඩි එකෙක් වගේ ඕයි........" ඒක දැකපු මල්ලි එයාට හිතට ආව දේ වචන වලට හැරෙව්වේ එහෙමයි. අපි ආසවට විනෝදාංශයක් විදියට කරන දේවල් වලට කොහෙද තියෙන්නේ වයසේ බලපෑමක්...?? 🙊

ගෙදර ආවාම තමයි හුස්ම හරියට ගැනෙන්නේ... ජීවත් වෙනවා කියලා දැනෙන්නේ... ඔය ෆොටෝ වල තියෙන්නේ අපේ වත්තේ පිපෙන මල්. ඔය මල් ගැන මම ඒ දවස් වල මොන තරම් ලියලා ඇතිද... ඔයාලට මතකත් ඇති... ඒත් කාලෙකට පස්සේ ආයෙමත් මේ මල් දකිද්දි දැනෙන හැගීම තමයි මාව ,

ගෙදර ආවාම තමයි හුස්ම හරියට ගැනෙන්නේ... ජීවත් වෙනවා කියලා දැනෙන්නේ...

මෙහෙම හිතන්න පෙළඹුවේ....❤️

ඉතින් ආයෙමත් කාසි කැටේ ගැන කිව්වොතින් කාසි කැටේ නම් හොදටම පිරිලා. ඒ කියන්නේ ආයිත් අලුත් කැටයක් හොයා ගන්න කාලේ හරි. ඔය අතරේ මට හිතුණා මම එකතු කරපු කාසි ටික බලන්න. පුංචි කාලේ ඉදන් එකතු කරපු එක එක ජාතියේ කාසි අතරේ කවදාවත් ඇරලා බලපු නැති කාසි පෙට්ටි තුනකුත් මම ලග තිබුණා.

ඒ අපේ සීයගෙන් අපේ පුංචිට හම්බුණු කාසි එකතුව.. ඔව්.. පුංචි ඒක මට දුන්නා.. හැබැයි කවදාවත් මම ඒ කාසි පෙට්ටි ඇරලා බැලුවේ නෑ. ඔන්න අද තමයි දවස මම ඒ කාසි පෙට්ටි මුලින්ම ඇරලා බලපු.

ඔය මුලින්ම තියෙන කාසි පෙට්ටි තුන තමයි මට පුංචි දුන්නේ කාලෙකට කලින්. මගේ කාසි එකතුවේ නැති අලුත් කාසි ගොඩක් සීයගේ කාසි එකතුවේ තියෙනවා. ඒ අතරේ පිටරට කාසි වරගත් තියෙනවා. මට අවුරුදු නමයෙදි තමයි සීයා නැති වෙන්නේ. සීයා එක්ක තිබුණ ලස්සනම මතකේ තමයි මම චූටි කාලේ ඉස්කෝලේ ඇරිලා ගෙදර එනකන් සීයා දවල්ට නොකා ඉදපු එක. ඉතින් අද මම සීයා ගැන ගොඩක් පුදුම වෙනවා...❤️

කාසි එකින් එක බලද්දි ඒවයි අවුරුද්ද බලද්දි හරිම අමුතු සතුටක් දැනෙන්නේ. සමහර කාසි පරණ වැඩි කමට ඒවයි හැඩ සමතලා වෙලා. සමහර කාසි අපිරිසිදුයි. ඔයාලා දන්නවද පරණ කාසි පිරිසිදු කරන වෙනමම විශේෂ විදියක් ඒවට හානියක් නොවී??

මුලින්ම මට ඕනි කරන්නේ මේ කාසි පිරිසිදු කර ගන්න. මොකද එතකොට තමයි ඒ කාසියේ විස්තරේ හොයා ගන්න ලේසි වගේම මම හොයා ගන්න දේවල් ඔයාලා එක්ක බෙදා ගන්නත් ලේසි. ඉතින් මගේ නිවාඩුව මේ කාසි එක්ක ගත කරන්න මම හිතා ගන්තා.

ඔය අතරේ අම්මා මට දෙයක් ගෙනැල්ලා දුන්නා. ඇත්තටම මම ගොඩක් පුදුම වුණා ඒක දැකලා. ඒක රුපියල් පන්සීයේ කාසියක්. ඔයාලා නම් සමහර විට මීට කලින් ඒක දැකලා ඇති. ඒත් මම නම් පලවෙනි වතාවට දැක්කේ. අම්මාට ඒ කාසිය දීලා තියෙන්නේත් පුංචි.

මේ කාසිය වෙනම පුංචි පෙට්ටියක දාලා තියෙන්නේ. කාසිය නිකුත් කරලා තියෙන්නේ 1990 වසරේ ශ්‍රී ලංකා මහ බැංකුවේ හතලිස් වෙනි සංවත්සරය වෙනුවෙන්. දැන් ඒ කාසියත් මගේ...🙊

ඉතින් මේ වගේ කාසි ගැන විස්තර ගොඩක් ඔයාලා එක්ක බෙදා ගන්න මම බලාපොරොත්තු වෙනවා මගේ කාසි එකතුවත් එක්ක. එතෙක් හැමෝටම , සුභ දවසක්....

-සඳුපි-
💚