සිසිලැති ප්‍රේමය ....නුවරඑළිය ....

ලංකාවේ ඔබ වැඩිපුර යන්න කැමති තැනක් ගැන ඇහුවොත් බොහෝ දෙනෙක් කියාවි "නුවරඑළිය " කියලා .ඒකට විශේෂම හේතුවක් තමයි එහේ තියෙන සිසිල් දේශගුණය වගේම කිව නොහැකි සුන්දරත්වය .ඇත්තටම නුවරඑළිය කියන්නෙ හරි අපුරු තැනක් .ජීවිතේ විඳින්න කැමති බොහෝ දෙනෙක් නුවරඑළියට ගිහිල්ලා ඒ සුන්දරත්වය හරි අපූරුවට විඳිනවා කියලා අපි හැමෝම දන්නවා .අළුත් අවුරුදු කාලයත් එක්ක එන වසන්තයට මුළු නුවරඑළිය ම සැරසෙන්නෙ මුළු රටේම පිරිස ආවත් බොහොම ආදරණීය විදියට පිළිගැනීමේ බලාපොරොත්තුව ඇතුව .ඒ කාලෙට ඒ පැත්ත වෙනමම ලෝකයක් වගේ .බැලූ බැලූ අත ඇස් ඉවතට ගන්න හිතෙන්නෙ නැති මල් ,විවිධ සැණකෙළි ,රස නහර පිනවන කෑම බීම වගේ විවිධ දේවල් මැද මිනිස්සු අතරමං වෙලා වගේ උපරිමයෙන් ජීවිතේ විඳිනවා.අවාසනාවට වගේ දැන් අවුරුදු දෙකක් විතර ඒ සතුට හිතේ හැටියට විඳගන්න කාටවත්ම බැරි වුනා .ප්‍රාර්ථනා කරනවා ආයෙත් ඒ සුන්දර කාලය ඉක්මනින්ම උදා වෙන්න කියලා.

නුවරඑළිය ගැන කථා කරද්දී කථා නොකරම බැරි දෙයක් තියෙනවා .ඒ තමයි ප්‍රේමය.බොහෝ ප්‍රේමවන්තයින් මේ සුන්දර පරිසරයත් එක්ක තමන්ගේ ප්‍රේමනීය සිතුවිලි බෙදා ගන්න කැමතියි.මේ මනස්කාන්ත වටපිටාවේ ජීවිතය සනීපෙට විඳගන්න ප්‍රේමවන්තයෙකු ගේ හිත ඔබත් එක්ක කියවන්න හිතුනා..මේක මට ඇත්තටම හිතුනෙ මීට අවුරුදු දෙකකට විතර කලින් රාජකාරි කටයුත්තකට ගිහින් එහේ නතර වෙලා හිටපු දවසක .එහේ ගියාම ඉන්න තැනක් තියෙනවා එතන හරි ලස්සනයි.කාමරේ සඳළු තලයට ආවම කෙලින්ම පේන්නෙ gregory වැව .හවසට එතන තියෙන සුන්දරත්වය දිහා බලාගෙන ඉන්නකොට මට ඔහුගෙ හිත දැනුන විදිය තමයි මේ.ඒක මට අහම්බෙන් වගේ මතක් වුනා . මේ ඔහුගේ සිතුවිලි මට දැනුන විදිය .

නුවරඑළියෙ සිසිල ..
ඔබත් එක්ක තනිව ..
මුමුණ මුමුණ ඇවිද යද්දී ..
හිතට දැනෙන සතුට ..
මහාමෙරකි සිතට ....

සිහින මැවෙන තරම ..
කාටත් නොදැනුනද ..
කියාගන්න බැරි තරමට ..
ඔබ ගැන සෙනෙහස දැනුනම ..
මුවට නැගෙන මදහස ගැන ..
කුමට කියමි ඔබට ....

අඳුර මකන තරුව ..
ඔබය එළිය ගෙනෙන ..
රොබරෝසියා මල් පෙත්තක ..
පැහැය පිරුණු මුහුණ ..
මගෙයි කියා සිතෙන විටක ..
බලමි හොරෙන් එදෙස ..
ලැජ්ජාවෙන් ඉවත බලා ..
යන්න එපා දුරක ..
ඉන්න මගේ ලඟම ....